قازاقستاندا مال قىستاتۋعا دايىندىق: جەمشوپ دايىنداۋ جوسپارى 80 پايىزعا ورىندالدى.

قازاقستان وڭىرلەرىندە الداعى مال قىستاتۋ ماۋسىمىنا دايىندىق اياسىندا جەمشوپ ازىرلەۋ ناۋقانى قارقىندى ءجۇرىپ جاتىر. بۇگىنگى تاڭدا ەلىمىز بويىنشا 33,1 ميلليون توننا جەمشوپ قورى جينالدى، بۇل بەكىتىلگەن جوسپارلى كولەمنىڭ 80 پايىزىن قۇرايدى.

اۋىل شارۋاشىلىعى مينيسترلىگىنىڭ جەرگىلىكتى اكىمدىكتەردەن العان جەدەل دەرەكتەرىنە سايكەس، دايىندالعان جەمشوپتىڭ قۇرامى تومەندەگىدەي بولىنگەن:

• ءشوپ: 25,3 ملن توننا;

• سابان: 2,5 ملن توننا;

• پىشەندەمە: 2,3 ملن توننا;

• قۇنارلاندىرىلعان جەم (قۇراما جەم): 1,6 ملن توننا;

• سۇرلەم: 1,4 ملن توننا.

جەمشوپ دايىنداۋدان قاي وڭىرلەر كوش باستاپ تۇر؟

رەسپۋبليكا بويىنشا ەڭ جوعارى كورسەتكىش تۇركىستان وبلىسىندا تىركەلدى. ءوڭىر ەڭبەككەرلەرى 5,02 ميلليون توننا جەمشوپ قورىن جيناپ، كوش باسىنا شىقتى.

وزگە ۇزدىك بەستىككە ەنگەن وڭىرلەر:

1. تۇركىستان وبلىسى — 5,02 ملن توننا;

2. جامبىل وبلىسى — 3,25 ملن توننا;

3. الماتى وبلىسى — 3,11 ملن توننا;

4. باتىس قازاقستان وبلىسى — 2,58 ملن توننا;

5. سولتۇستىك قازاقستان وبلىسى — 2,43 ملن توننا.

تەك وسى بەس ءوڭىردىڭ وزىندە 16,4 ميلليون توننادان استام جەمشوپ ازىرلەنگەن. بۇل — ەل بويىنشا جينالعان جالپى كولەمنىڭ تەڭ جارتىسىنا جۋىعى.

توتەنشە جاعدايعا قارسى 201 مىڭ توننا استىق رەزەرۆكە قويىلدى

قىسقى قورادا ۇستاۋ كەزەڭىندە ىقتيمال جەمشوپ تاپشىلىعىنىڭ الدىن الۋ ماقساتىندا ارنايى ساقتاندىرۋ قورى دا قالىپتاستىرىلۋدا. بۇل باعىتتا «ازىق-تۇلىك كەلىسىمشارت كورپوراتسياسى» ۇك» اق 201,3 مىڭ توننا كولەمىندە جەمدىك استىق رەزەرۆىن جيناقتادى. قاجەتتىلىك تۋىنداعان جاعدايدا بۇل قور اۋىل شارۋاشىلىعى تاۋار وندىرۋشىلەرىنە جەمشوپ رەسۋرستارىن ۇزدىكسىز جەتكىزۋگە جۇمسالادى.

اۋىل شارۋاشىلىعى مينيسترلىگى جەرگىلىكتى اكىمدىكتەرمەن بىرلەسىپ، جەمشوپ دايىنداۋ ناۋقانىن تۇراقتى باقىلاۋدا ۇستاپ وتىر. ۆەدومستۆو وكىلدەرىنىڭ ايتۋىنشا، بۇل شارالار مال شارۋاشىلىعى سۋبەكتىلەرىن قاجەتتى ازىقپەن تولىق قامتاماسىز ەتىپ، مال قىستاتۋ ماۋسىمىن شىعىنسىز ءارى قالىپتى وتكىزۋگە مۇمكىندىك بەرەدى.

Abai.kz