Alatau City لوگيستيكانى، ونەركاسىپتى جانە قالالىق ينفراقۇرىلىمدى دامىتۋ ءۇشىن گەرمانيالىق تەحنولوگيالاردى تارتادى...

قازاقستان رەسپۋبليكاسى پرەزيدەنتى قاسىم-جومارت توقاەۆتىڭ گەرمانيا فەدەراتيۆتىك رەسپۋبليكاسىنا رەسمي ساپارى اياسىندا Alatau City Authority Alatau City-دە ينۆەستيتسيالىق جانە ينفراقۇرىلىمدىق جوبالاردى ىسكە اسىرۋ بويىنشا كومپانيالارمەن بىرقاتار كەلىسسوزدەر جۇرگىزدى. ىسكەرلىك باعدارلامانىڭ قورىتىندىسى بويىنشا ىنتىماقتاستىق تۋرالى التى مەموراندۋمعا قول قويىلدى.

28-29 قىركۇيەكتە Alatau City Authority وكىلدەرى Myron AG (Santa Capital), Rhenus, D.A.R. Metall AG, Wilo جانە Siemens Healthineers كومپانيالارىمەن بەس ەكىجاقتى كەزدەسۋ وتكىزدى. كەلىسسوزدەر لوگيستيكا، قالدىقتاردى قايتا وڭدەۋ، ينجەنەرلىك جانە مەديتسينالىق ينفراقۇرىلىم، ءوندىرىستى وقشاۋلاۋ جانە تسيفرلىق قارجى سالالارىنداعى جوبالاردى قامتىدى.

Myron AG (Santa Capital) كومپانياسىمەن ناقتى اكتيۆتەردى توكەنيزاتسيالاۋ بويىنشا پيلوتتىق جوبالار جانە Alatau City-دە جوبالاردى ىسكە اسىرۋ ءۇشىن ترانسشەكارالىق قارجىلاندىرۋدى تارتۋ مۇمكىندىكتەرى تالقىلاندى.

Rhenus-پەن كەلىسسوزدەر بارىسىندا بايسەركە ستانتسياسىنداعى كومپانيانىڭ قولدانىستاعى تەرمينالىمەن ينتەگراتسيالانا وتىرىپ، ا كلاسىنداعى قويما وبەكتىلەرىن جانە تاراتۋ ورتالىعىن قۇرۋ پەرسپەكتيۆالارى قاراستىرىلدى. سونداي-اق، تەرمينالعا جۇكتەردى جەتكىزۋ ءۇشىن ۇشقىشسىز تەحنولوگيالاردى قولدانۋ مۇمكىندىگى تالقىلاندى.

D.A.R. Metall AG كومپانياسىمەن Alatau City كاسىپورىندارىنىڭ قايتالاما شيكىزاتتى ودان ءارى پايدالانۋ مۇمكىندىگىمەن تۇرمىستىق جانە ونەركاسىپتىك قالدىقتاردى قايتا وڭدەۋ كەشەنىن قۇرۋ پەرسپەكتيۆالارى پىسىقتالدى. كومپانيا سونىمەن قاتار قۇرىلىس سالاسى ءۇشىن كومپوزيتتىك ماتەريالدار ءوندىرىسىن دامىتۋعا قىزىعۋشىلىق ءبىلدىردى.

Wilo كومپانياسىمەن كەزدەسۋدە Alatau City-دە سورعى جابدىقتارىنىڭ سەرۆيستىك جانە ينجەنەرلىك ورتالىعىن قۇرۋ تالقىلاندى. جوبا جابدىققا تەحنيكالىق قىزمەت كورسەتۋدى جانە ماماندار دايارلاۋدى، ءوندىرىستى وقشاۋلاۋدى ودان ءارى كەڭەيتۋ مۇمكىندىگىن كوزدەيدى.

Siemens Healthineers كومپانياسىمەن Alatau City-دە كومپانيانىڭ كەڭسەسى مەن سەرۆيستىك ورتالىعىن اشۋدى، سونداي-اق قالانىڭ مەديتسينالىق كلاستەرىن دامىتۋعا قاتىسۋدى قوسا العاندا، دەنساۋلىق ساقتاۋ سالاسىنداعى ستراتەگيالىق ىنتىماقتاستىقتىڭ ىقتيمال باعىتتارى قارالدى.

«گەرمانيالىق كومپانيالارمەن كەلىسسوزدەردىڭ قورىتىندىسى بويىنشا ءبىز قالانىڭ لوگيستيكالىق، ينجەنەرلىك، وندىرىستىك جانە الەۋمەتتىك ينفراقۇرىلىمىن قۇرۋعا ناقتى قىزىعۋشىلىق بارىن كورىپ وتىرمىز. قول جەتكىزىلگەن ۋاعدالاستىقتار جوبالاردى ودان ءارى ەگجەي-تەگجەيلى پىسىقتاۋعا، ولاردى ىسكە اسىرۋ تەتىكتەرىن ايقىنداۋعا جانە Alatau City-ءدى دامىتۋعا گەرمانيالىق تەحنولوگيالار مەن قۇزىرەتتەردى تارتۋعا نەگىز جاسايدى»، – دەپ اتاپ ءوتتى «Alatau City Authority» ارناۋلى باسقارۋ ۇيىمىنىڭ باس اتقارۋشى ديرەكتورى الىشەر ابدىقادىروۆ.

قازاقستان-گەرمانيا بيزنەس-فورۋمى اياسىندا Alatau City Authority گەرمانيالىق كومپانيالارمەن ىنتىماقتاستىق تۋرالى التى مەموراندۋمعا قول قويدى. ۋاعدالاستىقتار Wilo سەرۆيستىك ورتالىعىن قۇرۋ، Rhenus-پەن بىرلەسىپ لوگيستيكالىق ينفراقۇرىلىمدى دامىتۋ، D.A.R. Metall AG-مەن تۇرمىستىق جانە ونەركاسىپتىك قالدىقتاردى قايتا وڭدەۋ، SBP-Management-پەن دەنساۋلىق ساقتاۋ سالاسىندا ماماندار دايارلاۋ، Schlaich Bergermann Partner (SBP)-مەن كۇن ەنەرگەتيكاسى، قۇرىلىس جانە جوبالاۋ شەشىمدەرىن ساراپتاما جۇرگىزۋ سالاسىنداعى ىنتىماقتاستىق، سونداي-اق KazPetFood پەن Wagner Feedmill & Silo Plants اراسىنداعى ءۇي جانۋارلارىنا ارنالعان جەم شىعاراتىن زاۋىتقا جابدىق جەتكىزۋ جونىندەگى ءوزارا ءىس-قيمىلدى كوزدەيدى.

ىسكەرلىك باعدارلاما بارىسىندا Rhenus, Wilo جانە D.A.R. Metall AG وكىلدەرى ءتيىستى جوبالاردى Alatau City-دە ىسكە اسىرۋعا مۇددەلىلىگىن راستادى.

قول جەتكىزىلگەن ۋاعدالاستىقتار گەرمانيالىق تەحنولوگيالاردى، قۇزىرەتتەر مەن ينۆەستيتسيالاردى تارتۋعا، Alatau City-ءدىڭ زاماناۋي ينجەنەرلىك، لوگيستيكالىق، ەكولوگيالىق جانە الەۋمەتتىك ينفراقۇرىلىمىن دامىتۋعا باعىتتالعان. كەلەسى كەزەڭ – جوبالاردىڭ پارامەترلەرى مەن ولاردى ىسكە اسىرۋ تەتىكتەرىن ەگجەي-تەگجەيلى پىسىقتاۋ بولادى.

Abai.kz