مەملەكەت باسشىسى «تازا قازاقستان» رەسپۋبليكالىق ەكولوگيالىق اكتسياسى اياسىندا جاستارمەن جانە ەكوبەلسەندىلەرمەن بىرگە پرەزيدەنت ساياباعىنىڭ اۋماعىندا اعاش ەكتى.

پرەزيدەنت جاۋاپتى مەملەكەتتىك ورگاندار باسشىلارىنىڭ ەسەبىن تىڭدادى

استانا اكىمى جەڭىس قاسىمبەك ەلوردانى كەشەندى تۇردە كورىكتەندىرۋ مەن كوگالداندىرۋ جۇمىستارى تۋرالى باياندادى.

شاھار باسشىسىنىڭ ايتۋىنشا، سوڭعى جىلدارى استانادا 500-گە جۋىق اۋلا مەن قوعامدىق كەڭىستىك اباتتاندىرىلدى، جىل سوڭىنا دەيىن 170-تەن استام اۋلا مەن قوعامدىق ورىن، سونىڭ ىشىندە پاركتەر، گۇلزارلار مەن بۋلۆارلار رەتكە كەلتىرىلەدى.

مەملەكەت باسشىسىنا ەسىل وزەنىنىڭ بويىندا قوعامدىق جانە رەكرەاتسيالىق كەڭىستىكتەردىڭ بىرىڭعاي جۇيەسى قالىپتاسىپ كەلە جاتقانى تۋرالى مالىمەت بەرىلدى. وسى جۇمىستار اياسىندا قالانىڭ ءتۇرلى بولىگىندەگى پاركتەر، سەرۋەن جانە سپورت اۋماقتارى تۇتاس جاسىل بەلدەۋگە بىرىكتىرىلەدى.

ەكولوگيا جانە تابيعي رەسۋرستار ءمينيسترى الىبەك قۋانتىروۆ مەملەكەت باسشىسىنىڭ «تازا قازاقستان» باستاماسى جۇزەگە اسىرىلا باستاعان كەزدەن بەرى 2 مىڭنان استام ەكولوگيالىق ءىس-شارا ۇيىمداستىرىلعانىن باياندادى. ونىڭ اياسىندا 3,8 ميلليون توننا قوقىس جينالىپ، 10 مىڭداي قوقىس توگەتىن ورىن جويىلعان.

Abai.kz