بيىل ءداستۇرلى «مەرەيلى وتباسى» بايقاۋىنا جەتىسۋ وبلىسىنان 428 وتباسى قاتىسىپ، ءوڭىر وتىنىمدەر سانى بويىنشا رەسپۋبليكادا ەكىنشى ورىنعا يە بولدى. ىرىكتەۋدەن وتكەن 20 وتباسىنىڭ ىشىنەن جۇلدەگەرلەر انىقتالىپ،  ولاردى وبلىس اكىمى بەيبىت يساباەۆ ماراپاتتادى. ولار - ءبىلىم بەرۋ، سپورت، اۋىل شارۋاشىلىعى جانە باسقا دا سالالاردا تابىستى ەڭبەك ەتىپ جۇرگەن اۋلەتتەر.

تالدىقورعانداعى ءى. جانسۇگىروۆ اتىنداعى مادەنيەت سارايىندا وتكەن سالتاناتتى شاراعا جينالعانداردى قۇتتىقتاعان بەيبىت يساباەۆ:

- ەلگە دەگەن سۇيىسپەنشىلىك پەن پاتريوتتىق سەزىم ەڭ الدىمەن ءاربىر شاڭىراقتىڭ بەرەكەسىنەن باستالادى. ەل پرەزيدەنتى  حالىققا ۇسىنعان «ادال ادام – ادال ەڭبەك – ادال تابىس» اتتى ماڭىزدى تۇجىرىمداماسىن ىسكە اسىرۋعا مەرەيلى وتباسىلار بەلسەنە قاتىسۋدا. ءبارىمىزدى بىرىكتىرەتىن ورتاق ۇستانىم – بىرلىك پەن تاتۋلىق، ءوزارا قۇرمەت، ەڭبەكقورلىق، ۇرپاق تاربيەسىنە دەگەن جاۋاپكەرشىلىك. پرەزيدەنتىمىز كەشە تامىز كونفەرەنتسياسىندا ازاماتتارىمىزدىڭ مۇڭعا باتىپ، اپاتيالىق-بويكۇيەزدىككە سالىنباي، العا پروگرەسسكە، ءبىلىم مەن تەحنولوگياعا جارقىن بولاشاققا ۇمتىلۋى كەرەكتىگىن بوسقا ايتقان جوق. بۇگىنگىدەي الەمدەگى الماعايىپ كۇردەلى گەوساياسي كەزەڭدە بىزدەر، اسىرەسە جاستار كوزى اشىق، كوكىرەگى وياۋ، زەردەلى بولعانى كەرەك. ءاربىر وتباسىنىڭ وسىنداي قۇندىلىقتاردى ومىرلىك ۇستانىمعا اينالدىرۋى ماڭىزدى، - دەپ اتاپ وتكەن ءوڭىر باسشىسى جەڭىمپازداردى ماراپاتتاۋ راسىمىنە كوشتى.

«مەرەيلى وتباسى» ۇلتتىق بايقاۋىنىڭ وبلىستىق كەزەڭىنىڭ 1-ورىن جۇلدەسىنە كوكسۋلىق ەركەنوۆتەر يە بولدى. اۋىل شارۋاشىلىعى سالاسىندا ەڭبەك ەتكەن وتاعاسى ءسالىم سەيتبايۇلى كسرو سپورت شەبەرى، قازاق كۇرەسى مەن ەركىن كۇرەستەن بىرنەشە دۇركىن جەڭىمپاز بولعان. ال وتاناسى قاليپان رىسپايقىزى – 10 بالا تاربيەلەگەن «باتىر انا»، «التىن جۇلدىز» جانە «ەڭبەك ارداگەرى» ماراپاتتارىنىڭ يەگەرى. بۇگىندە بۇل اۋلەتتىڭ ۇرپاقتارى مەديتسينا، عىلىم، سپورت، قۇقىق قورعاۋ، ەكونوميكا جانە مەملەكەتتىك قىزمەت سالالارىندا تابىستى ەڭبەك ەتىپ، ەل دامۋىنا ۇلەس قوسىپ كەلەدى. 10 بالا، 26 نەمەرە، 17 شوبەرە تاربيەلەپ وتىرعان ونەگەلى اۋلەت. بۇل رەتتە ەركەنوۆتەر وتباسى «مەرەيلى وتباسى» بايقاۋىنىڭ رەسپۋبليكالىق كەزەڭىندە جەتىسۋ وبلىسىنىڭ نامىسىن قورعايتىن بولادى. بايقاۋدا 2 جانە 3-ورىن ورىن العان پانفيلوۆ اۋدانىنان كەلگەن احمەتجانوۆتار مەن تالدىقورعاندىق جارمۇحامەدوۆتار وتباسى دا – جارتى عاسىر بويى شاڭىراعىنىڭ بەرەكەسىن ۇيىتىپ، سانالى ۇرپاق وربىتكەن اۋلەتتەر. سول سياقتى وبلىس ايماقتارىنان كەلگەن تاعى 7 وتباسى ىنتالاندىرۋ سىيلىقتارىنا يە بولدى.

جەڭىمپازدارعا اقشالاي سەرتيفيكات، ال جۇلدەگەرلەرگە باعالى سىيلىقتار تاپسىرىلدى.

جەڭىمپاز وتباسىلار ءوز پىكىرلەرىن ءبىلدىردى.

- كوكسۋ اۋدانىنىڭ ەڭبەكشىقازاق اۋىلىندا سوناۋ 1960 جىلداردان بەرى تۇرامىز. ءوزىم اۋىل شارۋاشىلىعىندا – قانت قىزىلشاسى القابىندا، ءسۇت زەرتحاناسىندا جۇمىس ىستەدىم. جولداسىم ەكەۋمىز 10 بالا تاربيەلەپ وسىردىك. ەلۋ التى جىل تاتۋ-ءتاتتى وتاستىق، وتاعاسى 75 جاسىندا ومىردەن ءوتتى. شۇكىر، بالالارىمىزدىڭ ءبارى جوعارى ءبىلىم الدى، ءبىر-ءبىر مامان يەسى. بۇگىن ءبىزدىڭ بەرەكەلى شاڭىراعىمىزدى وزگەلەرگە ۇلگى ەتىپ، جۇلدە بەرىپ جاتقاندارىڭىزعا راحمەت ايتامىن. جاس وتباسىلارعا ءبىزدىڭ جولىمىزدى بەرسىن، - دەدى كوپ بالالى انا قاليپان رىسپايقىزى.

- ارينە، ءاربىر وتباسى زامان كوشىنەن قالماي، ۋاقىتپەن بىرگە دامىپ وتىرۋى كەرەك، بالالاردى جاڭا ماشىقتارعا ۇيرەتكەن دە ماڭىزدى. دەگەنمەن ەڭبەككە باۋلۋ، مەيىرىم مەن ءوزارا قامقورلىق، كىشىگە ىزەت، ۇلكەنگە قۇرمەت تاربيەسىن، ۇلتتىق قۇندىلىقتاردى ساقتاعان ءجون. سوندا وتباسى بەرىك تە بەرەكەلى بولادى، - دەيدى جەڭىمپاز بولعان وتباسىنىڭ وتاناسى كۇلعايشا جارمۇحامەدوۆا.

مەرەكەلىك سالتاناتتى شارا كونتسەرتتىك باعدارلامامەن جالعاستى.

اتاپ وتسەك، وبلىستا شاڭىراق كوتەرگەن جاس وتباسىلار سانى جىلدان جىلعا ارتىپ كەلەدى. ماسەلەن، وتكەن جىلى 2 451 جاس وتاۋ قۇرىلسا، بيىلعى التى ايدىڭ وزىندە 1409 وتباسى جاڭا ومىرگە قادام باسقان.

Abai.kz