2026 جىلعى 15–20 قىركۇيەك ارالىعىندا استانا العاش رەت WTT Star Contender ساناتىنداعى حالىقارالىق ءتۋرنيردى قابىلدايدى. WTT Star Contender Astana 2026 – President’s Cup ۇستەل تەننيسىنەن ءداستۇرلى قازاقستان رەسپۋبليكاسى پرەزيدەنتىنىڭ اشىق كۋبوگى اياسىندا ءوتىپ، الەمنىڭ 18 ەلىنەن 160 سپورتشىنىڭ باسىن قوسادى.

حالىقارالىق ۇستەل تەننيسى كۇنتىزبەسىندەگى ءىرى جارىستاردىڭ ءبىرى جاقسىلىق ۇشكەمپىروۆ اتىنداعى جەكپە-جەك سارايىندا وتەدى. ءتۋرنيردىڭ جالپى جۇلدە قورى - 300 000 اقش دوللارى.

استاناداعى دوداعا الەمدىك ۇستەل تەننيسىنىڭ تاڭداۋلى وكىلدەرى قاتىسادى. جارىسقا ءوتىنىم بەرگەن سپورتشىلار قاتارىندا ۆان يدي (Wang Yidi, قىتاي), الەكسيس لەبرەن (Alexis Lebrun, فرانتسيا), دانگ تسيۋ (Dang Qiu, گەرمانيا), داركو يورگيچ (Darko Jorgic, سلوۆەنيا), دميتري وۆچاروۆ  (Dimitrij Ovtcharov, گەرمانيا), ساتسۋكي ودو (Satsuki Odo, جاپونيا), سونداي-اق ميۋ حيرانو (Miu Hirano, جاپونيا) بار. جەكەلەي سىندا 2015 جىلعى الەم چەمپيوناتىنىڭ كۇمىس جۇلدەگەرى فانگ بو  قازاقستان اتىنان Nomad Table Tennis Academy قۇرامىندا ونەر كورسەتەدى.

وتانداستارىمىز WTT-ءدىڭ ەڭ ءىرى تۋرنيرلەرىندە، الەم چەمپيوناتتارى مەن وليمپيادا ويىندارىندا تۇراقتى ونەر كورسەتىپ جۇرگەن سپورتشىلاردىڭ ويىنىن ءوز كوزىمەن تاماشالاۋعا مۇمكىندىك الادى. ال وتاندىق ويىنشىلار ءۇشىن ءوز الاڭىنداعى Star Contender الەمنىڭ جەتەكشى سپورتشىلارىمەن كەزدەسىپ، وسىنداي دەڭگەيدەگى جارىستىڭ تاجىريبەسىن جيناۋعا جانە حالىقارالىق رەيتينگتىك ۇپايلار يەلەنۋگە جول اشادى.

WTT Star Contender Astana 2026 – President’s Cup World Table Tennis ۇيىمىنىڭ رەسمي حالىقارالىق كۇنتىزبەسىنە ەنگىزىلگەن. ءتۋرنيردىڭ حالىقارالىق قۇقىق يەلەنۋشىسى ءارى ۇيىمداستىرۋشىسى - ITTF اياسىندا جۇمىس ىستەيتىن World Table Tennis (WTT). قازاقستانداعى جارىستى ۇيىمداستىرۋدى Nomad Table Tennis Academy قامتاماسىز ەتەدى.

جارىس بەس ديستسيپلينا بويىنشا وتەدى: ەرلەر مەن ايەلدەر اراسىنداعى جەكەلەي رازرياد، ەرلەر مەن ايەلدەر اراسىنداعى جۇپتىق رازرياد، سونداي-اق ارالاس جۇپتىق رازرياد.

WTT Star Contender تۋرنيرىنىڭ قازاقستان رەسپۋبليكاسى پرەزيدەنتىنىڭ اشىق كۋبوگى اياسىندا وتكىزىلۋى جارىستىڭ دامۋىنداعى جاڭا كەزەڭدى ايقىندايدى. بۇل فورمات قالىپتاسقان قازاقستاندىق سپورت ءداستۇرىن كاسىبي ۇستەل تەننيسىنىڭ جەتەكشى حالىقارالىق سەريالارىنىڭ بىرىمەن توعىستىرادى.

WTT Star Contender Astana 2026 – President’s Cup تۋرنيرىن وتكىزۋ قازاقستاننىڭ الەمدىك ۇستەل تەننيسى كارتاسىنداعى ورنىن نىعايتىپ، وتاندىق سپورتشىلارعا ءوز الاڭىندا الەمنىڭ ۇزدىك ويىنشىلارىمەن تۇراقتى تۇردە باسەكەگە تۇسۋگە مۇمكىندىك بەرەدى.

Abai.kz