قازاقستان حالىق كەڭەسىنىڭ توراعاسى ەرلان قوشانوۆ رەسپۋبليكا كۇنى قارساڭىندا مەملەكەت باسشىسى قاسىم-جومارت كەمەلۇلى توقاەۆتىڭ اتىنان بىرقاتار قازاقستاندىققا مەملەكەتتىك ناگرادا تاپسىردى. وسى كۇنى حالىق كەڭەسى جانىنان قۇرىلعان «بىرلىك» قوعامدىق توبىنىڭ العاشقى وتىرىسى دا ءوتتى. بۇل الاڭ كونستيتۋتسيالىق ورگاننىڭ قۇرامىنا ەنبەگەن، ەلىمىزدىڭ بارلىق وڭىرىندەگى ەتنومادەني بىرلەستىكتەردىڭ وكىلدەرىن بىرىكتىردى.

قاتىسۋشىلار الدىندا ءسوز سويلەگەن ەرلان قوشانوۆ رەسپۋبليكا كۇنىنىڭ تاريحي ماڭىزىن اتاپ ءوتىپ، 25 قازاننىڭ ەگەمەن قازاقستاننىڭ قالىپتاسۋىنداعى ءرولىن ەسكە سالدى.

«مەملەكەت باسشىسى قاسىم-جومارت كەمەلۇلى توقاەۆتىڭ باستاماسىمەن رەسپۋبليكا كۇنى ۇلتتىق مەرەكە مارتەبەسىن قايتا الدى. بۇل شەشىم ەلىمىزدىڭ دامۋىنداعى جاڭا كەزەڭمەن ساباقتاستى. ەگەمەندىگىمىزدىڭ باستاۋىنا جاڭاشا قاراپ، ونىڭ قادىرىن تەرەڭىرەك تۇسىنۋگە جول اشتى»، – دەدى ەرلان قوشانوۆ.

قازاقستان حالىق كەڭەسىنىڭ توراعاسى تاۋەلسىزدىك جىلدارىنداعى ەلىمىزدىڭ جەتىستىكتەرىنە توقتالىپ، قازاقستاننىڭ حالىقارالىق بەدەلىنىڭ نىعايعانىن جانە الەۋمەتتىك-ەكونوميكالىق وزگەرىستەردىڭ ناتيجەلەرىن اتاپ ءوتتى. ونىڭ ايتۋىنشا، بۇگىندە قازاقستان جاھاندىق ماسەلەلەردى شەشۋگە بەلسەندى قاتىساتىن ورتا دەرجاۆا رەتىندە تانىلدى.

سوڭعى جەتى جىلدا ەلىمىزدىڭ ەكونوميكاسىنا 155 ملرد دوللار شەتەلدىك ينۆەستيتسيا تارتىلدى. جان باسىنا شاققانداعى ءجىو 15 مىڭ دوللارعا جەتتى. وسى كەزەڭدە 118 ملن شارشى مەتر تۇرعىن ءۇي پايدالانۋعا بەرىلىپ، 36,3 مىڭ شاقىرىم اۆتوموبيل جولى سالىنىپ، جوندەۋدەن ءوتتى. 1300-دەن استام مەكتەپ، 1483 بالاباقشا جانە 1259 مەديتسينالىق مەكەمە اشىلدى. 2024 جىلى Moody’s حالىقارالىق رەيتينگتىك اگەنتتىگى قازاقستانعا ءوز تاريحىنداعى ەڭ جوعارى كرەديتتىك رەيتينگتى «تۇراقتى» بولجامىمەن بەردى. بۇل رەيتينگ بيىل دا راستالدى.

مەملەكەتتىڭ دامۋىنداعى قۇندىلىقتىق نەگىزدەر تۋرالى ايتا كەلە، ەرلان قوشانوۆ قوعامدىق كەلىسىمدى نىعايتۋدا ماڭىزدى باعدار بولىپ سانالاتىن مەملەكەت باسشىسىنىڭ «بىرلىگىمىز – ارالۋاندىقتا» قاعيداتىنا نازار اۋداردى.

«بىرلىك دەگەنىمىز – ءارتۇرلى بولا وتىرىپ، ءبىر-ءبىرىمىزدىڭ تاريحىمىزدى قۇرمەتتەۋ جانە ەلىمىزدىڭ بولاشاعى ءۇشىن ورتاق جاۋاپكەرشىلىكتى سەزىنۋ. بۇل بىرلىكتى ودان ءارى نىعايتىپ، ەلىمىزدىڭ ىنتىماعىن ارتتىرۋ ءۇشىن ورتاق ادامگەرشىلىك قۇندىلىقتارعا سۇيەنۋ ماڭىزدى»، – دەدى ەرلان قوشانوۆ.

حالىق كەڭەسىنىڭ توراعاسىنىڭ ايتۋىنشا، بۇل قۇندىلىقتار مەملەكەت باسشىسىنىڭ زاڭعا قۇرمەت، ادىلدىك جانە ەل بولاشاعى ءۇشىن جاۋاپكەرشىلىك قاعيداتتارىنا نەگىزدەلگەن «زاڭ جانە ءتارتىپ»، «ادال ازامات» جانە «تازا قازاقستان» باستامالارىمەن ۇندەسەدى.

ودان ءارى ەرلان قوشانوۆ ەتنومادەني بىرلەستىكتەردىڭ قوعامدىق سەنىمدى نىعايتۋعا، ەتنوسارالىق كەلىسىمدى ساقتاۋعا جانە پرەزيدەنت باستامالارىن ىلگەرىلەتۋگە قوسىپ وتىرعان ۇلەسىنە نازار اۋداردى. ونىڭ ايتۋىنشا، حالىق كەڭەسى جانىنان قۇرىلعان «بىرلىك» توبى ءوزارا ءىس-قيمىلدى كەڭەيتىپ، بىرلەستىكتەر وكىلدەرىن جالپىۇلتتىق ماسەلەلەردى تالقىلاۋ ۇدەرىسىنە بەلسەندىرەك تارتۋعا مۇمكىندىك بەرەدى.

«سىزدەر حالىق كەڭەسىنىڭ قۇرىلۋىمەن ەتنوسارالىق كەلىسىم ماسەلەلەرىنە عانا ەمەس، جالپىۇلتتىق مىندەتتەردى شەشۋگە دە بەلسەندى قاتىسۋعا مۇمكىندىك الاسىزدار. باستامالار كوتەرىپ، حالىقتى تولعاندىراتىن ماسەلەلەردى ورتاعا سالىپ، بۇكىل ەل ءۇشىن ماڭىزدى شەشىمدەردى تالقىلاۋعا قاتىساسىزدار. ءبىز «بىرلىك» توبىن ءدال وسى ماقساتتا قۇرىپ وتىرمىز»، – دەدى ەرلان قوشانوۆ.

توپتىڭ ءۇش نەگىزگى باعىت بويىنشا جۇرگىزىلەدى. ءبىرىنشىسى – ەتنومادەني بىرلەستىكتەردىڭ حالىقپەن جۇمىس ىستەۋ تاجىريبەسىنە سۇيەنە وتىرىپ، قوعامدىق ماڭىزى بار ماسەلەلەردى شەشۋگە قاتىسۋى. ەكىنشىسى – جاستار باستامالارىن قولداۋ جانە جاس ۇرپاقتى قوعامدىق ومىرگە بەلسەندى تارتۋ. ءۇشىنشىسى – الەۋمەتتىك جەلىلەر مەن اقپاراتتىق جوبالار ارقىلى بىرلىك پەن كەلىسىم يدەيالارىن ىلگەرىلەتۋ.

جيىندا ەرلان قوشانوۆ ۇلىق مەرەكە قارساڭىندا ەلگە ەڭبەگى سىڭگەن ازاماتتارعا قۇرمەت كورسەتۋ جاقسى ءداستۇر ەكەنىن، بۇنىڭ رەسپۋبليكا كۇنى قارساڭىندا ەرەكشە ماڭىزعا يە ەكەنىن اتاپ ءوتتى.

«بۇگىن مەملەكەت باسشىسى قاسىم-جومارت كەمەلۇلى توقاەۆ بىرقاتار وتانداستارىمىزعا جوعارى مەملەكەتتىك ناگرادالار تابىس ەتتى. ماراپاتتالعانداردىڭ اراسىندا ءبىزدىڭ ارىپتەستەرىمىز دە بار. بىرقاتارى ماراپاتىن پرەزيدەنتتىڭ قولىنان الدى. بارشاڭىزدى وسى قۋانىشپەن شىن جۇرەكتەن قۇتتىقتايمىن! بۇل – ەل يگىلىگى جولىنداعى ادال ەڭبەكتەرىڭىزگە بەرىلگەن جوعارى باعا»، – دەدى.

پرەزيدەنتتىڭ اتىنان ەرلان قوشانوۆ بەلسەندى ازاماتتىق ۇستانىمى جانە قوعامدىق-ساياسي سالاداعى جەمىستى ەڭبەگى ءۇشىن ازاماتتارعا مەملەكەتتىك ناگرادالار تابىستادى.

Abai.kz