قازاقستان رەسپۋبليكاسى پرەزيدەنتىنىڭ جاساندى ينتەللەكتىنى دامىتۋ جونىندەگى جارلىعىن ىسكە اسىرۋ اياسىندا جانە ىشكى ىستەر ءمينيسترىنىڭ تاپسىرماسى بويىنشا 17 قازاندا استاناداعى Alem.AI حالىقارالىق ورتالىعىندا «Kazakhstan Prevention Days – 2026» اۋقىمدى جوبالار كورمەسى ءوتتى.

شارا قىلمىستىڭ سالدارىمەن كۇرەسۋدەن گورى ونىڭ الدىن الۋعا باسىمدىق بەرەتىن قاۋىپسىز قوعامنىڭ جاڭا بەينەسىن كورسەتتى.

قازىرگى مەگاپوليس قاۋىپسىزدىگى تەك پوليتسياعا عانا جۇكتەلمەيتىن كۇردەلى ەكوجۇيەگە اينالدى. كورمەنىڭ باستى ماقساتى – جاساندى ينتەللەكت پەن اۋقىمدى دەرەكتەر (Big Data) ارقىلى قاۋىپ-قاتەردى الدىن الا بولجاۋ. سالتاناتتى ۇرمەلى اسپاپتار وركەسترىنىڭ اۋەنى فۋتۋريستىك تسيفرلىق ديزاينمەن ۇلاسقان الاڭدا ىشكى ىستەر مينيسترلىگى، پوليتسيا دەپارتامەنتتەرى، اكىمدىكتەر، جوعارى وقۋ ورىندارى مەن ۇكىمەتتىك ەمەس ۇيىمدار ازىرلەگەن الپىسقا جۋىق يننوۆاتسيالىق جوبا تانىستىرىلدى.

تەحنولوگيالىق دەمو-ايماقتا IT-ماماندار مەن ءتارتىپ ساقشىلارى حالىقتىڭ تىنىشتىعىن ساقتاۋعا ارنالعان وزىق نەيروجەلىلىك شەشىمدەردى ۇسىندى:

الاياقتىققا قارسى جاڭا قالقان. تەلەفون الاياقتارىنىڭ قوڭىراۋلارىن ابونەنتكە جەتپەي بۇعاتتايتىن جۇيە جانە ازاماتتاردى پسيحولوگيالىق مانيپۋلياتسياعا توتەپ بەرۋگە ۇيرەتەتىن «CIMM.PRO» ينتەراكتيۆتى سيمۋلياتورى.

اقىلدى ينفراقۇرىلىم. جول جابىنىنداعى اقاۋلاردى انىقتاپ، جول-كولىك وقيعاسىنىڭ الدىن الاتىن «JOLScan» پلاتفورماسى، ۆوكزالدارداعى قاراۋسىز قالعان زاتتاردى نەمەسە ىزدەۋدەگى ادامداردى ناقتى ۋاقىت رەجيمىندە تانيتىن «SafeRail Qazaqstan» بەينەاناليتيكا جۇيەسى.

بالالار مەن وتباسى قورعانىسى. بالالاردىڭ قاۋىپتى تسيفرلىق توپتارعا تارتىلۋىن ەرتە انىقتايتىن «AiMap»، جوعالعان ادامداردى جەدەل ىزدەۋگە ارنالعان «E-Bagdar» ۇلتتىق حابارلاندىرۋ الاڭى، وسكەلەڭ ۇرپاقتى كيبەرساۋاتتىلىققا باۋليتىن «تسيفرلىق يممۋنيتەت» جوباسى. تۇرمىستىق زورلىق-زومبىلىقتىڭ الدىن الۋعا باعىتتالعان «ءبىز جاقىنبىز 2.0»، «قاۋىپسىز وتباسى – قاۋىپسىز قوعام»، «AL-JAN» جانە «SENIM TECHNOLOGIES» باستامالارى دا كوپتىڭ نازارىنا ۇسىنىلدى.

«ءبىزدىڭ ماقساتىمىز – قىلمىس بولعاننان كەيىن سالدارىمەن كۇرەسۋ ەمەس، ونىڭ تۇبەگەيلى الدىن الۋ. تسيفرلىق قۇرالدار قاۋىپتى ەرتە باستان كورۋگە مۇمكىندىك بەرەدى. سوندىقتان تەحنولوگيالىق ەكوجۇيەنى قالىپتاستىرۋ – ۋاقىت تالابى»، – دەپ اتاپ ءوتتى كورمە ۇيىمداستىرۋشىلارى.

قاۋىپسىزدىك ماسەلەسىندە شەكارا جوق ەكەنىن ايعاقتايتىن شاراعا گەرمانيا، قىرعىزستان، وزبەكستان جانە تاجىكستاننان كەلگەن حالىقارالىق ساراپشىلار ارنايى قاتىستى. شەتەلدىك مەيماندار قازاقستاننىڭ قۇقىق قورعاۋ سالاسىنا جاساندى ينتەللەكتىنى ەنگىزۋ قارقىنىن جوعارى باعالاپ، ترانسشەكارالىق كيبەرقىلمىسپەن كۇرەستەگى تەحنولوگيالىق ينتەگراتسيانىڭ ماڭىزىن اتاپ ءوتتى.

كورمەدە تانىستىرىلعان جوبالار جاقىن ارادا ەلوردا مەن وڭىرلەردە پيلوتتىق نەگىزدە ىسكە قوسىلىپ، ەلدەگى قاۋىپسىزدىك دەڭگەيىن جاڭا ساتىعا كوتەرمەك.

Abai.kz