الماتى – تابيعاتى مەن زاماناۋي قالالىق ينفراقۇرىلىمى ۇيلەسكەن بىرەگەي مەگاپوليس. قالانىڭ باستى ارتىقشىلىقتارىنىڭ ءبىرى – ىلە الاتاۋىنىڭ ەتەگىندە ورنالاسۋى. وسى تابيعي الەۋەتتى ءتيىمدى پايدالانۋ جانە ءتۋريزمدى جاڭا دەڭگەيگە كوتەرۋ ماقساتىندا الماتىنىڭ تاۋ كلاستەرىن دامىتۋعا ەرەكشە ءمان بەرىلىپ وتىر.

تاۋ كلاستەرىن قالىپتاستىرۋ – جەكەلەگەن تۋريستىك نىسانداردى سالۋمەن شەكتەلمەيتىن كەشەندى باعىت. ونىڭ اياسىندا تاۋ ءتۋريزمى، قىسقى جانە جازعى سپورت تۇرلەرى، ەكوتۋريزم، رەكرەاتسيا، كولىك جانە ينجەنەرلىك ينفراقۇرىلىم، سونداي-اق تۋريستىك سەرۆيس ءبىرتۇتاس جۇيە رەتىندە دامىتىلادى.

وسى باعىتتاعى ماڭىزدى جوبالاردىڭ ءبىرى – Almaty Superski. جوبا الماتىنىڭ تاۋ كلاستەرىن حالىقارالىق دەڭگەيدەگى تۋريستىك جانە سپورتتىق ورتالىققا اينالدىرۋعا باعىتتالعان. ونىڭ ىسكە اسۋى تاۋ بوكتەرىندەگى اۋماقتاردىڭ تۋريستىك الەۋەتىن كەڭەيتىپ، قىسقى سپورتپەن قاتار، جازعى تاۋ ءتۋريزمىن دە دامىتۋعا مۇمكىندىك بەرەدى.

Almaty Superski اياسىنداعى ينفراقۇرىلىمنىڭ دامۋى تاۋ شاڭعىسى سپورتىنا عانا ەمەس، جىل بويى دەمالىس پەن بەلسەندى تۋريزمگە جاڭا مۇمكىندىكتەر قالىپتاستىرۋعا باعىتتالادى. جاياۋ جانە ۆەلومارشرۋتتار، تاۋ باعىتتارى، رەكرەاتسيالىق كەڭىستىكتەر جانە باسقا دا تۋريستىك قىزمەت تۇرلەرىن دامىتۋ ارقىلى الماتى تاۋلارى ءتورت ماۋسىمدا دا كەلۋشىلەر ءۇشىن تارتىمدى ورىنعا اينالا الادى.

جوبانىڭ تاعى ءبىر ماڭىزدى قىرى – كولىك قولجەتىمدىلىگى مەن تۋريستىك ينفراقۇرىلىمدى جەتىلدىرۋ. تاۋلى ايماقتارعا قولايلى ءارى قاۋىپسىز جەتۋ مۇمكىندىگىن قامتاماسىز ەتۋ، اسپالى جولدار مەن تۋريستىك نىسانداردى دامىتۋ، ينجەنەرلىك ينفراقۇرىلىمدى جاڭعىرتۋ تۋريستىك اعىننىڭ وسۋىنە جاعداي جاسايدى.

تاۋ كلاستەرىن دامىتۋ كەزىندە ەكولوگيالىق قاۋىپسىزدىككە ەرەكشە كوڭىل ءبولىنۋى ءتيىس. ىلە الاتاۋى – تابيعي مۇرا عانا ەمەس، الماتىنىڭ ەكولوگيالىق تەپە-تەڭدىگى ءۇشىن ماڭىزدى اۋماق. سوندىقتان ينفراقۇرىلىمدىق جوبالاردى ىسكە اسىرۋ بارىسىندا تابيعي لاندشافتتى ساقتاۋ، رەكرەاتسيالىق جۇكتەمەنى رەتتەۋ جانە قورشاعان ورتاعا اسەردى بارىنشا ازايتۋ نەگىزگى قاعيداتتاردىڭ ءبىرى بولۋى قاجەت.

Almaty Superski جوباسىنىڭ جۇزەگە اسۋى جاڭا ەكونوميكالىق مۇمكىندىكتەرگە دە جول اشادى. تۋريستەر سانىنىڭ ارتۋى قوناقۇي بيزنەسى، قوعامدىق تاماقتانۋ، كولىك، سپورتتىق قىزمەتتەر جانە باسقا دا سەرۆيستىك سالالاردىڭ دامۋىنا سەرپىن بەرەدى. سونىمەن قاتار شاعىن جانە ورتا بيزنەس ءۇشىن جاڭا مۇمكىندىكتەر مەن جۇمىس ورىندارى پايدا بولادى.

تاۋ كلاستەرىنىڭ دامۋى الماتى تۇرعىندارى ءۇشىن دە ماڭىزدى. زاماناۋي سپورتتىق جانە رەكرەاتسيالىق ينفراقۇرىلىم قالا تۇرعىندارىنىڭ بەلسەندى دەمالىسىنا، بۇقارالىق سپورتتىڭ دامۋىنا جانە سالاۋاتتى ءومىر سالتىن قالىپتاستىرۋعا مۇمكىندىك بەرەدى. اسىرەسە بالالار مەن جاستاردى قىسقى جانە تاۋ سپورتتارىنا تارتۋ ءۇشىن جاڭا جاعدايلار قالىپتاسادى.

الماتىنىڭ تاۋ كلاستەرى – قالانىڭ تۋريستىك الەۋەتىن ارتتىراتىن عانا ەمەس، ەكونوميكانىڭ جاڭا باعىتتارىن قالىپتاستىراتىن ۇزاق مەرزىمدى جوبا. ال Almaty Superski وسى ەكوجۇيەنىڭ ماڭىزدى ەلەمەنتتەرىنىڭ ءبىرى رەتىندە الماتىنىڭ تاۋلارىن جىل بويى قولجەتىمدى ءارى تارتىمدى تۋريستىك كەڭىستىككە اينالدىرۋعا باعىتتالعان.

باستى ماقسات – تابيعي مۇرانى ساقتاي وتىرىپ، زاماناۋي ينفراقۇرىلىم مەن ساپالى سەرۆيستى قالىپتاستىرۋ. بۇل الماتىنىڭ حالىقارالىق تاۋ ءتۋريزمى كارتاسىنداعى ورنىن نىعايتىپ، قالانىڭ جاڭا تۋريستىك مۇمكىندىكتەرىن اشۋعا ىقپال ەتەدى.

Abai.kz