جەتىسۋ وبلىسىندا ەڭبەك كۇنىنە ارنالعان سالتاناتتى ءىس-شارا ءوتىپ، وندا قۇرىلىسشىلارعا، اۋىل شارۋاشىلىعى ماماندارىنا، دارىگەرلەر مەن پەداگوگتەرگە، تۇرعىن ءۇي-كوممۋنالدىق شارۋاشىلىعىنىڭ ماماندارىنا، ۆەتەرينارلارعا، سپورتشىلار مەن الەۋمەتتىك قىزمەتكەرلەرگە، جۋرناليستەرگە جانە باسقا دا سالانىڭ وكىلدەرىنە قۇرمەت كورسەتىلدى. مەرەكەدە ولاردىڭ كوپ جىلعى ەڭبەك ءوتىلى، جاۋاپكەرشىلىگى مەن ءوز ىسىنە دەگەن ادالدىعى باعالاندى, – دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.

ءوڭىر باسشىسىنىڭ اتىنان جينالعانداردى وبلىس اكىمىنىڭ ورىنباسارى مارلەن كولباەۆ قۇتتىقتادى.

– مەملەكەت باسشىسى قاسىم-جومارت توقاەۆ: «ادال ءارى تاباندى ەڭبەگىمەن جەتىستىككە جەتكەن ادامدار ءاردايىم قۇرمەت پەن قوشەمەتكە يە بولۋى كەرەك. «ادال ادام – ادال ەڭبەك – ادال تابىس» – ءبىر-بىرىنەن اجىرامايتىن ۇعىمدار»، – دەپ اتاپ وتكەن بولاتىن. جەتىسۋ – الەۋەتى زور، ونەركاسىبى دامىعان، اۋىل شارۋاشىلىعى قارقىندى وركەندەپ كەلە جاتقان ءوڭىر. بۇگىن ءبىز كۇندەلىكتى ەڭبەگىمەن وبلىستىڭ دامۋىنا ۇلەس قوسىپ جۇرگەن جاندارعا بىرگە قۇرمەت كورسەتەمىز، – دەگەن ول ءارى قاراي ماراپاتتاۋ راسىمىنە كوشتى.

ءىس-شارا اياسىندا ەكونوميكانىڭ ءتۇرلى سالالارىندا 20-50 جىل ارالىعىندا ەڭبەك ەتىپ كەلە جاتقان، كوپ جىلعى ەڭبەك ءوتىلى بار ماماندار ماراپاتتالدى. ولاردىڭ قاتارىندا اۋىل شارۋاشىلىعى، ۆەتەريناريا، قۇرىلىس، تۇرعىن ءۇي-كوممۋنالدىق شارۋاشىلىعى، الەۋمەتتىك سالا، سپورت، ازاماتتىق قورعاۋ جانە قوعامدىق قاۋىپسىزدىك سالالارىنىڭ، سونداي-اق باسقا دا سالالاردىڭ وكىلدەرى بار.

سونىمەن قاتار «ەڭبەك جولى» وڭىرلىك بايقاۋىنىڭ جەڭىمپازدارى دا ەرەكشە اتالىپ ءوتتى. «ۇزدىك ەڭبەك اۋلەتى» نوميناتسياسىندا بىرنەشە بۋىن ۇرپاعى ءوز ءومىرىن سپورت سالاسىنىڭ دامۋىنا ارناعان قوجاحمەتوۆتەر وتباسى ماراپاتقا يە بولدى. «جۇمىس ىستەيتىن جاستاردىڭ ۇزدىك تالىمگەرى» نوميناتسياسىندا 24 جىلدىق ەڭبەك ءوتىلى بار، 100-دەن استام شاكىرت تاربيەلەگەن ەلتاي ورتا مەكتەبىنىڭ باستاۋىش سىنىپ مۇعالىمى گۇلمايرا قىدىرباەۆا ۇزدىك دەپ تانىلدى. ال «ءوندىرىستىڭ ۇزدىك جاس مامانى» نوميناتسياسىندا تەكەلى تاۋ-كەن بايىتۋ كەشەنىنىڭ جەتەكشى ينجەنەرى، جوبالاۋشى مەرەي دۋبەكوۆ جەڭىمپاز اتاندى.

بۇل كۇنى ەڭبەك ارداگەرلەرىنە دە ەرەكشە العىس ايتىلدى. سونداي-اق بىرقاتار ماماندار «ەڭبەك ادامى» توسبەلگىسىمەن جانە «ادىلەت» پارتياسىنىڭ العىس حاتتارىمەن ماراپاتتالدى.

ءىس-شارا سوڭىندا ەڭبەك ارداگەرلەرى ارىپتەستەرى مەن جاس ماماندارعا ىزگى تىلەكتەرىن جەتكىزدى. بۇدان سوڭ مەرەكەلىك كونتسەرتتىك باعدارلاما ۇسىنىلدى.

ماراپاتتالعاندار ءوز پىكىرلەرىن ءبىلدىردى. ولاردىڭ قاتارىندا «ۇزدىك ەڭبەك اۋلەتى» نوميناتسياسىنىڭ جەڭىمپازى، ۇزاق جىلدار بويى سپورت سالاسىنىڭ دامۋىنا ۇلەس قوسىپ كەلە جاتقان قوجاحمەتوۆتەر وتباسى دا بار.

– مەن بۇل سالادا 41 جىلدان بەرى ەڭبەك ەتىپ كەلەمىن. جوعارى ساناتتى جاتتىقتىرۋشىمىن، حالىقارالىق تورەشىمىن، سامبودان قازاقستان رەسپۋبليكاسىنىڭ ەڭبەك سىڭىرگەن جاتتىقتىرۋشىسىمىن. جۇبايىم كۇلنار سپورت سالاسىندا جۇرگەنىنە 39 جىل بولدى، جەڭىل اتلەتيكادان سپورت شەبەرلىگىنە كانديدات. قىزدارىم ايمان مەن شولپان لوندون جانە توكيو وليمپيادا ويىندارىنا قاتىستى، حالىقارالىق دارەجەدەگى سپورت شەبەرى، ازيا چەمپيوندارى. قاي سالادا بولماسىن جەتىستىككە جەتۋ ءۇشىن تاباندىلىق پەن شىدامدىلىق قاجەت. سونىمەن قاتار ءار ءىستى سوڭىنا دەيىن مەڭگەرۋگە ۇمتىلۋ كەرەك، – دەيدى وتاعاسى بولات قوجاحمەتوۆ.

اۋىل شارۋاشىلىعى سالاسىندا 45 جىلدان بەرى ەڭبەك ەتىپ كەلە جاتقان شارۋا قوجالىعىنىڭ باسشىسى سۇندەتباي ەسجانوۆ تا وي ءبولىستى:

– مەن ءىسىمدى باستاعان كەزدە بار بولعانى ءۇش سيىرىم بولدى، قازىر ەكى وتار قويىم، 50-60 باس ءىرى قارام بار. ءاردايىم ەڭبەك ەتۋدەن شارشاماۋ كەرەك. قازىر جاسىم 70-كە تايادى، بىراق ءالى دە جۇمىس ىستەپ كەلەمىن، مالدىڭ كۇتىمىن كۇن-ءتۇن دەمەي جاسايمىن. ەڭبەك ەتسەڭ، جەمىسىن جەيسىڭ. ال ادال ەڭبەك ەتپەي، بەرەكە  كىرمەيدى، - دەدى ول.

«تەكەلى تاۋ-كەن بايىتۋ كەشەنى» وندىرىسىندە ءتورتىنشى جىل جوبالاۋشى بولىپ جۇمىس ىستەپ جۇرگەن جاس مامان مەرەي دۋبەكوۆ تە وسىنداي ويدا:

– ەڭبەك ارداگەرلەرىمەن قاتار مەنىڭ دە ەڭبەگىمنىڭ جوعارى باعالانعانى، ارينە، قۋانتادى. ادال ەڭبەك، كاسىبيلىك، جاۋاپكەرشىلىك، وعان قوسا ۇرپاقتار ساباقتاستىعى ارقىلى جەتىسۋدىڭ ودان ءارى الەۋمەتتىك-ەكونوميكالىق دامۋىنا ۇلەس قوسامىز دەپ سەنەمىن، – دەدى ول.

وسىلايشا، ەڭبەك كۇنىنە ارنالعان سالتاناتتى ءىس-شارا ءاربىر كاسىپورىننىڭ، مەكەمەنىڭ، سالانىڭ، جالپى تۇتاس ءوڭىردىڭ دامۋىندا ەڭبەك ادامدارىنىڭ كۇندەلىكتى ادال دا ابىرويلى ەڭبەگى تۇرعانىن تاعى ءبىر مارتە كورسەتكەن تاعىلىمدى مەرەكە بولدى.

Abai.kz