ماڭعىستاۋ وبلىسىندا اسكەري جاتتىعۋ بارىسىندا سوققان كۇشتى تولقىن 19 اسكەري قىزمەتشىنى تەڭىزگە اعىزىپ اكەتتى.

وقيعا قازاقستان رەسپۋبليكاسى قارۋلى كۇشتەرى اسكەري-تەڭىز كۇشتەرىنىڭ جاتتىعۋلارى اياسىندا وقۋ-جاۋىنگەرلىك تاپسىرمانى ورىنداۋ كەزىندە بولعان. قايعىلى وقيعا اۋا رايىنىڭ كەنەتتەن ناشارلاۋى مەن جەلدىڭ كۇشەيۋى سالدارىنان ورىن الدى. الدىن الا مالىمەتتەر بويىنشا، 19 اسكەري قىزمەتشىنىڭ 9-ى قازا تاۋىپ، تاعى ۇشەۋى قۇتقارىلدى. قالعان اسكەري قىزمەتشىلەردى ىزدەۋ جۇمىستارى جالعاسۋدا.

وقيعا ورنىنا جەدەل تۇردە قۇتقارۋ قىزمەتتەرىنىڭ كۇشتەرى مەن قۇرالدارى باعىتتالدى. ىزدەستىرۋ-قۇتقارۋ وپەراتسياسىنا اسكەري-تەڭىز كۇشتەرىنىڭ بولىمشەلەرى، تجم قىزمەتكەرلەرى، اۆياتسيا جانە باسقا دا ءتيىستى قىزمەتتەر قاتىسۋدا. وقيعانىڭ بارلىق ءمان-جايىن انىقتاۋ جانە ىزدەستىرۋ-قۇتقارۋ جۇمىستارىن ۇيلەستىرۋ ءۇشىن وقيعا ورنىنا قازاقستان رەسپۋبليكاسى قورعانىس مينيسترلىگىنىڭ كوميسسياسى جىبەرىلدى.

«اقتاۋ گارنيزونىنداعى جاتتىعۋلار كەزىندە اسكەري قىزمەتشىلەردىڭ قازا بولۋ فاكتىسى بويىنشا قىلمىستىق ءىس قوزعالىپ، تەرگەلۋدە. جەدەل-تەرگەۋ توبى قۇرىلدى. وقيعا ورنىندا ءىىم، تجم جانە پروكۋراتۋرا قىزمەتكەرلەرى ءجۇر. بولعان وقيعانىڭ بارلىق ءمان-جايىن جان-جاقتى، تولىق ءارى وبەكتيۆتى انىقتاۋعا باعىتتالعان تەرگەۋ ارەكەتتەرىنىڭ كەشەنى جۇرگىزىلۋدە. قاجەتتى سوت ساراپتامالارى تاعايىندالدى. تەرگەۋ بارىسى ەرەكشە باقىلاۋدا»، — دەلىنگەن بەيسەنبىدە تارالعان حابارلامادا.

رەسمي حابارلاما

24 قىركۇەيك كۇنى ماڭعىستاۋ وبلىسىندا قازاقستان رەسپۋبليكاسى قارۋلى كۇشتەرى اسكەري-تەڭىز كۇشتەرىنىڭ وقۋ-جاتتىعۋى كەزىندە كاسپي تەڭىزىنىڭ جاعالاۋىندا وقۋ-جاۋىنگەرلىك مىندەتتەردى ورىنداۋ بارىسىندا اۋا-رايىنىڭ كۇرت ناشارلاۋى جانە جەلدىڭ كۇشەيۋىنە بايلانىستى اسكەري قىزمەتشىلەردى تەڭىزگە الىپ كەتكەنىن اۋىر كۇرسىنىسپەن حابارلايمىز.

الدىن الا مالىمەت بويىنشا تەڭىزگە 19 اسكەري قىزمەتشىنى الىپ كەتكەن. قازىرگى ۋاقىتتا ونىڭ 9-ى، وكىنىشكە وراي قايتىس بولدى. ءۇش اسكەري قىزمەتشى قۇتقارىلدى، ولاردىڭ بىرەۋى اۋرۋحاناعا جاتقىزىلدى. قالعاندارىن ىزدەستىرۋ جۇمىستارى جۇرگىزىلۋدە.

وقيعا ورنىنا قۇتقارۋ قىزمەتتەرىنىڭ كۇشتەرى مەن قۇرالدارى دەرەۋ جىبەرىلدى. ىزدەستىرۋ-قۇتقارۋ جۇمىستارىنا اسكەري-تەڭىز كۇشتەرىنىڭ، توتەنشە جاعدايلار مينيسترلىگىنىڭ بولىمشەلەرى، اۆياتسيا جانە باسقا دا ءتيىستى قىزمەتتەر جۇمىلدىرىلدى.

وقيعانىڭ بارلىق ءمان-جايىن انىقتاۋ جانە ىزدەستىرۋ-قۇتقارۋ جۇمىستارىن ۇيلەستىرۋ ءۇشىن وقيعا ورنىنا قازاقستان رەسپۋبليكاسىنىڭ قورعانىس ءمينيسترى اۆياتسيا گەنەرال-لەيتەنانتى داۋرەن قوسانوۆتىڭ باسشىلىعىمەن قورعانىس مينيسترلىگىنىڭ كوميسسياسى شۇعىل اتتاندى.

قازاقستان رەسپۋبليكاسىنىڭ قورعانىس مينيسترلىگى قازا بولعان اسكەري قىزمەتشىلەردىڭ تۋعان-تۋىستارى مەن جاقىندارىنا قايعىرىپ كوڭىل ايتادى. قازا بولعانداردىڭ وتباسىلارىنا قاجەتتى بارلىق كومەك پەن قولداۋ كورسەتىلەدى.

ىزدەستىرۋ جۇمىستارىنىڭ بارىسى مەن اسكەري قىزمەتشىلەردىڭ جاعدايى تۋرالى قوسىمشا اقپارات دەرەكتەر تۇسۋىنە جانە راستالۋىنا قاراي بەرىلەدى. قازاقستان رەسپۋبليكاسى قورعانىس مينيسترلىگى مەن باسقا دا مەملەكەتتىك ورگانداردىڭ تەك رەسمي اقپاراتىنا سۇيەنۋدى سۇرايمىز.

Abai.kz