بۇگىن ەلىمىز ءۇشىن ماڭىزدى كۇن. جاڭا كونستيتۋتسيا قابىلدانعاننان كەيىن ءبىز قۇرىلتايدىڭ — ەلىمىزدىڭ ءبىر پالاتالى پارلامەنتىنىڭ دەپۋتاتتارىن العاش رەت تاڭداپ جاتىرمىز.

ءبىزدىڭ پرەزيدەنتىمىز اتاپ وتكەندەي، بۇگىندە ءبىز «زاڭ جانە ءتارتىپ»، مەملەكەتتىك ينستيتۋتتاردىڭ تيىمدىلىگى، ازاماتتاردىڭ ەركىنە قۇرمەت جانە ولاردىڭ زاڭدى قۇقىقتارىن قورعاۋ مىزعىماس قاعيداتتارعا اينالاتىن مەملەكەتتى قۇرىپ جاتىرمىز.

بۇگىنگى تاڭدا ءبىزدىڭ ارقايسىمىز بۇل ۇدەرىسكە ءوز ۇلەسىمىزدى قوسا الامىز. ول ءۇشىن سايلاۋ ۋچاسكەسىنە كەلىپ، ءوز تاڭداۋىمىزدى جاساۋىمىز كەرەك. بۇل كۇن جاستارىمىز ءۇشىن دە ماڭىزدى. سىزدەر بولاشاقتارىڭىز ءۇشىن داۋىس بەرىپ، ازاماتتىق جاۋاپكەرشىلىك تانىتا الاسىزدار.

قاراعاندى وبلىسىندا 639 سايلاۋ ۋچاسكەسى جۇمىس ىستەيدى. ولاردىڭ تورتەۋى العاش رەت ونەركاسىپتىك كاسىپورىنداردا جۇمىسىن باستادى. ەكەۋى Qarmet- تە، قالعاندارى بالقاشتاعى Kazakhmys Smelting پەن نۇرا اۋدانىنداعى «شۇباركول كومىر» - دە اشىلدى. بۇل جۇمىسشىلارعا وندىرىستەن شىقپاي-اق وزدەرىنىڭ سايلاۋ قۇقىعىن جۇزەگە اسىرۋعا مۇمكىندىك بەرەدى.

جالپى العاندا، وبلىستا سايلاۋعا قاتىسۋ ءاربىر تۇرعىن ءۇشىن قولجەتىمدى جانە ىڭعايلى بولۋى ءۇشىن بارلىق جاعدايلار جاسالعان.

ەرماعانبەت بولەكپاەۆ، قاراعاندى وبلىسىنىڭ اكىمى

Abai.kz