3 قىركۇيەكتە قازاقستاندا قازاقى تازى مەن توبەت كۇنى العاش رەت اتالىپ ءوتىلدى. بۇل داتا 2024 جىلى قازاق تازىسىنىڭ حالىقارالىق كينولوگيالىق فەدەراتسيا (FCI) تاراپىنان الدىن الا تانىلعانتكۇنىنە وراي بەلگىلەندى.

2024 جىلعى 3 قىركۇيەكتە امستەردامدا FCI قازاق تازىسىن الدىن الا تانۋ تۋرالى شەشىم قابىلدادى. تۇقىمعا №372 حالىقارالىق ستاندارت بەكىتىلىپ، قازاقستان ونىڭ شىققان ەلى رەتىندە تانىلدى.

سۋرەت: ەكولوگيا جانە تابيعي رەسۋرستار مينيسترلىگىنەن الىندى.

قازاق تازىسى عاسىرلار بويى حالقىمىزدىڭ تۇرمىس-تىرشىلىگىمەن بىرگە جاساسىپ، ءداستۇرلى اڭشىلىقتا پايدالانىلعان. ۇلتتىق تۇقىمدى ساقتاۋ جانە ونى حالىقارالىق دەڭگەيدە تانىتۋ جۇمىستارى سوڭعى جىلدارى مەملەكەتتىك دەڭگەيدە قولعا الىندى.

2022 جىلى مەملەكەت باسشىسى قاسىم-جومارت توقاەۆ ۇلتتىق تۇقىمدى ساقتاۋ جانە ونى حالىقارالىق دەڭگەيدە تانىتۋ جونىندە مىندەت قويدى. 2023 جىلى وسى باعىتتاعى زاڭنامالىق نەگىز قالىپتاستىرىلدى.

سۋرەت: ەكولوگيا جانە تابيعي رەسۋرستار مينيسترلىگىنەن الىندى.

«تازىنى بۇگىنگى كۇنگە جەتكىزگەن – ونى ۇرپاقتان ۇرپاققا ساقتاپ كەلگەن اڭشىلاردىڭ، سەلەكتسيونەرلەردىڭ، كينولوگتاردىڭ، يت يەلەرى مەن جاناشىر ازاماتتاردىڭ ەڭبەگى. حالىقارالىق دەڭگەيدە تانىلۋ – ۇلكەن ناتيجە. بىراق ءبىزدىڭ جۇمىسىمىز مۇنىمەن اياقتالمايدى. ەڭ باستىسى – تازىنىڭ تۇقىمدىق ەرەكشەلىكتەرىن، گەنەتيكالىق قورىن، تابيعي جانە جۇمىس قاسيەتتەرىن ساقتاپ، كەلەسى ۇرپاققا جەتكىزۋ»، – دەدى قازاقستان رەسپۋبليكاسىنىڭ ەكولوگيا جانە تابيعي رەسۋرستار ءمينيسترى ەرلان نىسانباەۆ.

بۇگىندە قازاقستان كينولوگتار وداعىنىڭ بىرىڭعاي اسىل تۇقىمدىق كىتابىندا ءتورت مىڭعا جۋىق تازى تىركەلگەن. وڭىرلەردە يتتەردىڭ شىعۋ تەگى تۋرالى مالىمەتتەردى جيناۋ، اسىل تۇقىمدىق ەسەپ جۇرگىزۋ جانە تۇقىمدىق قاسيەتتەرىن ساقتاۋ جۇمىستارى جالعاسۋدا.

سۋرەت: ەكولوگيا جانە تابيعي رەسۋرستار مينيسترلىگىنەن الىندى.

قازاق تازىسىن حالىقارالىق دەڭگەيدە تانىتۋ جۇمىستارى دا جالعاسىپ كەلەدى. 2025 جىلى حەلسينكيدە وتكەن دۇنيەجۇزىلىك يتتەر كورمەسىندە تۇقىمنىڭ رەسمي تانىستىرىلىمى ءوتتى. 2026 جىلعى ماۋسىمدا بولونياداعى World Dog Show كورمەسىنە قازاقستاننان 12 تازى قاتىستى.

سونىمەن قاتار جەتىسۋ وبلىسىندا قازاقى يت تۇقىمدارىنىڭ ۇلتتىق ورتالىعىنىڭ عيماراتى سالىنىپ جاتىر. قۇرىلىس دەمەۋشىلەردىڭ قولداۋىمەن، وبلىس اكىمدىگىنىڭ ۇيىمداستىرۋىمەن جۇرگىزىلۋدە.

ورتالىقتا تازا تۇقىمدى يتتەردى ۇستاۋ جانە ءوسىرۋ، ولاردىڭ شىعۋ تەگىن تىركەۋ، بىرىڭعاي تۇقىم-تەگى كىتابىن جۇرگىزۋ، سونداي-اق كينولوگيا سالاسىنداعى مامانداردى دايارلاۋ كوزدەلگەن. مۇندا سىناقتار، كورمەلەر، بايقاۋلار مەن جارىستار دا ۇيىمداستىرىلادى.

سۋرەت: ەكولوگيا جانە تابيعي رەسۋرستار مينيسترلىگىنەن الىندى.

بيىل 20 اقپاندا ۇكىمەت قاۋلىسىمەن قازاقى يت تۇقىمدارىن ساقتاۋ جانە ءوسىمىن مولايتۋ جونىندەگى 2026-2036 جىلدارعا ارنالعان كەشەندى جوسپار بەكىتىلدى. قۇجات الداعى ون جىلدا وسى باعىتتاعى جۇمىستاردى مەملەكەتتىك جانە ۇكىمەتتىك ەمەس ۇيىمداردىڭ قاتىسۋىمەن جالعاستىرۋدى كوزدەيدى.

قازاق تازىسىنىڭ FCI تاراپىنان الدىن الا تانىلۋى – جۇمىستىڭ سوڭعى كەزەڭى ەمەس. الدا تۇقىمنىڭ تۇراقتىلىعىن بىرنەشە بۋىن بويى باقىلاۋ، گەنەتيكالىق الۋاندىعىن، دەنساۋلىعىن جانە وزىنە ءتان تابيعي قاسيەتتەرىن ساقتاۋ مىندەتى تۇر.

3 قىركۇيەك – قازاق تازىسىنىڭ حالىقارالىق دەڭگەيدە تانىلعانىن ايعاقتايتىن عانا ەمەس، ۇلتتىق تۇقىمدى ساقتاپ، كەلەسى ۇرپاققا جەتكىزۋدىڭ ماڭىزىن ەسكە سالاتىن كۇن.

Abai.kz