الەمگە ايگىلى ءانشى ەنريكە يگلەسياس استانا مەن الماتىدا وتكەن كونتسەرتتەرىنەن كەيىن قازاقستاندىق كورەرمەندەرگە العىس ايتتى.

«تاعى دا راقمەت، قازاقستان، ۇمىتىلماس ەكى كەش ءۇشىن!»، – دەپ جازدى ءانشى Instagram پاراقشاسىندا.

ەنريكە يگلەسياس 3 قىركۇيەكتە استانادا، ال 5 قىركۇيەكتە الماتىدا ونەر كورسەتتى.

سوڭعى جىلدارى قازاقستان ءىرى حالىقارالىق كونتسەرتتەر وتەتىن الاڭداردىڭ بىرىنە اينالىپ كەلەدى. 2025 جىلى الماتىدا شەتەلدىك ورىنداۋشىلاردىڭ 49 كونتسەرتى وتكەن.

Mastercard دەرەكتەرىنە سايكەس، دجەننيفەر لوپەستىڭ كونتسەرتى كەزىندە شەتەلدىك كارتالار ارقىلى جاسالعان شىعىندار 11%-عا، ال «قايرات» – «رەال مادريد» ماتچى كەزىندە 16%-عا ارتقان. شەتەلدىك قوناقتاردىڭ ورتاشا شىعىنى 1,5 مىڭ دوللاردى قۇراعان.

2026 جىلى قازاقستاندا Deep Purple, Megadeth, ريكي مارتين جانە ەنريكە يگلەسياس سىندى الەمدىك ارتىستەر ونەر كورسەتتى. سونداي-اق Cirque du Soleil قويىلىمدارى مەن Park Live فەستيۆالى ءوتتى.

مۇنداي اۋقىمدى شارالار قوناقۇيلەر مەن مەيرامحانالارعا، كولىك جانە باسقا دا قىزمەت تۇرلەرىنە سۇرانىستى ارتتىرىپ، شەتەلدىك تۋريستەردى تارتۋعا ىقپال ەتەدى. وسىلايشا، حالىقارالىق كونتسەرتتەر قازاقستانداعى وقيعالىق ءتۋريزمنىڭ دامۋىنا سەرپىن بەرىپ وتىر.

Abai.kz