قازاقستان پرەزيدەنتى قاسىم-جومارت توقاەۆ كەلەسى پرەزيدەنتتىك سايلاۋعا قاتىسۋ مۇمكىندىگىن تالقىلاۋ ءالى ەرتە دەپ سانايدى.

«كونستيتۋتسيالىق سوت ءتيىستى شەشىم قابىلدادى، بۇل زاڭدى ءارى تابيعي نارسە (توقاەۆتىڭ قايتا سايلاۋعا تۇسۋگە ءوتىنىم بەرۋ قۇقىعى). مەندە قايتا سايلانۋعا زاڭدى تۇردە قۇقىق بار. ال الداعى سايلاۋعا كەلەتىن بولساق، وعان قاتىسامىن با، جوق پا جانە ول قاي جىلى وتەدى — بۇل تۋرالى تالقىلاۋ ءالى ەرتە. ويتكەنى ءبىز الدىمىزدا تۇرعان كوپتەگەن مىندەتتەردى ورىنداۋىمىز كەرەك»، — دەدى قازاقستان پرەزيدەنتى جەكسەنبى، 23 تامىزدا استاناداعى سايلاۋ ۋچاسكەسىندە تىلشىلەرگە بەرگەن سۇحباتىندا.

«مۇمكىن، كەلەسى جىلى سىزدەرگە ناقتىراق جاۋاپ بەرەرمىن»، — دەپ قوستى توقاەۆ.

سونداي-اق قازاقستان پرەزيدەنتى ءوزىنىڭ باستى جوسپارلارىنىڭ ءبىرى — ەلدى، ەڭ الدىمەن الەۋمەتتىك جوبالار باعىتىندا، «ءىرى قۇرىلىس الاڭىنا» اينالدىرۋ ەكەنىن اتاپ ءوتتى.

«مەن وسى ماقساتتارعا ۇلتتىق قوردى پايدالانۋعا دايىنمىن. اقشانى حالىقتىڭ يگىلىگىنە جۇمساي الاتىن بولساق، ونى شەتەلدە باعالى قاعازداردا ساقتاپ نە ىستەيمىز؟» — دەدى قازاقستان باسشىسى.

سونىمەن بىرگە قازاقستان پرەزيدەنتى الداعى ون كۇن ىشىندە ۆيتسە-پرەزيدەنت لاۋازىمىنا كانديداتتى تاڭداۋعا ۋادە بەردى. ول بۇل لاۋازىمعا كوپشىلىككە تانىمال تۇلعا كەلەتىنىن اتاپ ءوتتى.

«حالىق مەنەن ۆيتسە-پرەزيدەنت تۋرالى ءجيى سۇراپ جاتىر... وسى ءبىر قيىن كەزەڭدە ەلىمىزگە مۇنداي لاۋازىم وتە قاجەت. كەلەسى اپتادا نەمەسە ون كۇن ىشىندە ۆيتسە-پرەزيدەنتتىڭ كىم بولاتىنىن بىلەسىزدەر»، — دەدى توقاەۆ تىلشىلەرگە.

«ءبارى بۇل ورىنعا كىم كەلەدى دەپ سۇراپ جاتىر. قازىر اتىن اتاي المايمىن، بىراق بۇل سىزدەر جاقسى تانيتىن ادام بولادى دەپ ويلايمىن»، — دەپ قوستى پرەزيدەنت.

ەسكە سالساق، 1 شىلدەدە قازاقستاندا رەفەرەندۋم ارقىلى قابىلدانعان جاڭا كونستيتۋتسيا كۇشىنە ەندى. نەگىزگى جاڭالىقتاردىڭ ءبىرى — ۆيتسە-پرەزيدەنت لاۋازىمىن ەنگىزۋ. ەندى پارلامەنت ءبىر پالاتالى بولادى جانە تەك پارتيالىق ءتىزىم بويىنشا سايلاناتىن 145 دەپۋتاتتان تۇراتىن «قۇرىلتاي» دەپ اتالادى.

بۇدان بولەك، قازاقستاننىڭ جوعارى كونسۋلتاتيۆتىك ورگانى — حالىق كەڭەسى قۇرىلىپ، وعان زاڭ شىعارۋ باستاماسى قۇقىعى بەرىلەدى، ال قازاقستان حالقى اسسامبلەياسى تاراتىلادى. جاڭا كونستيتۋتسياعا سايكەس، 1995 جىلعى كونستيتۋتسيا نەگىزىندە اتالعان لاۋازىمداردى اتقارعان تۇلعالار 2026 جىلعى كونستيتۋتسيا كۇشىنە ەنگەننەن كەيىن ءتيىستى قىزمەتتەرگە قايتا سايلانۋعا نەمەسە تاعايىندالۋعا قۇقىلى.

كەرىمسال جۇباتقانوۆ

Abai.kz