الماتى قالاسىنىڭ اكىمدىگى «الماتى قالاسىنىڭ قازاقستان رەسپۋبليكاسىندا ءتىل ساياساتىن دامىتۋدىڭ 2023–2029 جىلدارعا ارنالعان تۇجىرىمداماسىن ىسكە اسىرۋ جونىندەگى ءىس-قيمىل جوسپارىن بەكىتۋ تۋرالى» قاۋلىسىن ىسكە اسىرۋ ماقساتىندا 2026 جىلدىڭ 22 قىركۇيەگىندە ساعات 15:00-دە قازاق ۇلتتىق قىزدار پەداگوگيكالىق ۋنيۆەرسيتەتىنىڭ «اقشاتىر» الاڭىندا «انا ءتىلىم – ارداعىم» اتتى مەرەكەلىك ءىس-شارا وتكىزەدى.

ءىس-شارانىڭ ماقساتى – انا ءتىلىنىڭ قادىر-قاسيەتىن دارىپتەۋ، قازاق ءتىلىنىڭ كوركەمدىگى مەن ومىرشەڭدىگىن كوپشىلىككە تانىتۋ، مەملەكەتتىك ءتىلدىڭ قوعامدىق ورتاداعى قولدانىسىن كەڭەيتۋ، كوپشىلىكتىڭ انا تىلىنە دەگەن ىقىلاسىن ارتتىرۋ جانە جاستاردى وتانسۇيگىشتىككە تاربيەلەۋ.

مەرەكەلىك ءىس-شاراعا مەملەكەتتىك قىزمەتشىلەر، اقىن-جازۋشىلار، ونەر قايراتكەرلەرى، ۇستازدار، ستۋدەنتتەر، وقۋشىلار، قالا تۇرعىندارى مەن قوناقتارى، سونداي-اق بۇقارالىق اقپارات قۇرالدارىنىڭ وكىلدەرى قاتىسادى.

ءىس-شارا باعدارلاماسى اياسىندا بەلگىلى قوعام قايراتكەرى، ءتىل جاناشىرى، «دوستىق» جانە «پاراسات» وردەندەرىنىڭ يەگەرى اسىلى وسمان، الماتى قالاسى ىشكى ساياسات باسقارماسىنىڭ باسشىسى مەرەي ياگۋداۇلى، قازاق ۇلتتىق قىزدار پەداگوگيكالىق ۋنيۆەرسيتەتى فيلولوگيا ينستيتۋتىنىڭ ديرەكتورى ايگۇل امانتايقىزى جانە احمەتتانۋشى عالىم بيجومارت قاپالبەك ءسوز سويلەيدى.

كەش قوناقتارى قاتارىندا «قارناق» ەتنوانسامبلى، قابدول تىلەكوۆ، نۇرسۇلتان نۇربەرديەۆ جانە باسقا دا ونەرپازدار بار.

ءىس-شارا بارىسىندا انا ءتىلىنىڭ قۇدىرەتى ءان مەن كۇي، جىر مەن بي ارقىلى دارىپتەلەدى. كورەرمەندەرگە انا تىلىنە قاتىستى ينتەراكتيۆتى بولىمدەر ۇسىنىلىپ، بەلسەندى قاتىسۋشىلارعا باعالى سىيلىقتار تابىستالادى. سونىمەن قاتار كونتسەرتتىك باعدارلاما مەن قازاق ءتىلىنىڭ قوعامدىق ومىردەگى ماڭىزىن اشاتىن كوركەم قويىلىمدار ۇسىنىلادى.

Abai.kz