ۋكراينا پرەزيدەنتى ۆلاديمير زەلەنسكي اقش كەلىسسوزشىلەرى - ستيۆ ۋيتكوفف جانە دجارەد كۋشنەرمەن 1,5 ساعات تەلەفون ارقىلى سويلەستى.

تاراپتار ۋكراينا، اقش جانە رەسەي اراسىنداعى ۇشجاقتى كەلىسسوزدەرگە دايىندىق بارىسىن، قاۋىپسىزدىك كەپىلدىكتەرىن قامتاماسىز ەتۋدى، سونداي-اق ۋكراينانىڭ اۋە قورعانىسى جۇيەسىن كۇشەيتۋ ماسەلەلەرىن پىسىقتادى.

بۇل تۋرالى ۋكراينا مەملەكەت باسشىسى حابارلادى. ونىڭ ايتۋىنشا، كەزدەسۋگە بەلسەندى دايىندىق ءجۇرىپ جاتىر.

سونىمەن بىرگە زەلەنسكي بريۋسسەلدە وتكەن كونسۋلتاتسيالاردىڭ قورىتىندىلارىنا توقتالدى. وندا ۋكراينا، اقش، ەۋروپا مەملەكەتتەرى، ەۋروپالىق وداق، ناتو، دۇنيەجۇزىلىك بانك جانە بيزنەس قوعامداستىعىنىڭ وكىلدەرى سوعىستان كەيىنگى قالپىنا كەلتىرۋ ستراتەگيالارىن قاراستىرعان.

ال 5 قاراشاعا جوسپارلانعان كەلەسى كەزدەسۋ تولىقتاي قاۋىپسىزدىك كەپىلدىكتەرىنە ارنالماق.

ۋكراينا پرەزيدەنتى كەلىسسوز پروتسەسىن بارىنشا جەدەلدەتۋدىڭ ماڭىزدىلىعىن اتاپ ءوتىپ، كيەۆ ءوز ۇسىنىستار پاكەتىن امەريكالىق تاراپقا جولداعانىن مالىمدەدى.

سۇحبات بارىسىندا اۋە قورعانىسى تاقىرىبىنا ەرەكشە نازار اۋدارىلدى. زەلەنسكي ەل اۋماعىن رەسەيدىڭ اۋە شابۋىلدارىنان سەنىمدى قورعاۋ ءۇشىن Patriot كەشەندەرىنە ارنالعان ۇستاپ قالۋشى زىمىرانداردىڭ اسا قاجەت ەكەنىن جەتكىزدى.

ودان بولەك، Drone Deals فورماتى اياسىندا اقش-پەن پيلوتسىز ۇشۋ اپپاراتتارى بويىنشا ىنتىماقتاستىقتى جالعاستىرۋ جايى تالقىلاندى.

الدىن الا جوسپار بويىنشا ۋكراينا، رەسەي جانە اقش دەلەگاتسيالارىنىڭ كەلىسسوزدەرىنىڭ جاڭا كەزەڭى 10-11 قاراشا كۇندەرى ابۋ-دابيدە وتەدى. اقش اتىنان بۇل پروتسەسكە ۋيتكوفف پەن كۋشنەر قاتىسادى دەپ كۇتىلۋدە.

كەزدەسۋدىڭ كۇن تارتىبىندە سوعىستان كەيىنگى قاۋىپسىزدىكتى قامتاماسىز ەتۋ، شيەلەنىستى باسەڭدەتۋ، گۋمانيتارلىق شارالاردى ىسكە اسىرۋ جانە سوعىستى توقتاتۋعا باعىتتالعان كەلەسى قادامدار قاراستىرىلادى.

Abai.kz