ماڭعىستاۋداعى اسكەري قىزمەتشىلەردىڭ قازا بولۋى: 8 لاۋازىمدى تۇلعا قاماۋدا قالادى...

باس پروكۋراتۋرا ماڭعىستاۋ وبلىسىنداعى وقۋ-جاتتىعۋ كەزىندە اسكەري قىزمەتشىلەردىڭ قازا بولۋ فاكتىسى بويىنشا قىلمىستىق ءىستى تەرگەۋ بارىسى تۋرالى اقپاراتتى جاريالادى. ۆەدومستۆو مالىمەتىنشە، 300-دەن استام ادامنان جاۋاپ الىنىپ، 30-دان استام سوت ساراپتاماسى مەن زەرتتەۋ جۇرگىزىلدى. تەرگەۋدى ءىىم اسكەري-تەرگەۋ ورگاندارى جۇرگىزىپ جاتىر، ونىڭ بارىسى باس پروكۋراتۋرانىڭ ەرەكشە باقىلاۋىندا.

سوتتىڭ سانكتسياسىمەن 8 لاۋازىمدى تۇلعا قاماۋعا الىندى: قارۋلى كۇشتەر اسكەري-تەڭىز كۇشتەرىنىڭ باس قولباسشىسى، ونىڭ ءبىرىنشى ورىنباسارى مەن جاۋىنگەرلىك دايارلىق جونىندەگى ورىنباسارى، ەكى اسكەري ءبولىمنىڭ، تەڭىز جاياۋ اسكەرلەرى باتالونى مەن روتاسىنىڭ كومانديرلەرى، سونداي-اق كاتەر كاپيتانى. ولارعا قىزمەتكە سالعىرت قاراۋ جانە كەمە جۇرگىزۋ ەرەجەلەرىن بۇزۋ ايىبى تاعىلۋدا.

جاقىن ارادا تەرگەۋ ارەكەتتەرىن اياقتاۋ جانە پروتسەسس قاتىسۋشىلارىن ءىس ماتەريالدارىمەن تانىستىرۋ جوسپارلانىپ وتىر. قر قىلمىستىق-پروتسەستىك كودەكسىنىڭ 201-بابىنا سايكەس وزگە مالىمەتتەر جاريا ەتۋگە جاتپايدى.

Abai.kz