ەرلان قارين قازاقستاننىڭ ىشكى ساياساتىنداعى نەگىزگى ءۇش باسىمدىقتى اتادى.

قازاقستاننىڭ ىشكى ساياساتىنداعى نەگىزگى باسىمدىقتار كونستيتۋتسيالىق قۇندىلىقتاردى نىعايتۋعا، جاڭا قوعامدىق ەتيكانى قالىپتاستىرۋعا جانە بولاشاققا ۇمتىلىستى كۇشەيتۋگە باعىتتالۋى ءتيىس. بۇل تۋرالى قر مەملەكەتتىك كەڭەسشىسى ەرلان قارين مالىمدەدى.

مەملەكەتتىك كەڭەسشى ىشكى ساياساتتىڭ وزەكتى ءۇش باسىمدىعى رەتىندە كونستيتۋتسيالىق قۇندىلىقتاردى, جاڭا قوعامدىق ەتيكانى جانە بولاشاققا باعداردى اتاپ ءوتتى.

1. كونستيتۋتسيالىق قۇندىلىقتار

بۇل باسىمدىق پرەزيدەنت قاسىم-جومارت توقاەۆ جۇرگىزىپ جاتقان رەفورمالاردىڭ ستراتەگيالىق باعىتىنىڭ نەگىزىن قۇرايدى.

«بۇل — زاڭ مەن ءتارتىپتىڭ ۇستەمدىگى، جالپىۇلتتىق بىرلىك، ەتنوسارالىق جانە كونفەسسياارالىق كەلىسىم، مادەنيەت پەن ءبىلىم، عىلىم مەن يننوۆاتسيالار، ەڭبەكقورلىق پەن پروگرەسس قۇندىلىقتارى، قورشاعان ورتاعا قامقورلىق، سونداي-اق جاۋاپتى ءارى جاسامپاز پاتريوتيزم. سالالىق ورگاندار پرەزيدەنتتىڭ «قازاقستان رەسپۋبليكاسىنىڭ ىشكى ساياساتىنىڭ نەگىزگى قاعيداتتارىن، قۇندىلىقتارى مەن باعىتتارىن بەكىتۋ تۋرالى» جارلىعىن جانە مەملەكەت باسشىسىنىڭ تاپسىرماسى بويىنشا قابىلدانعان كونستيتۋتسيانى ىلگەرىلەتۋ جونىندەگى ءىس-شارالار جوسپارىن تىڭعىلىقتى ىسكە اسىرۋعا باسا ءمان بەرۋى ءتيىس», — دەدى ەرلان قارين.

ونىڭ ايتۋىنشا، اتا زاڭنىڭ نەگىزگى ەرەجەلەرىن ءتۇسىندىرىپ، كونستيتۋتسيالىق قۇندىلىقتاردى دارىپتەۋگە قاتىستى جۇيەلى ساراپتامالىق-ادىستەمەلىك، اقپاراتتىق جانە مادەني-اعارتۋشىلىق جۇمىستاردى ۇزدىكسىز جۇرگىزۋ قاجەت.

2. جاڭا قوعامدىق ەتيكا

ەكىنشى باسىمدىق قوعامدا پروگرەسسيۆتى نورمالار مەن مىنەز-قۇلىق ۇلگىلەرىن ورنىقتىرۋدى، وزىندىك قۇندىلىقتار نەگىزىن نىعايتۋدى جانە قوعامدىق ءومىردى كەرى تارتۋعا ءارى تاريحي فاكتىلەردى بۇرمالاۋعا باعىتتالعان ارەكەتتەرگە قارسى تۇرۋدى بىلدىرەدى.

جاڭا قوعامدىق ەتيكانى ورنىقتىرۋدا مىناداي نەگىزگى مىندەتتەر جۇكتەلدى:

• «زاڭ جانە ءتارتىپ» قاعيداتىن پراكتيكالىق تۇرعىدا تولىق ىسكە اسىرۋ;

• «تازا قازاقستان» ەكولوگيالىق جوباسىن ساپالى جۇرگىزۋ;

• «ادال ازامات» تاربيە باعدارلاماسىن ءتيىمدى جۇزەگە اسىرۋ.

«جۇمىستىڭ جاڭا تاسىلدەرى مەن فورماتتارى قاجەت. اتاپ ايتقاندا، بىرىڭعاي تسيفرلىق پلاتفورما قۇرۋ، ۇلتتىق تازالىق ستاندارتى مەن وڭىرلەردىڭ تازالىق رەيتينگىن ەنگىزۋ ارقىلى پرەزيدەنتتىڭ «تازا قازاقستان» باستاماسىن كەڭ اۋقىمدا ىسكە اسىرۋ كەرەك», — دەپ اتاپ ءوتتى مەملەكەتتىك كەڭەسشى.

3. بولاشاققا ۇمتىلىس

ءۇشىنشى باسىمدىق — عىلىم مەن ءبىلىم، يننوۆاتسيالار مەن تەحنولوگيالار، سونداي-اق مادەنيەت پەن اعارتۋشىلىق ارقىلى ادام كاپيتالىن دامىتۋعا باسا ءمان بەرۋ.

تۇجىرىمدامالىق باعىت مەملەكەت باسشىسىنىڭ باستاماسىمەن ازىرلەنگەن مىناداي ستراتەگيالىق قۇجاتتاردا ايقىندالعان:

• «قازاقستان بالالارى»

• «وقيتىن ۇلت»

• «Digital Qazaqstan» جانە باسقا دا باعدارلامالار.

ءتۇيىن: باستى ماقسات — بولاشاققا سەنىممەن قارايتىن كۇشتى مەملەكەت پەن پروگرەسسيۆتى قوعام قۇرۋ.

«وسىلايشا، ءۇش باسىمدىقتىڭ بارلىعى دا ءبىز قانداي قوعام قۇرىپ جاتىرمىز جانە قانداي ەلدە ءومىر سۇرەمىز دەگەن باستى سۇراقتارعا جاۋاپ بەرەدى. بۇل ءۇشىن جاسامپاز كۇن ءتارتىبىن قالىپتاستىرىپ، كونستيتۋتسيالىق قۇندىلىقتاردى بەرىك ۇستانۋىمىز كەرەك», — دەپ تۇيىندەدى ءسوزىن ەرلان قارين.

بۇعان دەيىن مەملەكەتتىك كەڭەسشى «ادال ازامات» باعدارلاماسىنىڭ مازمۇنىنا وزگەرىستەر ەنگىزىلىپ جاتقانىن دا حابارلاعان بولاتىن.

Abai.kz