بۇقارالىق اقپارات قۇرالدارى قىزمەتكەرلەرى كۇنى قارساڭىندا الماتى قالاسىندا مەديا سالاسى وكىلدەرىن ماراپاتتاۋ ءراسىمى ءوتتى.

پرەزيدەنتتىڭ اتىنان مەملەكەتتىك ناگرادالاردى پرەمەر-ءمينيستردىڭ ورىنباسارى – مادەنيەت جانە اقپارات ءمينيسترى ايدا بالاەۆا تابىستادى.

ۇكىمەت باسشىسىنىڭ ورىنباسارى سالا وكىلدەرىن قۇتتىقتاپ، 25 ماۋسىم كۇنى اقوردادا وتكەن ماراپاتتاۋ راسىمىندە مەملەكەت باسشىسى بۇقارالىق اقپارات قۇرالدارى قىزمەتكەرلەرىنىڭ ەڭبەگىنە جوعارى باعا بەرىپ، ولارعا ريزاشىلىعىن بىلدىرگەنىن اتاپ ءوتتى.

«بارشاڭىزعا بەلگىلى، كۇنى كەشە مەملەكەت باسشىسى قاسىم-جومارت توقاەۆ اقوردادا باق وكىلدەرىمەن كەزدەسىپ، جۋرناليستەرگە مەملەكەتتىك ناگرادالار، باق سالاسىنداعى سىيلىقتار مەن گرانتتار تابىستادى. پرەزيدەنت ءوز سوزىندە اقپارات سالاسى قىزمەتكەرلەرىنىڭ ەڭبەگىنە جوعارى باعا بەرىپ، ەل دامۋى جولىنداعى ماڭىزدى قىزمەتتەرى ءۇشىن ريزاشىلىعىن ءبىلدىردى. ال بۇگىن ءبىز الماتىدا ەل يگىلىگى جولىندا تاباندى ەڭبەك ەتىپ جۇرگەن اقپارات سالاسىنىڭ مايتالماندارىنا قۇرمەت كورسەتىپ وتىرمىز»، – دەدى پرەمەر-ءمينيستردىڭ ورىنباسارى.

ايدا بالاەۆا مەملەكەت سالا قىزمەتكەرلەرىنە جۇيەلى تۇردە قولداۋ كورسەتىپ، ولاردىڭ كاسىبي دامۋىنا جانە الەۋمەتتىك قورعالۋ دەڭگەيىن ارتتىرۋعا قاجەتتى جاعداي جاساپ كەلە جاتقانىن ايتتى.

پرەزيدەنتتىڭ قولداۋىمەن كەيىنگى ءۇش جىلدا استانا قالاسىندا 200 جۋرناليست باسپانامەن قامتاماسىز ەتىلدى. بيىل بۇل باستاما ەلىمىزدىڭ بارلىق ءوڭىرىن قامتىپ، اقپارات سالاسىنىڭ 66 قىزمەتكەرىنە پاتەر بەرىلەدى.

سونىمەن قاتار جۋرناليستيكانىڭ ساپاسىن ارتتىرۋعا جانە شىعارماشىلىق ىزدەنىستى ىنتالاندىرۋعا باعىتتالعان «ۇركەر» ۇلتتىق سىيلىعى مەن «تۇمار» تەلەۆيزيالىق سىيلىعىنىڭ دا ماڭىزى ەرەكشە.

«تۇرعىن ءۇي باعدارلامالارى، مەملەكەتتىك سىيلىقتار مەن گرانتتار، كاسىبي بايقاۋلار جانە باسقا دا قولداۋ شارالارىنىڭ بارلىعى ماسس-مەديا قىزمەتكەرلەرىنىڭ الەۋمەتتىك مارتەبەسىن نىعايتىپ، ەلىمىزدىڭ اقپاراتتىق كەڭىستىگىنىڭ ساپالى دامۋىنا قولايلى جاعداي جاساۋعا باعىتتالىپ وتىر. مەملەكەت اقپارات سالاسىن ستراتەگيالىق ماڭىزى بار باعىت رەتىندە قاراستىرادى. سوندىقتان جۋرناليستەردى قولداۋعا ارنالعان مۇنداي جۇيەلى جۇمىستار الداعى ۋاقىتتا دا جالعاساتىن بولادى»، – دەدى ايدا بالاەۆا.

سالتاناتتى ءىس-شارا بارىسىندا وتاندىق جۋرناليستيكانىڭ دامۋىنا قوسقان ۇلەسى ءۇشىن مەديا سالاسىنىڭ قىزمەتكەرلەرىنە «پاراسات»، «قۇرمەت» وردەندەرى، «ەرەن ەڭبەگى ءۇشىن»، «شاپاعات» مەدالدارى، سونداي-اق قازاقستان رەسپۋبليكاسى پرەزيدەنتىنىڭ العىسى تابىستالدى.

ماراپاتتالعاندار ءتىزىمى:

يمانباي جۇباي – «پاراسات» وردەنى

التىن يمانباەۆا – «قۇرمەت» وردەنى

زۇلحايات ماحانوۆا – «قۇرمەت» وردەنى

باعداتحان مۇپتەكەقىزى – «قۇرمەت» وردەنى

فيرۋزا پەرزاداەۆا – «قۇرمەت» وردەنى

سەرىك ۇسەن – «قۇرمەت» وردەنى

بولاتبەك اسانباەۆ – «ەرەن ەڭبەگى ءۇشىن» مەدالى

لاريسا اسحاروۆا – «ەرەن ەڭبەگى ءۇشىن» مەدالى

توقتار جاقاشوۆ – «ەرەن ەڭبەگى ءۇشىن» مەدالى

نايل يشمۋحامەتوۆ – «ەرەن ەڭبەگى ءۇشىن» مەدالى

ولەگ كوستوماروۆ – «ەرەن ەڭبەگى ءۇشىن» مەدالى

ليمارا قازيەۆا – «ەرەن ەڭبەگى ءۇشىن» مەدالى

الەكساندر نەزدەمكوۆسكي – «ەرەن ەڭبەگى ءۇشىن» مەدالى

بايان ءالتاي – «شاپاعات» مەدالى

قر مادەنيەت جانە اقپارات مينيسترلىگىنىڭ ءباسپاسوز قىزمەتى

Abai.kz