ەسكى ۆيدەو ماڭعىستاۋداعى قايعىلى وقيعانىڭ كادرلارى رەتىندە تاراتىلدى
الەۋمەتتىك جەلىدە اسكەري قىزمەتشىلەردىڭ قازاسىنا قاتىستى تاعى ءبىر مانيپۋلياتسيالىق ۆيدەو تارادى. كادردا قايتىس بولعان ادامنىڭ «دەنەسىن» كولىكپەن تاسىمالداپ بارا جاتقان ءسات كورسەتىلىپ، ونى ماڭعىستاۋداعى قايعىلى وقيعامەن بايلانىستىرعان. NoFake.kz رەداكتسياسى جالعان اقپاراتقا قارسى ءىس-قيمىل ورتالىعىمەن بىرلەسىپ ۆيدەونىڭ شىعۋ تاريحىن تەكسەردى.
تەكسەرۋ بارىسىندا ۆيدەونىڭ ماڭعىستاۋداعى قايعىلى وقيعاعا قاتىسى جوق ەكەنى انىقتالدى.
باستاپقى ۆيدەونى تالداۋ ونىڭ 2026 جىلعى 19 تامىزدا، ياعني قىركۇيەكتە بولعان قايعىلى وقيعادان الدەقايدا بۇرىن TikTok-تا جاريالانعانىن كورسەتتى. ۆيدەونى العاش @abenov__01 قولدانۋشىسى جۇكتەگەن. كەيىن تۇپنۇسقا جازبا وشىرىلگەنىمەن، ءدال وسى ۆيدەو 9 قىركۇيەكتە @bauka.kz091 اككاۋنتىندا قايتا جاريالانعان.
دەمەك، ۆيدەو قايعىلى وقيعاعا دەيىن جەلىدە بولعان جانە قىركۇيەكتەگى وقيعانىڭ كادرلارى بولۋى مۇمكىن ەمەس.
ۆيدەو قاي جەردە تۇسىرىلگەن؟
ۆيدەونىڭ ناقتى قاي جەردە تۇسىرىلگەنىن انىقتاۋ مۇمكىن بولمادى. گەولوكاتسيانى انىقتايتىن ءتۇرلى سەرۆيستەر ارقىلى جۇرگىزىلگەن تالداۋ كادرلار تۇركىستان، الماتى نەمەسە جەتىسۋ وبلىستارىنىڭ بىرىندە ءتۇسىرىلۋى مۇمكىن ەكەنىن كورسەتتى.
سونىمەن قاتار اككاۋنتتى تالداۋ بارىسىندا ۆيدەودا مەملەكەتتىك تىركەۋ ءنومىرى 676AVN13 بولاتىن Toyota Alphard كولىگى تۇسىرىلگەنى انىقتالدى. قولدا بار مالىمەت بويىنشا، كولىك تۇركىستان وبلىسىندا تىركەلگەن.
بۇل دەرەكتەر دە ۆيدەونىڭ ماڭعىستاۋ وبلىسىنداعى وقيعاعا قاتىسى بار ەكەنىن راستامايدى.
قايعىلى وقيعادان كەيىن باسقا سيپاتتا تارادى
قايعىلى وقيعادان كەيىن ەسكى كادرلار الەۋمەتتىك جەلىدە قايتا پايدا بولىپ، بۇل جولى «قازا تاپقان اسكەري قىزمەتشىلەردىڭ دەنەسىن تاسىمالداپ بارا جاتقان ۆيدەو» دەگەن سيپاتتامامەن تارالا باستاعان.
ياعني بۇرىن جاريالانعان ۆيدەوعا باسقا كونتەكست بەرىلگەن. مۇنداي ءتاسىل جەلى قولدانۋشىلارىن جاڭىلىستىرىپ، بولعان وقيعا تۋرالى قاتە تۇسىنىك قالىپتاستىرۋى مۇمكىن. NoFake.kz بۇعان دەيىن دە قايعىلى وقيعادان كەيىن الەۋمەتتىك جەلىدە ەسكى ۆيدەولار مەن باسقا دا مانيپۋلياتسيالىق كونتەنتتىڭ تارالۋى مۇمكىن ەكەنىن ەسكەرتكەن. وسىنداي جازبالاردى كورگەندە ۆيدەونىڭ العاش قاشان جانە قايدا جاريالانعانىنا، باستاپقى دەرەككوزىنە جانە قانداي كونتەكستە تاراعانىنا نازار اۋدارعان ءجون.
