قازاقستانداعى گوبەلەن ونەرىنىڭ نەگىزىن قالاۋشىلاردىڭ ءبىرى، سۋرەتشى ءباتيما زاۋىربەكوۆا – ۇلتتىق بەينەلەۋ جانە ساندىك-قولدانبالى ونەرگە وزىندىك قولتاڭباسىن قالدىرعان تۇلعا. ول قازاقستان رەسپۋبليكاسى سۋرەتشىلەر وداعىنىڭ مۇشەسى، ش. ءۋاليحانوۆ اتىنداعى مەملەكەتتىك سىيلىقتىڭ لاۋرەاتى، قازاقستان رەسپۋبليكاسىنىڭ ەڭبەك سىڭىرگەن مادەنيەت قايراتكەرى، كوپتەگەن وبلىستىق جانە حالىقارالىق كورمەلەردىڭ قاتىسۋشىسى ءارى جەڭىمپازى.

ءباتيما زاۋىربەكوۆانىڭ ەسىمى ونەرسۇيەر قاۋىمعا قازاقستانداعى گوبەلەن ونەرىنىڭ نەگىزىن قالاۋشى رەتىندە كەڭىنەن تانىس. ول – ەلىمىزدەگى گوبەلەن كارتينالارىن جاساعان تۇڭعىش ايەل سۋرەتشى. ونىڭ شىعارماشىلىعى قازىرگى قازاقستاندىق ونەردىڭ دامۋىنا زور ۇلەس قوستى.

200-دەن استام تۋىندىنىڭ اۆتورى

سۋرەتشىنىڭ شىعارماشىلىق مۇراسى اۋقىمدى. ءباتيما زاۋىربەكوۆا 200-دەن استام تۋىندىنىڭ اۆتورى. ولاردىڭ قاتارىندا گوبەلەندەر، كارتينالار مەن ساندىك كەنەپتەر، پورترەتتەر مەن ناتيۋرمورتتار بار.

ءابىلحان قاستەەۆ اتىنداعى قازاقستان رەسپۋبليكاسى مەملەكەتتىك ونەر مۇراجايىنىڭ قورىندا سۋرەتشىنىڭ 17 تۋىندىسى ساقتاۋلى. بۇل ەڭبەكتەر ەلىمىزدىڭ ۇلتتىق قازىناسىنا ەنىپ، مۇراجاي ەكسپوزيتسياسىنان لايىقتى ورىن العان.

ءباتيما زاۋىربەكوۆانىڭ ۇزدىك تۋىندىلارى قازاقستاننىڭ ءىرى مۇراجايلارىندا عانا ەمەس، شەتەلدە دە ساقتاۋلى. ونىڭ شىعارمالارى اۆستراليا، گەرمانيا، فرانتسيا، اقش، يتاليا، كانادا، تۇركيا، شۆەيتساريا جانە قازاقستانداعى جەكە كوللەكتسيالارعا ەنگەن.

گوبەلەن ونەرىنە ءومىر بويى ادال بولدى

ءباتيما زاۋىربەكوۆا 1946 جىلعى 29 تامىزدا جامبىل وبلىسىنىڭ فۋرمانوۆكا اۋىلىندا دۇنيەگە كەلگەن. 1964 جىلى الماتى كوركەمسۋرەت ۋچيليششەسىنە وقۋعا ءتۇسىپ، 1969 جىلى وسى وقۋ ورنىنىڭ ديزاين ءبولىمىن ويداعىداي ءتامامدادى.

وقۋىن اياقتاعاننان كەيىن سۋرەتشى گوبەلەن ونەرىنە دەن قويۋدى تاڭدادى. سودان بەرى ول كوپ جىل بويى ساندىك-قولدانبالى ونەردىڭ وسى تۇرىنە ادال بولىپ قالدى.

باتىس مادەنيەتى زاماناۋي ساندىك-قولدانبالى ونەرگە ەنگىزگەن گوبەلەن تەحنيكاسى سىرتقى سيپاتى جاعىنان قازاقتىڭ ءداستۇرلى تەگىس توقىلعان بۇيىمدارى – الاشا، تاقىر كىلەم، باۋ جانە باسقۇرعا ۇقسايدى. ءباتيما زاۋىربەكوۆا نەگىزىنەن تىك توقىما ستانوگىندا جاسالاتىن، توقۋ تىعىزدىعىمەن ەرەكشەلەنەتىن ءداستۇرلى جازىق گوبەلەنگە باسىمدىق بەرەدى.

ۇلتتىق ويۋ-ورنەك پەن تاريح توعىسقان ونەر

ءباتيما زاۋىربەكوۆانىڭ گوبەلەندەرىنەن قازاقتىڭ ويۋ-ورنەگى، تاريحى، ەتنوگرافياسى مەن فولكلورىنىڭ تەرەڭ كوركەمدىك تۇسىندىرمەسىن كورۋگە بولادى. مۇنىڭ ءبارى كەسكىندەمەمەن ۇيلەسىم تاۋىپ، ءبىرتۇتاس دۇنيە قۇرايدى. قازاق دالاسىنىڭ وسىمدىكتەرى مەن جانۋارلار الەمىنە ءتان قايتالانباس بوياۋلار سۋرەتشىنىڭ تۋىندىلارىندا ءجىپ ارقىلى ورىلگەن كارتيناعا اينالادى.

ونىڭ شىعارمالارىنداعى تۇتاستىق يدەياسى مەن كوركەم وبرازدىڭ بارلىق بولىگىنىڭ ءوزارا ساباقتاستىعى ستيلدەۋ ارقىلى بەرىلەدى. قازاقتىڭ وزىنە ءتان تولقىندى سىزىقتارى مەن قوزعالىسقا تولى وسىمدىك ورنەكتەرى سۋرەتشى ەڭبەكتەرىندەگى نەگىزگى كوركەمدىك قۇرالداردىڭ بىرىنە اينالعان.

وسىنىڭ ءبارى ءباتيما زاۋىربەكوۆانىڭ گوبەلەندەرىنە ايرىقشا ۇلتتىق رەڭ بەرەدى. ۇيلەسىمدى تۇستەر پاليتراسى، ىرعاقتى ءدال سەزىنۋى، كومپوزيتسيانى قۇرۋداعى ءتۇرلى ساندىك-پلاستيكالىق تاسىلدەرى مەن بەينەلەردى جيناقتاپ جەتكىزۋدەگى تەرەڭدىگى سۋرەتشىنىڭ وزىندىك كوركەمدىك ءستيلىن ايقىندايدى.

Abai.kz