ەلوردادا ءوتىپ جاتقان جۇزۋدەن World Aquatics 2026 الەم كۋبوگىنىڭ فينالدىق كەزەڭىنە قاتىسۋشىلار استانانىڭ كورىكتى جەرلەرىن ارالاپ، قالانىڭ تۋريستىك نىساندارىمەن تانىستى. سپورتشىلار «بايتەرەك» مونۋمەنتىن، تاۋەلسىزدىك الاڭىن، ۇلتتىق مۋزەي جانە ەرەكشە ساۋلەتىمەن تانىمال «حان شاتىر» ساۋدا-ويىن-ساۋىق ورتالىعىن تاماشالادى.

بيىل قازاقستاندا العاش رەت ۇيىمداستىرىلىپ وتىرعان World Aquatics الەم كۋبوگىنىڭ فينالدىق كەزەڭىنە الەمنىڭ 39 ەلىنەن سپورتشىلار قاتىسۋدا. شەتەلدىك سپورتشىلاردىڭ، جاتتىقتىرۋشىلار مەن جانكۇيەرلەردىڭ كەلۋى وقيعالىق ءتۋريزمنىڭ دامۋىنا سەرپىن بەرىپ، قوناقۇيلەرگە، كولىك، ەكسكۋرسيا جانە باسقا دا قىزمەت تۇرلەرىنە سۇرانىستى ارتتىرادى.

شەتەلدىك قوناقتار استانانىڭ زاماناۋي ساۋلەتىنە، قالانىڭ كوركى مەن اباتتاندىرىلۋىنا، قازاقستاندىقتاردىڭ قوناقجايلىعىنا جانە ەلىمىزدىڭ باي مادەني مۇراسىنا ەرەكشە ءتانتى بولدى.

سونىمەن قاتار سپورتشىلار قازاقستاندى الەمگە تانىتۋعا ءوز ۇلەسىن قوسىپ كەلەدى. ولار الەۋمەتتىك جەلىلەردە ەلىمىزدەن العان اسەرىمەن ءبولىسىپ، ساپارى تۋرالى جاقىندارىنا اڭگىمەلەيدى. وسىلايشا قازاقستاننىڭ تۋريستىك مۇمكىندىكتەرىن حالىقارالىق اۋديتورياعا كەڭىنەن تانىتۋعا ىقپال ەتەدى.

ايتا كەتەيىك، 2026 جىلدىڭ باسىندا تۋريزم جانە سپورت مينيسترلىگى العاش رەت وڭىرلەرگە تۋريستەر تارتۋعا جانە وقيعالىق ءتۋريزمدى دامىتۋعا باعىتتالعان ءىرى ءىس-شارالاردىڭ كۇنتىزبەسىن بەكىتتى. كۇنتىزبە اياسىنداعى جۇمىستار، اقپاراتتىق سۇيەمەلدەۋ جانە وڭىرلەرمەن بىرلەسكەن ءىس-قيمىل ءىس-شارالارعا كەلۋشىلەر سانىنىڭ ارتۋىنا ىقپال ەتتى.

اتالعان جۇمىستىڭ وڭ ناتيجەلەرىن ەسكەرە وتىرىپ، مينيسترلىك تۋريستىك ءىس-شارالار كۇنتىزبەسىن قازاقستاندا وتەتىن ءىرى حالىقارالىق سپورت جارىستارىنىڭ كەستەسىمەن ۇيلەستىرۋ ماسەلەسىن قاراستىرىپ جاتىر.

بۇل باستاما سپورتتىق جارىستاردى مادەني جانە تۋريستىك ءىس-شارالارمەن ۇشتاستىرۋعا مۇمكىندىك بەرەدى. ناتيجەسىندە سپورتشىلار مەن شەتەلدىك قوناقتار جارىستارعا قاتىسىپ، سپورتتىق باسەكەلەردى تاماشالاپ قانا قويماي، ەلىمىزدەگى مادەني ءىس-شارالارعا قاتىسۋعا، ۇلتتىق داستۇرلەرىمىزبەن تانىسۋعا جانە قازاقستاننىڭ كورىكتى جەرلەرىن ارالاۋعا مۇمكىندىك الادى.

اتاپ ايتقاندا، 2027 جىلى قازاقستاندا سپورتتىڭ التى تۇرىنەن الەم چەمپيوناتىن وتكىزۋ جوسپارلانعان. استانادا ۇستەل تەننيسى مەن دزيۋدودان، ال الماتىدا ستەند اتۋدان الەم چەمپيوناتتارى وتەدى. سونداي-اق استانادا قازاق كۇرەسىنەن، بوكس پەن تاەكۆوندودان الەم چەمپيوناتتارىن وتكىزۋ كوزدەلگەن. بۇدان بولەك، ەلىمىزدە ۋەفا كونگرەسى وتەدى. بۇل دا حالىقارالىق دەڭگەيدەگى ماڭىزدى وقيعالاردىڭ ءبىرى بولماق.

الەمدىك دەڭگەيدەگى سپورتتىق جارىستاردى وتكىزۋ ەلىمىزدە سپورتتىڭ دامۋىنا، قازاقستاننىڭ تۋريستىك تارتىمدىلىعىن ارتتىرۋعا، حالىقارالىق بەدەلىن نىعايتۋعا جانە قىزمەت كورسەتۋ سالاسىنىڭ وركەندەۋىنە دە ىقپال ەتەدى.

Abai.kz