مەملەكەت باسشىسىنىڭ تاپسىرماسىنا سايكەس، مادەنيەت جانە اقپارات مينيسترلىگى كرەاتيۆتى يندۋستريانى دامىتۋ جانە سالانى مەملەكەتتىك قولداۋ تەتىكتەرىن جەتىلدىرۋ جۇمىستارىن جالعاستىرىپ كەلەدى.

وسىعان بايلانىستى قازاقستان رەسپۋبليكاسى مادەنيەت جانە اقپارات ءمينيسترىنىڭ «كرەاتيۆتى يندۋسترياعا جاتاتىن ەكونوميكالىق قىزمەت تۇرلەرىنىڭ تىزبەسىن بەكىتۋ تۋرالى» بۇيرىعىنا وزگەرىستەر ەنگىزىلدى.

ناتيجەسىندە كرەاتيۆتى يندۋسترياعا كىرەتىن ەكونوميكالىق قىزمەت تۇرلەرىنىڭ (ەقجج) سانى 43-تەن 53-كە دەيىن ۇلعايدى.

تىزىمگە مىناداي قىزمەت تۇرلەرى ەنگىزىلدى:

•«ۆەب-پورتالدار قىزمەتى»;

•«راديوحابار تاراتۋ»;

• «مادەنيەت سالاسىنداعى ءبىلىم بەرۋ»;

• «جارناما اگەنتتىكتەرىنىڭ قىزمەتى»;

• «كىتاپ باسىپ شىعارۋ»;

• «وزگە دە باسپا قىزمەتى»;

• «كينوفيلمدەر، بەينەفيلمدەر مەن تەلەۆيزيالىق باعدارلامالاردى تاراتۋ قىزمەتى»;

• «كينوفيلمدەردى كورسەتۋ قىزمەتى»;

• «وزگە دە پوليگرافيالىق ءوندىرىس»;

• «تىعىننان، ساباننان جانە ورۋگە ارنالعان ماتەريالداردان بۇيىمدار ءوندىرۋ».

ءتىزىمنىڭ كەڭەيۋى كرەاتيۆتى يندۋستريا سۋبەكتىلەرىنىڭ اياسىن ناقتى ايقىنداۋعا، ولاردىڭ مەملەكەتتىك قولداۋ شارالارىن پايدالانۋىنا جول اشۋعا، سالانىڭ اشىقتىعىن ارتتىرۋعا ءارى شىعارماشىلىق كاسىپكەرلىكتىڭ دامۋىنا قوسىمشا سەرپىن بەرۋگە مۇمكىندىك بەرەدى.

Abai.kz