كەز كەلگەن ادام ءبىر اپتادان كەيىن سىنىپ قالعان زاتتى ساتىپ العان بولۋى مۇمكىن. نە بولماسا اقىسىن تولەسە دە تيىسىنشە قىزمەتتى الا الماعان جاعدايعا تاپ كەلىپ جاتادى. قۇرىلتاي دەپۋتاتى نيكيتا شاتالوۆتىڭ ايتۋىنشا، تەك وتكەن جىلدىڭ وزىندە وسىنداي وقيعاعا بايلانىستى 80 مىڭنان استام ءوتىنىش تۇسكەن.

ول مەملەكەت باسشىسىنىڭ تاپسىرماسى بويىنشا دەپۋتاتتار ازىرلەگەن تۇتىنۋشىلاردىڭ قۇقىقتارىن قورعاۋ تۋرالى زاڭ جوباسى جونىندەگى جۇمىس توبىنا جەتەكشىلىك ەتەدى.

تۇتىنۋشىلار مەن كاسىپكەرلەر ءۇشىن نە وزگەرەدى؟

بىرىنشىدەن، بىرىڭعاي بازالىق قورعاۋ دەڭگەيى ەنگىزىلەدى. بۇعان دەيىن زاڭ نەگىزىنەن تاۋار ساتىپ الۋعا قاتىستى بولسا، ەندى ءدال وسىنداي تالاپتار جۇمىستار مەن كورسەتىلەتىن قىزمەتتەرگە قاتىستى دا قولدانىلادى.

ەكىنشىدەن، ساتىپ الۋشىنىڭ قۇقىعىن شەكتەيتىن شارت تالاپتارىنىڭ كۇشى بولمايدى. ورىنداۋشى ءوزىن بارلىق جاۋاپكەرشىلىكتەن الدىن الا بوساتىپ قويعان، ۇساق قارىپپەن جازىلعان تالاپتار نەمەسە چەكتىڭ جوعالۋى ەندى جوسىقسىز ساتۋشىنى جاۋاپكەرشىلىكتەن قۇتقارمايدى.

ۇشىنشىدەن، تۇتىنۋشىلار قۇقىعى جونىندەگى ومبۋدسمەن پايدا بولادى. ومبۋدسمەن ازاماتتارعا كەڭەس بەرەدى، ورتاق ماسەلەلەردى كوتەرىپ، ولاردى مەملەكەتتىك ورگانداردىڭ نازارىنا ۇسىنادى، نارىقتىڭ جۇمىس ىستەۋ قاعيدالارىن ازىرلەۋگە قاتىسادى جانە تۇتىنۋشىلاردىڭ مۇددەسىن سوتتا ءوزى قورعاي الادى.

تورتىنشىدەن، ەگەر ساتۋشى ماسەلەنى بىردەن شەشە الاتىن بولسا، بىراق ءىستى بارلىق كەزەڭنەن وتكىزىپ، سوتقا دەيىن جەتكىزسە، ساتىپ الۋشىنىڭ پايداسىنا ايىپپۇل تولەيدى.

نيكيتا شاتالوۆتىڭ ايتۋىنشا، جاڭا زاڭنىڭ نەگىزگى ءمانى تەپە-تەڭدىكتى ساقتاۋ. ازامات ناقتى قورعانىسقا يە بولۋى كەرەك، ال ادال كاسىپكەرگە تۇسىنىكتى ەرەجەلەر مەن ارتىق قىسىمنىڭ بولماۋى قامتاماسىز ەتىلۋگە ءتيىس.

زاڭ جوباسى بويىنشا جۇمىس ساراپشىلارمەن، بيزنەس وكىلدەرىمەن جانە تۇتىنۋشىلار قۇقىعىن قورعاۋ ۇيىمدارىمەن بىرلەسىپ جالعاسىپ جاتىر.

Abai.kz