قر پرەمەر-ءمينيسترى ولجاس بەكتەنوۆتىڭ توراعالىعىمەن وتكەن الاتاۋ قالاسى كەڭەسىنىڭ وتىرىسىندا مەملەكەت باسشىسىنىڭ Alatau City-ءدى دامىتۋ، ارنايى قۇقىقتىق رەجيمدى ىسكە اسىرۋ، ينفراقۇرىلىمدى جاڭعىرتۋ جانە ينۆەستيتسيا تارتۋ جونىندەگى تاپسىرمالارىنىڭ ورىندالۋ بارىسى قارالدى.

ولجاس بەكتەنوۆ پرەزيدەنت قاسىم-جومارت توقاەۆ بەلگىلەپ بەرگەن Alatau City جوباسىنىڭ ستراتەگيالىق ماڭىزىن اتاپ ءوتىپ، ونىڭ بولاشاقتا ەل دامۋىن ساپالى جاڭا دەڭگەيگە شىعارا الاتىنىن ايتتى.

Alatau City Authority باس اتقارۋشى ديرەكتورى اليشەر ابدىقادىروۆ اتقارىلعان جۇمىستاردىڭ ناتيجەلەرى تۋرالى باياندادى. قازىرگى ۋاقىتتا Alatau City-ءدىڭ ينۆەستيتسيالىق پۋلى 67 جوباعا دەيىن ۇلعايدى. ينۆەستيتسيالاردىڭ جالپى كولەمى شامامەن $6,9 ملرد-تى قۇرايدى جانە 55 مىڭعا جۋىق جۇمىس ورنىن قۇرۋعا مۇمكىندىك بەرەدى. بۇگىندە PepsiCo مەن Sunny Paper جوبالارى بەلسەندى جۇزەگە اسىرىلۋدا. سونداي-اق Mars Petcare KZ, Griffin Logopark, «دانافلەكس» جانە G-Trans Service جوبالارى بويىنشا جۇمىستار باستالدى. Iconic Complex قۇرىلىسىنا دايىندىق جۇرگىزىلىپ، KIND K-Smart Town جوباسىن ىسكە اسىرۋ دامىپ كەلەدى.

جالپى عيماراتتار اۋدانى 5,3 ملن م² بولاتىن، 330 گا اۋماقتى كەشەندى دامىتۋ تۇجىرىمداماسى ازىرلەندى. ماستەر-جوسپار مەن تەو-نى (تەحنيكالىق-ەكونوميكالىق نەگىزدەمەنى) اياقتاۋ 2026 جىلدىڭ سوڭىنا دەيىن جوسپارلانعان.

جاڭا ينۆەستيتسيالاردى تارتۋ جۇمىستارى جالعاسۋدا. سونداي-اق Full Vision Capital, KAIST, CIMC جانە Sinomach جوبالارى پىسىقتالۋدا. بۇعان قوسا، Hyundai Green Food, Lotte Hotels & Resorts, Doosan Enerbility, Korea Airports Corporation جانە Hyundai Motor Company كومپانيالارىمەن جەكەلەگەن ۋاعدالاستىقتارعا قول جەتكىزىلدى.

Alatau Crypto City-ءدى دامىتۋ شەڭبەرىندە قر ۇلتتىق بانكىمەن بىرلەسىپ Tokenization by Default تۇجىرىمداماسى دايىندالدى. جوباعا قاتىسۋعا 43 حالىقارالىق جانە قازاقستاندىق كومپانيا قىزىعۋشىلىق تانىتتى. 2026 جىلدىڭ سوڭىنا دەيىن جالپى كولەمى $10 ملن-عا دەيىنگى توكەنيزاتسيا جوبالارىن ىسكە قوسۋ جوسپارلانۋدا.

ينفراقۇرىلىمعا ەرەكشە كوڭىل ءبولىندى. 26 جوبا قاراستىرىلعان، ونىڭ ىشىندە «كوكپا-1» قوسالقى ستانتسياسىن رەكونسترۋكتسيالاۋ، سۋمەن جابدىقتاۋ جانە سۋ بۇرۋ جۇيەلەرىن دامىتۋ، 61,2 كم اۆتوكولىك جولىنا ورتاشا جوندەۋ جۇرگىزۋ جانە 15 كم جاڭا جول سالۋ بار.

قالانى ودان ءارى دامىتۋ ءۇشىن بيۋدجەتتىك قارجىلاندىرۋ، ءمجا (مەملەكەتتىك-جەكەشەلىك ارىپتەستىك) تەتىكتەرى، جەكە جانە كۆازيمەملەكەتتىك ينۆەستيتسيالاردىڭ ۇيلەسىمى قاراستىرىلعان.

جىل سوڭىنا دەيىن بيزنەستى دامىتۋ، تسيفرلىق اكتيۆتەر جانە باسقا دا باعىتتار بويىنشا قۇجاتتار پاكەتىن قابىلداۋ جوسپارلانىپ وتىر. سونىمەن قاتار ARUP Group پەن BCG كومپانيالارىن تارتا وتىرىپ، قالانى 2040 جىلعا دەيىن دامىتۋدىڭ ستراتەگيالىق ماستەر-جوسپارى جانە 2055 جىلعا دەيىنگى ەگجەي-تەگجەيلى جوسپار دايىندالۋدا.

وتىرىس قورىتىندىسى بويىنشا پرەمەر-مينيستر Alatau City-ءدى دامىتۋدىڭ باستى باعىتتارى بويىنشا جوبالاردىڭ ءىس جۇزىندە ورىندالۋىن جانە بەلگىلەنگەن مەرزىمدەردىڭ قاتاڭ ساقتالۋىن قامتاماسىز ەتۋدى تاپسىردى.

Abai.kz