جەتىسۋ وبلىسىندا «تازا قازاقستان» جالپىۇلتتىق باعدارلاماسى اياسىندا دۇنيەجۇزىلىك تازالىق كۇنىنە وراي ۇيىمداستىرىلعان ەكولوگيالىق شارالارعا ءوڭىردىڭ شامامەن 50 مىڭ تۇرعىنى قاتىستى. ەكولوگيالىق اكتسيالاردىڭ قورىتىندىسىندا 9500 كوشەت وتىرعىزىلىپ، 3 مىڭ توننا قوقىس جينالىپ، شىعارىلعان. تالدىقورعان قالاسىنداعى «جاستار» پاركىن تازالاۋ مەن كوشەتتەر وتىرعىزۋعا وبلىس اكىمى بەيبىت يساباەۆ قاتىستى، - دەپ حابارلايدى جەتىسۋ وبلىسى اكىمدىگىنىڭ ءباسپاسوز قىزمەتى.

«جاستار» پاركىندەگى ەكولوگيالىق شاراعا مەملەكەتتىك ورگاندار، ۇيىمدار مەن كاسىپورىنداردىڭ، قوعامدىق بىرلەستىكتەردىڭ وكىلدەرى، كاسىپكەرلەر، جاستار مەن ۆولونتەرلەر بەلسەنە قاتىستى. سەنبىلىك اياسىندا پاركتىڭ اۋماعى تازارتىلىپ، 100 جاپىراقتى اعاش وتىرعىزىلدى. اتاپ وتسەك، سول كۇنى تالدىقورعاندا بارلىعى 1000 كوشەت ەگىلدى.

- پرەزيدەنتتىڭ باستاماسىمەن قولعا الىنعان «تازا قازاقستان» جالپىۇلتتىق باعدارلاماسىنىڭ اياسىندا ەلدى مەكەندەردى اباتتاندىرۋ، كوگالداندىرۋ جۇمىستارىن جۇيەلى اتقارىپ كەلەمىز. سوڭعى ەكى جىلدان بەرى تەك اعاش وتىرعىزۋمەن شەكتەلمەي، تالدىقورعاندا «جاستار» ساياباعى، قاراتالدىڭ جاعالاۋى، «جەڭىس»، «ارداگەرلەر» پاركتەرى اباتتاندىرىپ، بارلىعىنىڭ سۋارۋ جۇيەسى قايتا جاسالۋدا. جالپى العاندا وبلىستىڭ بارلىق اۋدان-قالالارىنداعى پاركتەر مەن سكۆەرلەردى رەتكە كەلتىرىپ جاتىرمىز. كەڭ ماعىناسىندا العاندا، «تازا قازاقستان» باعدارلاماسىنىڭ ماقساتى تەك تابيعاتتىڭ تازالىعى، ساياباقتاردى اباتتاندىرۋ، اعاش وتىرعىزۋ عانا ەمەس، ادامنىڭ جان دۇنيەسىنىڭ تازالىعى، ساناسىنىڭ جاڭعىرۋىنا قول جەتكىزۋ.  ۇجىمدار، اۋلالار، كوشە تۇرعىندارى – بارلىعى بىرىگىپ ءوز ماڭايىن كوركەيتۋگە بەلسەنە اتسالىسىپ جاتىر، ءبىز مۇنداي بەلسەندى ازاماتتاردى ءاردايىم ىنتالاندىرامىز، قولدايمىز. بۇل – قوعامنىڭ جاڭارۋى، - دەدى وبلىس اكىمى بەيبىت يساباەۆ.

سەنبىلىككە قاتىسۋشىلار ءوز پىكىرلەرىن ءبىلدىردى:

- اعاش نەعۇرلىم كوپ بولسا، اۋا سوعۇرلىم تازا بولادى. سوندىقتان مۇنداي شارالارعا قاتىسۋ ماڭىزدى دەپ سانايمىن. اعاش وتىرعىزۋ، ولارعا كۇتىم جاساۋ، تازالىقتى ساقتاۋ ءوزىمىز ءۇشىن كەرەك. ءبارى وزىمىزدەن باستالادى، سوندىقتان ءار ادام ۇلەس قوسۋى ءتيىس. اينالامىز تازا، جاسىل جەلەك بولسا، جان-دۇنيەمىز تىنىش بولادى. بارشاڭىزدى قورشاعان ورتاعا، تۋعان تابيعاتقا جاۋاپكەرشىلىكپەن قاراۋعا شاقىرامىن. تالدىقورعانىمىز گۇلدەگىپ، كوركەيە بەرسىن، - دەدى جاس ەكوۆولونتەر اياجان نۇراحمەتوۆا.

تالدىقورعان قالاسىنىڭ تۇرعىنى جانار بولاتقىزى دا وسىنداي پىكىردە:

- قالادا جاستاردىڭ ەكولوگيالىق جوبالارعا قاتىسقانىنا قۋانامىز. قالانىڭ اۋماقتارىن ءبارىمىز بىرگە رەتكە كەلتىرەمىز. ءبىز جاي عانا تازالاپ قانا قويماي، قالامىزدىڭ ەكولوگيالىق جاعدايىن جاقسارتۋعا ۇلەس قوسىپ جاتىرمىز. تازالىق پەن ءتارتىپتى ءار ازامات ساقتاسا، قالامىز الدەقايدا تازا ءارى جايلى بولادى، - دەگەن ول جەرلەستەرىن ءتۇرلى ەكولوگيالىق شارالارعا بەلسەندى قاتىسۋعا شاقىردى.

اتاپ وتسەك، بيىلدان باستاپ وڭىردە قورشاعان ورتانى قورعاۋ جانە ەكولوگيالىق مادەنيەتتى قالىپتاستىرۋ اياسىندا 181 شارا ۇيىمداستىرىلىپ، وعان 180 مىڭنان استام ادام قاتىستى. سونىڭ ناتيجەسىندە 68 مىڭ كوشەت ەگىلدى، 15 مىڭ توننا قوقىس شىعارىلدى.

Abai.kz