مەملەكەت باسشىسى قاسىم-جومارت توقاەۆتىڭ تاپسىرمالارىن ورىنداۋ اياسىندا ەلىمىزدە مەكتەپ ينفراقۇرىلىمىن دامىتۋ بويىنشا جۇيەلى جۇمىس جۇرگىزىلۋدە. سوڭعى بەس جىلدا 1 ملن-نان استام وقۋشى ورنىنا ارنالعان 1120 مەكتەپ سالىندى. ناتيجەسىندە ءۇش اۋىسىمدى مەكتەپتەر سانى مەن وقۋشى ورىندارىنىڭ تاپشىلىعى ءتورت ەسە، ال اپاتتى مەكتەپتەر سانى ەكى ەسە قىسقاردى.

نەگىزگى جوبالاردىڭ ءبىرى - «كەلەشەك مەكتەپتەرى» ۇلتتىق جوباسى. ەلىمىز بويىنشا 460 مىڭ وقۋشى ورنىنا ارنالعان 217 مەكتەپ سالىندى، ونىڭ 84-ءى اۋىلدىق جەرلەردە ورنالاسقان. بۇل مەكتەپتەردە STEM-زەرتحانالار، روبوتوتەحنيكا كابينەتتەرى، كوۆوركينگتەر، حورەوگرافيا جانە سپورت زالدارى قاراستىرىلعان. باستاۋىش جانە جوعارى سىنىپ وقۋشىلارى بولەك بلوكتاردا ءبىلىم الادى، ەرەكشە ءبىلىم بەرۋ قاجەتتىلىكتەرى بار بالالار ءۇشىن كەدەرگىسىز ورتا جاسالعان.

سونىمەن قاتار ءبىلىم بەرۋ ينفراقۇرىلىمىن دامىتۋعا مەملەكەتكە قايتارىلعان اكتيۆتەر باعىتتالۋدا. 2023 جىلى قۇرىلعان ءبىلىم بەرۋ ينفراقۇرىلىمىن قولداۋ قورى ارقىلى 100 مىڭعا جۋىق وقۋشى ورنىنا ارنالعان 90 نىساننىڭ قۇرىلىسى قارجىلاندىرىلدى. ونىڭ 83-ءى پايدالانۋعا بەرىلدى، تاعى جەتەۋىن جىل سوڭىنا دەيىن اشۋ جوسپارلانىپ وتىر.

جاڭا مەكتەپتەر سالۋمەن قاتار قولدانىستاعى ءبىلىم وشاقتارى دا جاڭارتىلۋدا. سوڭعى بەس جىلدا 5026 مەكتەپ جاڭعىرتىلىپ، 4,5 مىڭعا جۋىق مەكتەپ 7009 زاماناۋي ءپان كابينەتىمەن جابدىقتالدى.

الداعى ءۇش جىلدا تاعى 1300 مەكتەپتى رەنوۆاتسيالاۋ جوسپارلانعان. ونىڭ 820-سى اۋىلدىق جەرلەردە ورنالاسقان. جوبا عيماراتتاردى كۇردەلى جوندەۋدى، ءپان كابينەتتەرىن، كىتاپحانالار مەن اسحانالاردى جابدىقتاۋدى، سپورت زالدارىن جاڭارتۋدى، اۋماقتى اباتتاندىرۋدى جانە قاۋىپسىزدىك جۇيەلەرىن كۇشەيتۋدى قامتيدى.

2026 جىلى 60 مىڭعا جۋىق وقۋشى ورنىنا ارنالعان تاعى 101 مەكتەپ سالۋ جوسپارلانىپ وتىر. نەگىزگى ماقسات - وقۋشى ورىندارىنىڭ تاپشىلىعىن جۇيەلى شەشىپ، قالا مەن اۋىل بالالارىنا بىردەي زاماناۋي ءبىلىم الۋ جاعدايىن جاساۋ.

Abai.kz