پاريجدە كورنەكتى وپەرا ءانشىسى، كسرو حالىق ءارتىسى ەرمەك سەركەباەۆتىڭ 100 جىلدىعىنا ارنالعان ءىس-شارالار اياسىندا قازاقستان رەسپۋبليكاسىنىڭ مادەنيەت جانە اقپارات ءمينيسترى ارمان قىرىقباەۆ يۋنەسكو-نىڭ باس ديرەكتورى حالەد ءال-انانيمەن كەزدەستى. قازاقستاننىڭ باستاماسىمەن ونەر يەسىنىڭ 100 جىلدىعى 2026 جىلى يۋنەسكو اياسىندا اتاپ وتىلەتىن مەرەيتويلار قاتارىنا ەنگىزىلگەن.

ارمان قىرىقباەۆ وسى باستامانى قولداعانى ءۇشىن يۋنەسكو باسشىلىعى مەن حاتشىلىعىنا العىس ءبىلدىرىپ، ۇيىمنىڭ قازاقستاننىڭ مادەني مۇراسىن ساقتاۋ جانە كەڭىنەن تانىتۋ ىسىنە قوسقان ەلەۋلى ۇلەسىن اتاپ ءوتتى.

كەزدەسۋ بارىسىندا تاراپتار ىنتىماقتاستىقتى ودان ءارى دامىتۋدىڭ باسىم باعىتتارىن، سونىڭ ىشىندە يۋنەسكو-نىڭ بۇكىلالەمدىك مۇرا تىزىمىنە ەنگىزۋگە ۇسىنىلاتىن جاڭا نوميناتسيالاردى ازىرلەۋ ماسەلەسىن تالقىلادى.

قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ باستاماسىمەن ەلىمىز يۋنەسكو-نىڭ بۇكىلالەمدىك مۇرا ورتالىعىنا «جەتىسۋدىڭ كيەلى اعاش ساۋلەت ونەرى: مادەنيەتارالىق ديالوگ پەن ورنىقتىلىق مۇراسى» اتتى سەريالىق نوميناتسيانى الدىن الا باعالاۋ جونىندە سۇراۋ جولدادى. نوميناتسياعا جاركەنت مەشىتى مەن ۆوزنەسەنسك كافەدرالدى سوبورى كىردى.

حالەد ءال-اناني قازاقستان مەن يۋنەسكو اراسىنداعى ىنتىماقتاستىقتى كەڭەيتۋگە مۇمكىندىك مول ەكەنىن ايتتى. تاراپتار يۋنەسكو-نىڭ الماتىداعى وڭىرلىك كەڭسەسىنىڭ قىزمەتىنە جانە ونىڭ ورتالىق ازياداعى ىنتىماقتاستىقتى دامىتۋداعى رولىنە دە ەرەكشە نازار اۋداردى.

ەكىجاقتى كەزدەسۋ اياقتالعاننان كەيىن يۋنەسكو-نىڭ شتاب-پاتەرىندە ەرمەك سەركەباەۆتىڭ 100 جىلدىعىنا ارنالعان «ءداۋىر داۋىسى» گالا-كونتسەرتى ءوتتى. كەشكە يۋنەسكو-نىڭ بۇكىلالەمدىك مۇرا ورتالىعىنىڭ ديرەكتورى لازار ەلۋندۋ اسسومو، ديپلوماتيالىق كورپۋس وكىلدەرى، ءانشىنىڭ تۋعان-تۋىستارى مەن جاقىندارى قاتىستى.

سالتاناتتى كەشتىڭ اشىلۋىندا ارمان قىرىقباەۆ كورنەكتى ءانشىنىڭ شىعارماشىلىق مۇراسى ايرىقشا مانگە يە ەكەنىن اتاپ ءوتتى.

«مەملەكەت باسشىسى قاسىم-جومارت كەمەلۇلى توقاەۆ قازاقستاننىڭ يۋنەسكو-مەن ىقپالداستىعىن ودان ءارى نىعايتۋعا جانە ۇلتتىق مادەني مۇرامىزدى حالىقارالىق دەڭگەيدە كەڭىنەن تانىتۋعا ايرىقشا ءمان بەرەدى. ۇلى ءانشىنىڭ مەرەيتويىن يۋنەسكو تورىندە اتاپ ءوتۋ ءبىز ءۇشىن ۇلكەن مارتەبە. ەرمەك سەركەباەۆ الەمنىڭ ەلۋگە جۋىق ەلىندە ونەر كورسەتتى. ونىڭ داۋىسى فرانتسيا ساحنالارىندا دا ەستىلدى. سوندىقتان بۇگىنگى كەشتى ۇلى ءانشى مەن پاريج كورەرمەنى اراسىنداعى شىعارماشىلىق ۇندەستىكتىڭ جالعاسى دەپ بىلەمىن»، – دەدى مينيستر.

«ءداۋىر داۋىسى» كونتسەرتىنە اباي اتىنداعى قازاق ۇلتتىق وپەرا جانە بالەت تەاترىنىڭ سوليستەرى، حورى مەن سيمفونيالىق وركەسترى قاتىستى. قازاق جانە الەمدىك وپەرا كلاسسيكاسىنىڭ تاڭداۋلى تۋىندىلارى، سونىڭ ىشىندە ەرمەك سەركەباەۆتىڭ رەپەرتۋارىنداعى شىعارمالار ورىندالدى. كەشتە ەرمەك سەركەباەۆتىڭ تۋعان ءىنىسى مۇرات سەركەباەۆتىڭ قىزى، بەلگىلى سكريپكاشى ءجاميلا سەركەباەۆا دا ونەر كورسەتتى.

ءانشىنىڭ 100 جىلدىعىنا ارنالعان كونتسەرت بۇعان دەيىن استانادا دا ءوتتى. مەرەيتويلىق كەشكە قاتىسۋشىلارعا قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ قۇتتىقتاۋ جولدادى. مەملەكەت باسشىسى ەرمەك سەركەباەۆتى ۇلتتىق ونەردىڭ دامۋىنا ولشەۋسىز ۇلەس قوسقان قايتالانباس دارىن يەسى دەپ باعالادى.

Abai.kz