قازاقستان حالقى تىلدەرى كۇنىنە وراي گەنت قالاسىنداعى «Qazaq Roots» قازاق مادەني ورتالىعىندا قازاقستاننىڭ بەلگياداعى ەلشىلىگىنىڭ قولداۋىمەن مادەني-اعارتۋشىلىق ءىس-شارا ءوتتى.

كەزدەسۋ فلاندريادا تۇرىپ جاتقان وتانداستارىمىزدىڭ باسىن قوستى، ونىڭ ىشىندە بەلگيالىق وتباسىلار اسىراپ العان بالالار، سونداي-اق قازاقستاننىڭ ءتىلى مەن مادەنيەتىنە قىزىعۋشىلىق تانىتاتىن بەلگيالىقتار قاتىستى. قاتىسۋشىلار قازاق تىلىندە كىتاپتار وقىپ، قازاقستاندىق ادەبيەتپەن تانىستى، ۆيكتورينالار مەن ينتەراكتيۆتى تىلدىك ويىندارعا قاتىستى.

ءىس-شاراعا «كىتاپ وقيتىن ۇلت – چيتايۋششايا ناتسيا» قوعامدىق قورىنىڭ اتقارۋشى ديرەكتورى ايان ساكوشەۆ ونلاين فورماتتا قوسىلىپ، جوبانىڭ ماقساتتارى مەن كىتاپ وقۋ مادەنيەتىن دامىتۋ تۋرالى ايتىپ بەردى.

«ءبىزدىڭ ماقساتىمىز – كىتاپ وقۋدى ءار ءتۇرلى بۋىندى بىرىكتىرەتىن كۇندەلىكتى مادەنيەتتىڭ بولىگىنە اينالدىرۋ. شەتەلدەگى قازاقستاندىقتاردىڭ كىتاپ ارقىلى تۋعان تىلىمەن، مادەنيەتىمەن جانە قازاقستانمەن بايلانىسىن ساقتاپ قالۋى اسا ماڭىزدى»، – دەپ اتاپ ءوتتى ايان ساكوشەۆ.

«كىتاپ وقيتىن ۇلت» جوباسى اياسىندا «Qazaq Roots» كىتاپ قورى قازاقستاندىق جازۋشىلاردىڭ جاڭا باسىلىمدارىمەن تولىقتى، ولار وقۋ جانە كىتاپ الماسۋ ءۇشىن قولجەتىمدى بولادى.

«بەلگيادا ءوسىپ جاتقان بالالارىمىز ءۇشىن قازاق ءتىلى – بۇل تۇبىرلەرىمىزبەن بايلانىس. ءبىز بالالار «Qazaq Roots» ورتالىعىندا تەك ءتىل ۇيرەنىپ قانا قويماي، قازاقشا كىتاپتار وقىپ، قارىم-قاتىناس جاساپ، قازاقستان مادەنيەتىن تەرەڭىرەك بىلسە ەكەن دەيمىز»، – دەدى ورتالىق باسشىسى ماينۋر جۇمانوۆا.

بريۋسسەل مەن گەنت قالالارىندا اشىلعان قازاق مادەني ورتالىقتارىندا قازاق ءتىلىن ۇيرەنگىسى كەلەتىندەردىڭ بارلىعىنا ارنالعان ءتىل كۋرستارى جۇمىس ىستەيدى. ولار وتانداستارعا انا ءتىلىن ساقتاۋعا، ال بەلگيالىقتارعا قازاقستانمەن، ونىڭ مادەنيەتى مەن داستۇرلەرىمەن جاقىنىراق تانىسۋعا كومەكتەسەدى.

ءىس-شارا قازاق ءتىلىن شەتەلدە ناسيحاتتاۋ جانە وقۋ مادەنيەتى مەن قازاقستاندىق ادەبيەتتى دارىپتەۋگە باعىتتالعان «كىتاپ وقيتىن ۇلت» جوباسىن جۇزەگە اسىرۋ جۇمىستارىنىڭ ءبىر بولىگىنە اينالدى.

Abai.kz