قۇرمەتتى قازاقستاندىقتار!

وزدەرىڭىز بىلەتىندەي، مەملەكەت باسشىسى قاسىم-جومارت كەمەلۇلى توقاەۆتىڭ تاپسىرماسىمەن قازا تاپقانداردىڭ وتباسىلارى مەن زارداپ شەككەن اسكەري قىزمەتشىلەرگە جان-جاقتى قولداۋ كورسەتىلىپ جاتىر.

سونىمەن قاتار، كەلىپ جاتقان قاراجاتتى جيناقتاۋ ماقساتىندا ارنايى قور قۇرىلدى.

وسى قوردىڭ قىزمەتىن باقىلاۋ جونىندەگى كوميسسياعا جەتەكشىلىك ەتۋدى ماعان، ياعني قازاقستان حالىق كەڭەسىنىڭ مۇشەسى، ماڭعىستاۋ وبلىسى قوعامدىق كەڭەسىنىڭ توراعاسى بەكمۇرات جۇسىپوۆكە سەنىپ تاپسىرىلدى.

قازىرگى ۋاقىتتا قوردا قاراجات جيناقتالدى. بۇل قازاقستان حالىق كەڭەسى مۇشەلەرى، قۇرىلتاي دەپۋتاتتارى، ساياسي پارتيالار، كاسىپكەرلەر، دەمەۋشىلەر جانە باسقا دا جاناشىر ازاماتتارىمىزدىڭ ارقاسىندا مۇمكىن بولىپ وتىر.

وسىعان بايلانىستى، قاراجات جيناقتاۋ رەسمي تۇردە اياقتالدى.

ارنايى كوميسسيانىڭ جەتەكشىسى رەتىندە جاقىن ارادا وسى جينالعان قاراجات قازا بولعانداردىڭ وتباسىلارى مەن زارداپ شەككەندەرگە ادىلەتتى تۇردە جانە بىركەلكى بولىنەتىنىن سەنىممەن ايتامىن. ونىڭ اشىقتىعىن كوميسسيا قۇرامىنا كىرگەن مەملەكەتتىك جانە قۇقىق قورعاۋ ورگاندارىنىڭ وكىلدەرى دە قاداعالايدى.

اتقارىلىپ جاتقان جۇمىستىڭ بارىسى تۋرالى سىزدەرگە تۇراقتى تۇردە حابارلاپ وتىرامىن.

قارجىلاي كومەك قايعىنىڭ ورنىن تولتىرا المايتىنىن تۇسىنەمىز. دەگەنمەن وسىنداي اۋىر جاعدايدا وتباسىلارعا جان-جاقتى قولداۋ كورسەتۋ – ءبىزدىڭ پارىزىمىز دەپ بىلەمىز. سىزدەر بۇل اۋىرتپالىقپەن جالعىز قالمايسىزدار.

سەنىم ءبىلدىرىپ، قايعىعا ورتاقتاسقان بارشا قازاقستاندىقتارعا العىس ايتامىز.

Abai.kz