پرەزيدەنت كاسپيدە قازا تاپقان اسكەري قىزمەتشىلەرگە بايلانىستى 25 قىركۇيەكتى «جالپىۇلتتىق ازا تۇتۋ كۇنى» دەپ جاريالادى.

«مەملەكەت باسشىسىنىڭ وكىمىمەن ماڭعىستاۋ وبلىسىندا قىزمەتتىك مىندەتتەرىن اتقارۋ كەزىندە اسكەري قىزمەتشىلەردىڭ قازاعا ۇشىراۋىنا بايلانىستى قازاقستان رەسپۋبليكاسىندا 2026 جىلعى 25 قىركۇيەكتە جالپىۇلتتىق ازا تۇتۋ جاريالاندى»، - دەلىنگەن جارلىقتا.

24 قىركۇيەك كۇنى ماڭعىستاۋ وبلىسىندا قر قارۋلى كۇشتەرى اسكەري-تەڭىز كۇشتەرىنىڭ وقۋ-جاتتىعۋى كەزىندە 19 سارباز سۋعا كەتكەن.

«قايعىلى وقيعا كاسپي تەڭىزىنىڭ جاعالاۋىندا وقۋ-جاۋىنگەرلىك مىندەتتەردى ورىنداۋ بارىسىندا اۋا-رايىنىڭ كۇرت ناشارلاۋى جانە جەلدىڭ كۇشەيۋىنە بايلانىستى بولعان»، - دەپ مالىمدەدى قر قورعانىس مينيسترلىگى.

ۇكىمەتتىك كوميسسيا تاراتقان رەسمي مالىمەت بويىنشا:

وقۋ-جاتتىعۋ-جاۋىنگەرلىك تاپسىرمانى ورىنداۋ كەزىندە اۋا رايىنىڭ كۇرت ناشارلاپ، جەلدىڭ كۇشەيۋىنە بايلانىستى 17 اسكەري قىزمەتشى سۋعا كەتكەن. ولاردىڭ 12-ءسى قازا تاۋىپ، ۇشەۋى قۇتقارىلدى. قازىرگى تاڭدا تاعى ەكى اسكەري قىزمەتشىنى ىزدەستىرۋ جۇمىستارى جالعاسۋدا. قر پرەمەر-ءمينيسترىنىڭ ورىنباسارى قانات بوزىمباەۆ ءالى تابىلماعان اسكەري قىزمەتشىلەردى قاجەتتى بارلىق كۇشتەر مەن قۇرالداردى تارتا وتىرىپ، تاۋلىك بويى ۇزدىكسىز ىزدەستىرۋدى تاپسىردى.

پرەزيدەنت قاسىم-جومارت توقاەۆ قايعىلى وقيعانىڭ بارلىق ءمان-جايىن انىقتاۋدى جانە قازا تاپقانداردىڭ وتباسىلارىنا كومەك كورسەتۋدى تاپسىرعان بولاتىن.

وسىدان سوڭ ۇكىمەتتىك كوميسسيا قۇرىلىپ، الدىن الا قىلمىستىق ءىس قوزعالعانى بەلگىلى بولدى. ال ۇكىمەتتىك كوميسسيانى قانات بوزىمباەۆ باسقاراتىن بولىپ، ونىڭ قۇرامىنا بەيىندى مينيسترلىكتەردىڭ، ماڭعىستاۋ وبلىسىنىڭ، اسكەري پروكۋراتۋرانىڭ جانە شەكارا قىزمەتىنىڭ وكىلدەرى كىرگەن.

22 قىركۇيەكتە كاسپيدە 500-دەن استام اسكەري قىزمەتشىنىڭ قاتىسۋىمەن «حازار قورعانى-2026» جاتتىعۋلارى ءوتىپ جاتقان.

اسكەري قىزمەتشىلەردىڭ اتا-انالارى مەن جاقىندارىنا قايعىرىپ كوڭىل ايتامىز. اسكەري بورىشىن وتەۋ كەزىندە ازاماتتاردىڭ قازا بولۋى - ورنى تولماس اۋىر قازا. مارقۇمداردىڭ تۋعان-تۋىستارى مەن جاقىندارىنا وسى اۋىر ساتتە سابىر مەن كۇش-جىگەر تىلەيمىز. قازا بولعانداردىڭ جاندارى ءجانناتتا، توپىراقتارى تورقا بولسىن.

Abai.kz