تۇركپا حالىقارالىق باقىلاۋشىلار ميسسياسى قازاقستانداعى قۇرىلتاي دەپۋتاتتارىنىڭ سايلاۋى بىرقالىپتى ءارى ۇيىمداسقان جاعدايدا وتكەنىن مالىمدەدى. باقىلاۋشىلار سايلاۋ بارىسىنىڭ اشىقتىعىن، بارلىق ساناتتاعى ازاماتتاردىڭ داۋىس بەرۋگە جاسالعان جاعدايدى جانە جاستاردىڭ بەلسەندىلىگىن ەرەكشە اتاپ ءوتتى.

سايلاۋدى باقىلاۋ قورىتىندىسىن تۇركى مەملەكەتتەرى پارلامەنتتىك اسسامبلەياسى (تمپا) ميسسياسىنىڭ باسشىسى وسمان مەستەن تانىستىردى.

ونىڭ ايتۋىنشا، ميسسيا مۇشەلەرى قازاقستاننىڭ سايلاۋ زاڭناماسى مەن وعان ەنگىزىلگەن وزگەرىستەردى، سايلاۋشىلار مەن كانديداتتاردى تىركەۋ ءتارتىبىن، سايلاۋالدى ناۋقاننىڭ ءوتۋ بارىسىن، سونداي-اق سايلاۋدى باقىلاۋدى ۇيىمداستىرۋ ءتارتىبىن زەردەلەگەن.

وسمان مەستەن بيىلعى سايلاۋ ناۋقانىنىڭ ەلدىڭ ساياسي دامۋ جولىنداعى ايرىقشا ماڭىزىنا دا توقتالدى. 23 تامىزدا وتكەن سايلاۋ قازاقستان ءبىر پالاتالى قۇرىلتاي جۇيەسىنە كوشكەننەن كەيىنگى العاشقى پارلامەنتتىك سايلاۋ بولدى.

«ميسسيا سايلاۋ ورگاندارىنىڭ ناۋقانعا دايىندىعىن جانە ونى وتكىزۋ جۇمىستارىن، سونىڭ ىشىندە سايلاۋدى قامتاماسىز ەتەتىن ازاماتتاردى وقىتۋ مەن حالىقتى اقپاراتتاندىرۋ شارالارىن وڭ باعالايدى. ءبىز بارعان سايلاۋ ۋچاسكەلەرىندە داۋىس بەرۋ ۇيىمداسقان تۇردە ءوتتى. سايلاۋشىلار ءوز تاڭداۋىن ەركىن جاساپ، داۋىس بەرۋ قۇقىعىن ەش كەدەرگىسىز جۇزەگە اسىرا الدى»، – دەدى مەستەن.

داۋىس بەرۋ كۇنى تۇركپا وكىلدەرى استانا مەن الماتىداعى سايلاۋ ۋچاسكەلەرىن ارالىپ، ولاردىڭ اشىلۋىنان باستاپ داۋىستى ساناۋ پروتسەسىنە دەيىن باقىلاعان.

ميسسيا مۇمكىندىگى شەكتەۋلى ازاماتتاردىڭ داۋىس بەرۋىنە جاسالعان جاعدايعا دا ەرەكشە نازار اۋداردى. باقىلاۋشىلار سايلاۋ ۋچاسكەلەرىندە پاندۋستار، برايل قارپىندەگى ارنايى ۇلگىلەر، سونداي-اق كورۋ جانە ەستۋ قابىلەتى شەكتەۋلى ازاماتتارعا ارنالعان كومەكشى قۇرالدار قاراستىرىلعانىن اتاپ ءوتتى. ورتالىق سايلاۋ كوميسسياسىنىڭ اقپاراتتىق ماتەريالدارى مەن وتىرىستارى دا ىمداۋ تىلىنە اۋدارىلعان.

تۇركپا-نىڭ قورشاعان ورتا، تابيعي رەسۋرستار جانە دەنساۋلىق ساقتاۋ كوميسسياسىنىڭ مۇشەسى ماحمۇت وزەر قازاقستانداعى سايلاۋدى باسقا ەلدەردەگى سايلاۋ پروتسەستەرىمەن سالىستىرا وتىرىپ، ەكى ەرەكشەلىككە باسا نازار اۋداردى.

ءبىرىنشىسى – بارلىق ازاماتتىڭ داۋىس بەرۋ قۇقىعىن جۇزەگە اسىرۋىنا مۇمكىندىكتىڭ بەرىلۋى. ماسەلەن، دەنساۋلىعىنا بايلانىستى سايلاۋ ۋچاسكەسىنە بارا المايتىن ازاماتتار مەن شەتەلدە جۇرگەن قازاقستاندىقتاردىڭ دا داۋىس بەرۋىنە تولىق جاعداي قاراستىرىلعان. ەكىنشىسى – قازاقستاننىڭ حالىقارالىق باقىلاۋشىلار ءۇشىن اشىق بولۋى.

«داۋىس بەرۋ بارىنشا اشىق ءوتىپ، حالىقارالىق بايقاۋشىلار ءۇشىن سايلاۋ بارىسىن باقىلاۋعا بارلىق جاعداي جاسالدى»، – دەپ تۇيىندەدى وزەر.

Abai.kz