قازاقستاندا جاز ايلارىندا تەرروريزم مەن ەكسترەميزم ىستەرى بويىنشا 19 ادام سوتتالدى...

2026 جىلدىڭ ماۋسىم-تامىز ايلارىندا قازاقستاندا تەرروريستىك جانە ەكسترەميستىك قىلمىستار ءۇشىن 19 ادام سوتتالدى، دەپ حابارلايدى ۇلتتىق قاۋىپسىزدىك كوميتەتىنىڭ ءباسپاسوز قىزمەتى.

«2026 جىلدىڭ ماۋسىم-تامىز ايلارىندا ۇقك تەرگەگەن قىلمىستىق ىستەر بويىنشا تەرروريستىك جانە ەكسترەميستىك قىلمىستار جاساعانى ءۇشىن 19 ادام ءتۇرلى مەرزىمگە باس بوستاندىعىنان ايىرىلدى»، – دەلىنگەن سارسەنبىدە تاراتقان حابارلامادا.

كوميتەت مالىمەتىنشە، سوتتالعانداردىڭ ءبىرى – الماتى تۋماسى، حالىقارالىق تەرروريستىك ۇيىمداردىڭ قىزمەتىنە قاتىسقانى ءۇشىن 2017 جىلدان بەرى ىزدەۋدە بولعان. ول تۇركيادا انىقتالىپ، 2025 جىلى قازاقستانعا دەپورتاتسيالاندى جانە قىلمىستىق ءىس شەڭبەرىندە قاماۋعا الىندى. سوت ونى سەگىز جىلعا باس بوستاندىعىنان ايىردى.

سونىمەن قاتار سوتتالعان تاعى ءبىر ازامات – شىمكەنت تۇرعىنى الەۋمەتتىك جەلىلەردە تەرروريزم يدەولوگياسىن ناسيحاتتاپ، تانىستارىن زورلىق-زومبىلىق ارەكەتتەرىن جاساۋعا ازعىرعان. ول دەڭگەيلى جازا رەتىندە توعىز جىلعا سوتتالدى.

وسى كەزەڭدە استانا، الماتى، شىمكەنت قالالارىندا، سونداي-اق اقمولا، اقتوبە، الماتى، جامبىل، ماڭعىستاۋ جانە تۇركىستان وبلىستارىندا جەدەل-ىزدەستىرۋ ءىس-شارالارىنىڭ ناتيجەسىندە 28 ادام ۇستالدى.

ۇقك اقپاراتى بويىنشا، ۇستالعاندار تەرروريزمدى ناسيحاتتاۋ، ءدىني الاۋىزدىقتى قوزدىرۋ، ينتەرنەتتە جانە ءوز ورتاسىندا تىيىم سالىنعان ماتەريالداردى تاراتۋ، سونداي-اق ەكسترەميستىك ۇيىمنىڭ قىزمەتىنە قاتىسۋ بويىنشا كۇدىككە ءىلىنىپ وتىر.

قىلمىستىق كودەكستىڭ ءتيىستى باپتارى بويىنشا سوتقا دەيىنگى تەرگەپ-تەكسەرۋ امالدارى جۇرگىزىلۋدە.

قازاقستان رەسپۋبليكاسى قىلمىستىق-پروتسەستىك كودەكسىنىڭ 201-بابى 1-بولىگىنە سايكەس وزگە اقپارات جاريا ەتۋگە جاتپايدى.

Abai.kz