قىرعىزستان مەن وزبەكستان شەكاراسىنداعى اتىس: 27 كۇش قۇرىلىمى قىزمەتكەرى ۇستالدى.

قىرعىزستاننىڭ باتكەن وبلىسىنداعى ەكى باقىلاۋ-وتكىزۋ پۋنكتىندە 5 شىلدە كۇنى كەشكە ارنايى وپەراتسيا ءوتتى. ۇقمك (گكنب) قىزمەتكەرلەرى مەن «الفا» ارنايى جاساعى سىبايلاس جەمقورلىققا كۇدىكپەن 27 اسكەري قىزمەتشىنى ۇستادى، دەپ حابارلايدى «وردا» باسىلىمى 24.kg پورتالىنا سىلتەمە جاساپ.

وپەراتسيا وزبەكستانمەن شەكاراداعى «قادامجاي-اۆتوجول» جانە «شەشمە-اۆتوجول» (چەچمە) وتكىزۋ پۋنكتتەرىندە ءبىر مەزگىلدە جۇرگىزىلدى. دەرەككوزدەردىڭ مالىمەتىنشە، كەشكى ساعات 19:00 شاماسىندا ارنايى جاساق وتكىزۋ پۋنكتتەرىنىڭ اۋماعىنا كىرگەن.

ول جەردە شەكارا قىزمەتىنىڭ، كەدەن جانە ۆەتەريناريا قىزمەتىنىڭ قىزمەتكەرلەرى ۇستالدى.

دەگەنمەن، وپەراتسيا اتىسسىز وتكەن جوق. ارنايى جاساق «قادامجاي» ءبوپ اۋماعىنا كىرگەن كەزدە، شلاگباۋم ماڭىنداعى بەكەتتە تۇرعان پراپورششيك ءتورت رەت وق اتقان. تاعى ءبىر اسكەري قىزمەتشى اۋەگە ەسكەرتۋ وعىن اتتى. قارۋدى قولدانۋدىڭ زاڭدىلىعى تەكسەرىلىپ جاتىر.

ءتىنتۋ كەزىندە شەكاراشىلاردان 38,5 مىڭ سوم جانە 5,6 ميلليوننان استام وزبەك سۋمى تابىلدى. كەدەنشىلەردەن 100 مىڭ سوم مەن دوللار تاركىلەندى، ناقتى سوماسى ءالى انىقتالۋدا. سونىمەن قاتار، «شەشمە» ءبوپ-ءنىڭ ەكى قىزمەتكەرى اقشا الۋ ساتىندە بەينەباقىلاۋ كامەرالارىنا ءتۇسىپ قالعان كورىنەدى.

ۇقمك باسقارماسىنا «شەشمە» ءبوپ-نەن 11 جانە «قادامجاي» ءبوپ-نەن 16 اسكەري قىزمەتشى جەتكىزىلدى. ەكى اك-74 اۆتوماتى، ەكى وقجاتار (ماگازين) جانە 60 پاترون تاركىلەندى.

تەرگەۋ امالدارى جۇرگىزىلىپ جاتقان ۋاقىتتا ەكى وتكىزۋ پۋنكتىنىڭ دە جۇمىسى توقتاتىلدى. كەزەكتى 3 مىڭعا جۋىق ادام مەن 400 اۆتوكولىك جينالىپ قالدى. كەيىنىرەك «قادامجاي-اۆتوجول» ءبوپ ارقىلى قوزعالىس قايتا قالپىنا كەلتىرىلدى.

ۇقمك اقپارات جاريالانعان ساتتە ارنايى وپەراتسياعا قاتىستى ەشقانداي تۇسىنىكتەمە بەرگەن جوق.

جاقىندا باتكەن وبلىسى باسقا ماسەلەگە بايلانىستى دا تىلگە تيەك بولعان ەدى. وندا لوگيستيكالىق ماسەلەنى شەشۋ تۋرالى ءسوز بولعان بولاتىن.

Abai.kz