پاريجدە فرانتسياداعى قازاقستان مادەنيەتى كۇندەرى اياسىندا قر مادەنيەت جانە اقپارات ءمينيسترى ارمان قىرىقباەۆ فرانتسۋز رەسپۋبليكاسىنىڭ مادەنيەت ءمينيسترى كاترين پەگارمەن كەزدەستى.

كەزدەسۋدە مادەني ىنتىماقتاستىقتى ودان ءارى دامىتۋدىڭ باسىم باعىتتارى تالقىلاندى. ارمان قىرىقباەۆ قازاقستان مەن فرانتسيا اراسىنداعى مادەني بايلانىستاردىڭ قارقىندى دامىپ كەلە جاتقانىن ايتتى. ونىڭ سوزىنشە، ەكىجاقتى قارىم-قاتىناستىڭ جوعارى دەڭگەيگە كوتەرىلۋىنە جانە ءوزارا بايلانىستاردىڭ جۇيەلى سيپات الۋىنا قازاقستان مەن فرانتسيا پرەزيدەنتتەرىنىڭ دوستىق پەن سەنىمگە نەگىزدەلگەن قارىم-قاتىناسى ايرىقشا ىقپال ەتىپ وتىر.

مينيستر ەكى ەلدىڭ مادەنيەت مەكەمەلەرى اراسىنداعى بايلانىستى كەڭەيتۋگە جان-جاقتى قولداۋ كورسەتۋگە دايىن ەكەنىن ءبىلدىردى. قازاقستان مەن فرانتسيانىڭ ونەر ۇجىمدارى اراسىندا ءوزارا گاسترولدەر ۇيىمداستىرۋ ماسەلەسىنە ەرەكشە ءمان بەرىلدى.

كاترين پەگار بىرلەسكەن جوبالاردى جۇزەگە اسىرۋعا مۇددەلى ەكەنىن جەتكىزدى. سونداي-اق ەكى ەل ماماندارىنا ارنالعان وقۋ باعدارلامالارىن، تاعىلىمدامالار مەن ءوزارا شەبەرلىك ساباقتارىن ۇيىمداستىرۋ ماسەلەلەرى ءسوز بولدى.

فرانتسياعا جۇمىس ساپارى بارىسىندا ارمان قىرىقباەۆ لۋۆر مۋزەيىنىڭ پرەزيدەنتى كريستوف لەريبومەن دە كەزدەستى. تاراپتار لۋۆر قورىنداعى جادىگەرلەر كورمەسىن قازاقستاندا ۇيىمداستىرۋ مۇمكىندىگىن جانە مۋزەي سالاسىنداعى وزگە دە بىرلەسكەن جوبالاردى جۇزەگە اسىرۋ جولدارىن تالقىلادى.

فرانتسياداعى قازاقستان مادەنيەتى كۇندەرىنىڭ باعدارلاماسى اياسىندا قازاقستان كينوسى كۇندەرى جانە برانلي جاعالاۋىنداعى جاك شيراك مۋزەيىندە «قازاقستان – فرانتسيا: مادەني ديالوگتان بىرلەسكەن جوبالارعا» اتتى دوڭگەلەك ۇستەل ءوتتى. مادەنيەت كۇندەردىڭ باستى وقيعاسى – پاريجدەگى «ماريني» تەاترىندا ۇيىمداستىرىلعان قازاقستان ونەر شەبەرلەرىنىڭ گالا-كونتسەرتى.

كونتسەرتتىڭ اشىلۋىندا ارمان قىرىقباەۆ قازاقستان مەن فرانتسيا اراسىنداعى قارىم-قاتىناستىڭ تۇراقتى دامىپ كەلە جاتقانىن جانە ەكى حالىقتى جاقىنداستىرۋداعى مادەنيەتتىڭ ايرىقشا ءرولىن اتاپ ءوتتى.

«بۇگىندە قازاقستان مەن فرانتسيا اراسىنداعى قارىم-قاتىناس نىعايتىلعان ستراتەگيالىق ارىپتەستىك رۋحىندا قارقىندى دامىپ كەلەدى. قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ 2024 جىلى فرانتسياعا جاساعان مەملەكەتتىك ساپارى جانە فرانتسيا پرەزيدەنتى ەممانيۋەل ماكروننىڭ 2023 جىلى قازاقستانعا ساپارى ەكىجاقتى ىنتىماقتاستىققا تىڭ سەرپىن بەردى. بۇگىنگى گالا-كونتسەرت حالىقتارىمىز اراسىنداعى دوستىقتى نىعايتۋعا ۇلەس قوساتىن تاعى ءبىر ماڭىزدى قادام بولارىنا سەنىمدىمىن»، – دەدى مينيستر.

گالا-كونتسەرت فرانتسۋز كورەرمەنىنە قازاق مۋزىكاسى مەن حورەوگرافيا ونەرىنىڭ بايلىعى مەن سان قىرلىلىعىن تانىتتى. ساحنادا قازاقتىڭ ءداستۇرلى اندەرى مەن كۇيلەرى، سونداي-اق زاماناۋي تۋىندىلار ورىندالدى.

كونتسەرتتە الىشەر كارىموۆ، زارينا التىنباەۆا، ەرنار سادىرباي (Amre), ەلدار ساپاراەۆ، راسۋل جارماعامبەتوۆ، فارحات كۋبيەۆ، نازىم ساعىنتاي، «استانا بالەت» تەاترى، HasSak ەتنوفولكلورلىق ءانسامبلى جانە Mezzo توبى ونەر كورسەتتى. ونەرپازداردى قۇرمانعازى اتىنداعى قازاق ۇلتتىق حالىق اسپاپتار وركەسترى سۇيەمەلدەدى.

Abai.kz