ەرتەڭ جاڭادان سايلانعان قۇرىلتاي ءوز جۇمىسىن باستايدى. اتالعان قۇرىلتايدىڭ جاڭا تىزىمىندە ەل بىلەتىن، حالىق ءۇشىن جۇمىس ىستەۋگە پەيىل ابزال قۇسپان، ەدىل جاڭبىرشين، قازىبەك يسا، ەرمۇرات باپي سياقتى دەپۋتاتتار جوق ەكەنى بەلگىلى. ءبىز ولارعا جەكە-جەكە حابارلاسىپ، نە ءۇشىن قۇرىلتاي تورىنەن كورىنبەگەنىن سۇراپ، پىكىرىن وقىرمانعا ۇسىنامىز.

ارينە، سايلاۋ بولعاسىن، ونىڭ باسەكەلىك قۋاتى دا جوعارى بولارى انىق. بۇرىن ماجىلىستە جۇمىس ىستەگەن دەپۋتات قازىبەك يسا «نەگە قۇرىلتاي تىزىمىنە ەنبەي قالدى؟» دەگەن زاڭدى سۇراق تۋاتىنى ءسوزسىز.

«نەگە سايلانباي قالدى؟!» دەپ، ەلدىڭ ىزدەپ جاتۋىنىڭ ءمانى زور! «نەگە سايلانادى؟» دەگەننەن قۇداي ساقتاسىن! كەشەگى سايلاۋدا قولداۋ بىلدىرگەن، بۇگىن الەۋمەتتىك جەلىدە ىزدەپ، «قازىبەك يسا قايدا؟» دەپ سۇراپ جاتقان، اق تىلەگىن ايتىپ، قولداپ  جاتقان  ءاربىر ازاماتقا العىسىم زور. سىزدەردىڭ قۇرمەتتەرىڭىز زور قۋات بەرەدى. حالقىمنىڭ قولداۋى مەن ىستىق ىقىلاسى جانە زور سەنىمى – مەن ءۇشىن قانداي مانداتتان دا، مانساپتان دا جوعارى، اللانىڭ ەڭ ۇلكەن سىيى! ويتكەنى، قايدا دا، قاشان دا سول حالقىمنىڭ مۇددەسىن قورعاۋ جولىندا ۇلتقا قىزمەت ەتىپ كەلەمىن.

جاڭا اتا زاڭىمىزعا ساي قازىر ەلىمىزدە جاپپاي  جاڭارۋ ءۇردىسى ءجۇرىپ جاتىر.  «اق جول» پارتياسىنىڭ ەلگە بەلگىلى پارلامەنت دەپۋتاتتارى بولعان ازات پەرۋاشەۆ، قازىبەك يسا، ەرلان بارلىباەۆ، سەرىك ەرۋباەۆ، بەرىك دۇيسەمبينوۆتەر،  ءبىز ەندى جاڭا زاڭ شىعارۋشى ورگان – قۇرىلتاي دەپۋتاتتىعىندا  جاڭا ادامدار مەن جاستارعا قولداۋ جاساپ، ورىن بەردىك. جاڭا تىزىمدە «اق جول» پارتياسى قۇرىلعاننان بەرى ايماقتارداعى فيليالدارىن باسقارىپ، حالىقپەن ارالاسىپ كەلە جاتقان، ەڭبەكپەن شىڭدالعان،  ءوز ىستەرىنىڭ ناعىز ماماندارى رەتىندە تانىلعان لايىقتى ءوڭىر  وكىلدەرى بار. جاڭادان سايلانعان تۇڭعىش  قۇرىلتاي دەپۋتاتتارىن قۇتتىقتايمىز. حالىق الدىنداعى جاۋاپكەرشىلىگى مەن مىندەتى زور ىستە اق جول تىلەيمىز.

مەنىڭ تاۋەلسىز قازاق ەلى ءۇشىن ساياسي جۇمىسىم «اق جول» دەموكراتيالىق پارتياسى توراعاسىنىڭ ورىنباسارى رەتىندە دە، ۇلتشىل قوعام قايراتكەرى، كوسەمسوز ءجۋرناليسى، كوركەمسوز اقىنى رەتىندە  جالعاسا بەرەدى»، - دەيدى ول.

ال  «ماجىلىستەگى جۇمىسىنا قانداي باعا بەرەسىز؟» دەگەن سۇراعىمىزعا ەكس-دەپۋتات بىلاي دەپ جاۋاپ بەردى:

«2007 جىلى العاش رەت پارتيالىق  تىزىممەن سايلانعان پارلامەنت ءماجىلىسى سايلاۋىندا تەك قانا جالعىز «نۇر وتان» پارتياسىن وتكىزگەن ەدى. سول كەزدە ءاليحان بايمەن باسقاراتىن «اق جول» پارتياسى تىزىمىمەن پارلامەنت ءماجىلىسى دەپۋتاتتىعىنا تۇسكەن ءبىز ەل ىشىندە سايلاۋدا كۇرەسىپ ءجۇرىپ، سايلاۋ ۋچاسكەلەرىندە زاڭدى بەلدەن باسقان ايقىن بۇرمالاۋلاردى ءوز كوزىمىزبەن كورگەن ەدىك. مۇنداي زاڭسىزدىققا، ادىلەتسىزدىككە  شىداماي، «قازاق ءۇنى» گازەتىنىڭ 2007 جىلعى 27 تامىزداعى سانىندا: «ەلباسىعا ەل سەنىمى بىتكەن سايلاۋ بولدى: قىرىق ءبىر قيانات» دەگەن تاقىرىپپەن، سايلاۋدا بولعان 41 زاڭسىزدىقتى كورسەتىپ، وتكىر ماقالا جازدىم. كەيىن پارلامەنتتە ەكس-پرەزيدەنتكە بايلانىستى ماسەلەلەر كوتەرگەنىمىزدە («توقسانىنشى جىلدارداعى مۇناي كەلىسىمدەرى نازارباەۆ ءۇشىن زور كەلىسىم بولعانمەن، حالىققا قور كەلىسىم بولدى»، «ەلباسى اتاۋلارىن زاڭداردىڭ بارىنەن الىپ تاستاۋ كەرەك!»، «تاۋەلسىزدىك ورداسى بولعان جوعارعى كەڭەس عيماراتىن وتباسىدان مەملەكەتكە قايتارۋ كەرەك»، «ءتىل تۋرالى زاڭداعى  قاۋقارسىز بەيشارا باپتاردى ەلباسىمەن بىرگە زەينەتكە شىعارىپ جىبەرۋ كەرەك») ماسەلەنىڭ مانىسىنە بارماي، ءماتىندى وقىماي جاتىپ، «بۇرىن نەگە ايتپادىڭ؟» دەپ، شاۋجايىڭا جابىسىپ، شاپىلداي جونەلەتىندەرگە وسى بۇرىنعى، 2007 جىلى ەلباسىنىڭ قىلىشىنان قان تامىپ تۇرعاندا جازىلعان گازەت ماقالاسىنىڭ سكرينىن كورسەتىپ، اۋىزدارىن جاپقان ەدىك.

ال 2004 جىلى وڭتۇستىك قازاقستان وبلىسىنداعى شاردارا، ارىس، وتىرار جانە جەتىساي اۋدانىنىڭ ءبىر بولىگىن قامتىعان ءبىر مانداتتى سايلاۋ وكرۋگىنان بيلىك ۇسىنعان ءماجىلىس دەپۋتاتىمەن بىرگە سايلاۋعا تۇسكەندە، الدىن الا ءادىل ساۋالناما بويىنشا  الدا تۇرعانىمدى كورىپ، وبلىس اكىمدىگى «وتان» پارتياسىنا ءوتۋدى ۇسىندى. مەن باس تارتىپ، سايلاۋدا 83 پايىز ايقىن باسىمدىلىقپەن جەڭىپ تۇرعاندا سايلاۋدان قۇلاتتى. ءبىزدىڭ وكرۋگتىڭ ناتيجەسى وزگە وكرۋگتاردان ءۇش كۇننەن كەيىن جاريالاندى. سول كەزدە «حالىق سايلاسا دا، بيلىك سايلامادى!» دەگەن ماقالام ەلىمىزدىڭ «زاڭ گازەتى»، «جاس الاش» باستاعان ونشاقتى گازەتكە جاريالانعان ەدى…

ال كەشە عانا وتكەن، پارتيا تىزىمىمەن سايلانعان قۇرىلتاي سايلاۋىندا قۇدايعا شۇكىر، بەس پارتيا سايلاندى. ەندى بۇل سايلاۋدىڭ قالاي وتكەنى تۋرالى سايلاۋ ۋچاسكەلەرىندەگى داۋىس بەرۋگە تىكەلەي قاتىسقان باقىلاۋشىلار ايتا جاتار»، - دەيدى ق.ازىبەك يسا.

دايىنداعان دۇيسەنالى الىماقىن

Abai.kz