قازاقستان مەن ازەربايجان اراسىندا پاروممەن جولاۋشىلار تاسىمالى قايتا جاندانادى. 

قازاقستان ازاماتتارى جاقىن ارادا كاسپي تەڭىزى ارقىلى ازەربايجانعا قايتادان پاروممەن ساپارلاي الادى. بۇل تۋرالى قازاقستاننىڭ ازەربايجانداعى توتەنشە جانە وكىلەتتى ەلشىسى ءالىم بايەل مالىمدەدى.

ەلشىنىڭ ايتۋىنشا، ەكى ەل اراسىنداعى تەڭىز ارقىلى جولاۋشىلار قاتىناسىن قايتا اشۋ باستاماسىن قازاقستان تاراپى ۇسىنعان. باستامانى ازەربايجاندىق ارىپتەستەر قولداپ، قازىرگى ۋاقىتتا ەكى مەملەكەتتىڭ كولىك ۆەدومستۆولارى جوبانى جۇزەگە اسىرۋدىڭ ءتيىستى ۇيىمداستىرۋ-تەحنيكالىق جۇمىستارىنا كىرىسىپ كەتتى.

كاسپي ارقىلى پاروم قاتىناسىنىڭ قايتا اشىلۋى:

• ەكى ەل اراسىنداعى تۋريستىك جانە مادەني-گۋمانيتارلىق بايلانىستاردى ارتتىرادى;

• ترانسكاسپي حالىقارالىق كولىك باعىتىنىڭ (ورتا كوريدور) جولاۋشىلار مەن ازاماتتىق تاسىمال الەۋەتىن كەڭەيتەدى;

• ورتالىق ازيا مەن كاۆكاز ءوڭىرى تۇرعىندارى ءۇشىن بالامالى ءارى قولجەتىمدى ساپارلاۋ باعىتتارىن ۇسىنادى.

ەسكە سالساق، كوروناۆيرۋس پاندەمياسى مەن ەنگىزىلگەن كارانتيندىك شەكتەۋلەرگە بايلانىستى كاسپي ارقىلى جولاۋشىلار تاسىمالى توقتاتىلىپ، سوڭعى جىلدارى پارومدار تەك جۇك تاسىمالداۋ باعىتىندا جۇمىس ىستەپ كەلگەن بولاتىن.

كولىك ۆەدومستۆولارى جۇرگىزىپ جاتقان كەلىسسوزدەر قورىتىندىسى بويىنشا پارومنىڭ ناقتى قاشان قاتىناي باستايتىنى مەن كەستەسى قوسىمشا حابارلانادى.

Abai.kz