باكۋدەگى ازەربايجان ۇلتتىق تاريح مۋزەيىندە تۇركىستاننىڭ تاريحي-مادەني مۇراسى مەن قوجا احمەت ءياساۋيدىڭ رۋحاني مۇراسىنا ارنالعان «اسپان تۇستەس سىردىڭ قۇپياسى» حالىقارالىق كورمەسى اشىلدى. كورمەنى قازاقستاننىڭ «ازىرەت سۇلتان» ۇلتتىق تاريحي-مادەني مۋزەي-قورىعى ازىرلەدى.

جوبا قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ قوجا احمەت ياساۋي مۇراسىن زەرتتەۋ، ساقتاۋ جانە حالىقارالىق دەڭگەيدە كەڭىنەن تانىتۋ جونىندەگى تاپسىرمالارى اياسىندا ۇيىمداستىرىلدى. كورمە قازاقستان رەسپۋبليكاسى مادەنيەت جانە اقپارات مينيسترلىگىنىڭ، ازەربايجان رەسپۋبليكاسى مادەنيەت مينيسترلىگىنىڭ جانە تۇركى مادەنيەتى مەن مۇراسى قورىنىڭ قولداۋىمەن اشىلدى.

كورمەگە XII عاسىردان جەتكەن تۇپنۇسقا تەرراكوتا تاقتاشالارى، XIV عاسىرداعى جىلتىراعان قاپتاما ۇلگىلەرى، مايوليكا مەن موزايكا ۇلگىلەرى قويىلدى. سونداي-اق قوجا احمەت ياساۋي كەسەنەسىندەگى كۋفي جازۋلارى مەن اراب كالليگرافياسى بەينەلەنگەن فوتوماتەريالدار ۇسىنىلدى. كەسەنەنىڭ ساۋلەتى مەن ونداعى كونە جازۋلارعا دا ايرىقشا ءمان بەرىلگەن.

كورمەنىڭ نەگىزگى بولىگىن قوجا احمەت ياساۋي كەسەنەسىنىڭ ەكى ماكەتى قۇرايدى. ونىڭ ءبىرى كەشەننىڭ ىشكى قۇرىلىمى مەن نەگىزگى بولمەلەرىنىڭ ورنالاسۋىن كورسەتسە، ەكىنشىسى كەسەنەنىڭ تۇتاس ساۋلەتتىك كەلبەتىن بەينەلەيدى.

ارنايى ءبولىم قوجا احمەت ءياساۋيدىڭ رۋحاني جانە زياتكەرلىك مۇراسىنا ارنالعان. مۇندا قولجازبالار مەن تاريحي دەرەكتەر، شەجىرەلىك «ناسابناما»، سونداي-اق ياساۋي ءىلىمىنىڭ تۇركى حالىقتارىنىڭ رۋحاني داستۇرىنە ماڭىزىن تانىتاتىن ءىزباسارلارىنىڭ ەڭبەكتەرى قويىلعان.

ءىس-شارا اياسىندا «ازىرەت سۇلتان» ۇلتتىق تاريحي-مادەني مۋزەي-قورىعى مەن ازەربايجان ۇلتتىق تاريح مۋزەيى ىنتىماقتاستىق تۋرالى مەموراندۋمعا قول قويدى. قۇجات مادەني مۇرانى ساقتاۋ، زەرتتەۋ، ماماندار الماسۋ، ورتاق عىلىمي جانە مادەني جوبالاردى قولعا الۋ باعىتىنداعى ارىپتەستىكتى قامتيدى.

حالىقارالىق كورمە قازاقستان مەن ازەربايجان مۋزەيلەرى اراسىنداعى بايلانىستى كەڭەيتىپ، تۇركىستاننىڭ تاريحي-مادەني مۇراسىن الەمگە كەڭىنەن تانىتۋعا باعىتتالدى.

Abai.kz