الماتى وبلىسىنىڭ كەگەن اۋدانى قارقارا جايلاۋىندا ءدۇيىم جۇرت اسىعا كۇتكەن «قىمىزمۇرىندىق – 2026» مادەني-كوپشىلىك جانە سپورتتىق شاراسى باستالدى. اتالمىش مەرەكە ابىز بابا المەرەك جانشىقۇلىنىڭ 368 جىلدىعىمەن قاتار كەلىپ، بيىل 5-رەت ۇيىمداستىرىلىپ وتىر. مەرەكەگە ەلىمىزدىڭ تۇكپىر-تۇكپىرىنەن، تۇركيا، ءازىربايجان، قىرعىزستان، قىتاي، تۇركمەنستان، وزبەكستان، قاراقالپاقستان رەسپۋبليكاسىنان قوناقتار كەلۋدە. قىمىز تويىنا بارلىعى 35 مىڭعا جۋىق مەيمان قاتىسادى دەپ كۇتىلۋدە، – دەپ حابارلايدى الماتى وبلىسى اكىمىنىڭ ءباسپاسوز قىزمەتى.

تاڭ سارىدەن قارقارا جايلاۋىنا جينالعان جۇرتشىلىق ءتۇرلى باعىتتاعى تاقىرىپتىق الاڭداردى ارالاپ كوردى. جۇزدەن استام كيىز ۇيدەن قۇرالعان ەتنواۋىلدا قوناقتار قازاق حالقىنىڭ باي مادەنيەتىنەن سىر شەرتەتىن كورمەنى تاماشالادى. سونىمەن قاتار قولونەر شەبەرلەرىنىڭ، سۋرەتشىلەردىڭ تۋىندىلارى ۇسىنىلىپ، اۋىل شارۋاشىلىعى تەحنيكاسى مەن جەرگىلىكتى وندىرۋشىلەردىڭ ونىمدەرى تانىستىرىلدى. قولونەرگە قىزىعاتىن جاندارعا شەبەرلىك ساعاتتارى وتكىزىلۋدە. ۇلتتىق سالت-ءداستۇر مەن ادەپ-عۇرىپتىڭ ايشىعى بولعان تاريحي جادىگەرلەر كورمەسى دە حالىقتىڭ ەرەكشە نازارىنا ىلىكتى.

قىمىز تويىندا سونداي-اق ۇلتتىق ويىنداردان ءتۇرلى سايىستار وتكىزىلىپ، مىڭجىلقى اتىرابىن دۇبىرگە بولەۋدە. اتاپ ايتقاندا، سپورتشىلار ات بايگەسى، قازاق كۇرەسى، الىپتار سايىسى، تەڭگە ءىلۋ، اسىق اتۋ، قوي كوتەرۋ سىندى جارىستاردان سىنعا تۇسۋدە.

سونىمەن بىرگە «توپجارعان» ەتنو-ونەر ورتالىعىنىڭ شوۋ باعدارلاماسى، «تولاعاي» ونەر ورتالىعىنىڭ قويىلىمدارى، وبلىس ونەرپازدارى مەن تانىمال ەسترادا جۇلدىزدارىنىڭ كونتسەرتى قوناقتارعا كوتەرىڭكى كوڭىل-كۇي سىيلاۋدا. بالالارعا ارنالعان ايماقتا اتتراكتسيوندار، قۋىرشاق تەاترى، قولونەر، سۋرەت سالۋ، شاحمات جانە توعىزقۇمالاق جارىستارى وتكىزىلۋدە. «قىمىزمۇرىندىققا» كەلگەن كوپشىلىك ۇلتتىق سۋسىنىمىز قىمىزدان ءدام تاتىپ، ۇلتتىق تاعامنان اۋىز ءتيىپ، مارە-سارە بولۋدا.

Abai.kz