اۋعانستانداعى تۇڭعىش «قازاق قۇرىلتايى» نەگە ەلشىسىز ءوتتى؟

سۋرەتتەر: ق.ورازۇلىنان الىندى.

اۋعانستاننىڭ مازاري-شاريف قالاسىندا 3 تامىز كۇنى تۇڭعىش رەت «اۋعانستان قازاقتارىنىڭ قۇرىلتايى» ءوتتى.

بۇل تۋرالى Abai.kz اقپاراتتىق پورتالىنىڭ تۇراقتى اۆتورى، قانداستار ماسەلەسى بويىنشا مامان قىدىرالى ورازۇلى حابارلادى.

بۇل قۇرىلتاي «اۋعانستان-قازاق مادەني ورتالىعى» ۇيىمىنىڭ باسشىسى اسادۋللا ويماۋىت اعامىزدىڭ باسشىلىعىمەن ۇيىمداستىرىلعان.

«قۇرىلتايعا اۋعانستاننىڭ ءار ايماعىندا تۇراتىن قانداستارىمىز كەلىپ، ءبىر-بىرىمەن تانىسىپ، ۇمىتىلىپ بارا جاتقان قازاقتىڭ سالت-ءداستۇرى مەن مادەنيەتىن تاماشالاپ، قۋانىشتان كوزدەرىنە جاس الىستى»، - دەيدى قىدىرالى ورازۇلى.

الەۋمەتتىك جەلىگە تاراعان اقپاراتقا سۇيەنسەك، مازاري-شاريفتەگى «قازاق قۇرىلتايىنا» اۋعانستان استاناسى كابۋل قالاسىنان اۋعانستان مادەنيەت ءمينيسترىنىڭ ورىنباسارى ارنايى كەلىپ ءسوز سويلەگەن.

«اۋعانستاننىڭ مادەنيەت ۆيتسە-ءمينيسترى قازاق دياسپوراسىنىڭ دايىنداعان قازاقتىڭ قول-ونەرى مەن مادەنيەتىنە ءتانتى بولىپ، جاساعان جۇمىستارىنا جاعارى باعا بەردى. ودان بولەك مازاري-شاريف قالاسىنىڭ اكىمىنىڭ ورىنباسارى دا قۇرىلتايعا قاتىسىپ، قازاق دياسپوراسىنا قولداۋ كورسەتتى»، - دەيدى قىدىرالى ورازۇلى.

الايدا، قازاقستاننىڭ اۋعانستانداعى ەلشىسى – اقباسوۆ عازيز يساعالىمۇلى مەن باس كونسۋل ەسەنباەۆ احان اسقارۇلى بۇل قۇرىلتايعا كەلەتىنىن حابارلاپ، ءبىر كۇن قالعاندا كەلمەي قالعان ەكەن.

قۇرىلتايدى ۇيىمداستىرۋشىلاردىڭ ايتۋىنشا، 10 كۇن بۇرىن ۇيىم اتىنان جانە قالا اكىمدىگىنىڭ ءمورى باسىلعان شاقىرۋ ەلشىگە ارنايى تابىستالعان. ەلشى اتالعان شاراعا قاتىساتىنىن ايتىپ، ءبىر كۇن قالعاندا حابارلاسىپ، كەلمەيتىنىن ايتقان.

تۇزدىق: اشىق دەرەككوزدەردەگى اقپاراتتارعا جۇگىنسەك، قازىر اۋعانستاندا شامامەن 3,3 مىڭعا جۋىق ەتنيكالىق قازاق ءومىر سۇرۋدە. ال بەيرەسمي دەرەكتەردە، ولاردىڭ سانى 3 مىڭ جانۇياعا دەيىن جەتەتىنى ايتىلادى. قر سىرتقى ىستەر مينيسترلىگى ءوز ەسەبىندە، اۋعانستان اۋماعىندا 15 جانۇيا نەمەسە 200-گە جۋىق ەتنيكالىق قازاق تىركەلگەنىن العا تارتادى. ال ەتنيكالىق قازاقتاردىڭ دەنى مازاري-شاريف، قۇندىز، كابۋل مەن باعلاندا تۇرادى.

الداعى ۋاقىتتا قازاقستاننىڭ اۋعانستانداعى ەلشىلىگى اتالعان جاعدايعا قاتىساتى رەسمي تۇسىندىرمە بەرەدى دەپ كۇتەمىز.

اۋعان قازاقتارى قۇرىلتايىنان فوتوبايان: