سانجار بوقاەۆتىڭ ءىسى بويىنشا وتكەن سوت وتىرىسىندا ادۆوكاتتار جابىرلەنۋشىگە مۇلدەم قاتىسى جوق باسقا ەپيزودقا قاتىستى سۇراقتار قويۋعا تىرىستى.

سوتقا الماتى قالاسى ەكولوگيا باسقارماسىنىڭ وكىلى ميراس نۇرتىلەۋوۆ شاقىرىلدى. ول باۋىرجان مومىشۇلى اتىنداعى ساياباق اۋماعىنداعى اعاشتاردىڭ كەسىلۋىنە قاتىستى جالعان اقپارات تاراتۋ دەرەگى بويىنشا قر قىلمىستىق كودەكسىنىڭ 274-بابىمەن كوزدەلگەن قىلمىستىق ءىس اياسىندا جابىرلەنۋشى رەتىندە كۋاگەرلىك ەتىپ جاتىر.

الايدا بوقاەۆتىڭ ادۆوكاتتارى اعاشتاردى كەسۋ ماسەلەسىن قوزعاماي، جاۋاپ الۋ ءساتىن بەتون پليتالاردى جىمقىرۋ ەپيزودىنا بۇرۋعا تىرىستى. ولار ەكولوگتان تاقتالاردى جۇك كولىگىنە تيەپ، كەيىن قايتادان تۇسىرگەنى بەينەلەنگەن ۆيدەو تۋرالى سۇراي باستادى.

وسى تۇستا پروكۋرور جاۋاپ الۋدى توقتاتتى. ول نۇرتىلەۋوۆتىڭ بەتون پليتالارعا ەشقانداي قاتىسى جوق ەكەنىن ەسكە سالىپ، ودان باسقا ەپيزود بويىنشا جاۋاپ تالاپ ەتۋدىڭ ورىنسىز ەكەنىن اتاپ ءوتتى.

بەتون پليتالار ماسەلەسىنەن ناتيجە شىعارا المايتىنىن تۇسىنگەن ادۆوكاتتار ەكولوگقا باۋىرجان مومىشۇلى اتىنداعى ساياباق پەن جاعالاۋدى قايتا جاڭعىرتۋ جۇمىستارىنىڭ ەگجەي-تەگجەيى تۋرالى سۇراقتار قويا باستادى. الايدا بۇل ساۋالداردىڭ دا قارالىپ جاتقان ەپيزود بويىنشا تاعىلعان ايىپتىڭ ءمان-جايىنا ەش قاتىسى جوق ەدى.

وسىدان كەيىن توراعالىق ەتىپ جاتقان سۋدياعا كەزەكتى رەت قارسىلىق ءبىلدىرىلىپ، قورعاۋ تاراپى سوت پروتسەسىنە دايىندالۋ ءۇشىن ءۇزىلىس بەرۋدى سۇرادى. ايتا كەتۋ كەرەك، بۇعان دەيىن دە بوقاەۆتىڭ ادۆوكاتتارى سۋدياعا بىرنەشە رەت قارسىلىق بىلدىرگەن بولاتىن. مەملەكەتتىك ايىپتاۋ تاراپى مۇنداي قارسىلىقتاردىڭ جۇيەلى سيپات العانىنا نازار اۋدارىپ، ولاردى سوت پروتسەسىن سوزۋعا باعىتتالعان ارەكەت رەتىندە باعالاعان.

ءوز كەزەگىندە توراعالىق ەتىپ جاتقان سۋديا ماتەريالدارمەن تانىسۋعا جەتكىلىكتى ۋاقىت بولعانىن، ونىڭ ىشىندە العاشقى سوت تالقىلاۋى باستالعانعا دەيىن دە مۇنداي مۇمكىندىك بەرىلگەنىن اتاپ ءوتتى.

قورعاۋ تاراپىنىڭ ۇستانىمىن پروكۋرور سىنعا الىپ، سۋدياعا قارسىلىق ءبىلدىرۋدى نەگىزسىز دەپ اتادى. وتىنىشحاتقا قارسى پىكىر بىلدىرگەن مەملەكەتتىك ايىپتاۋشى ءىستىڭ وربۋىنە قاتىستى ەگجەي-تەگجەيلى حرونولوگيانى كەلتىرىپ، ادۆوكاتتاردىڭ ۋاقىت تاپشىلىعى تۋرالى ۋاجدەرىن تولىقتاي جوققا شىعاردى.

مەملەكەتتىك ايىپتاۋ تاراپىنىڭ مالىمەتىنشە، سوتقا دەيىنگى تەرگەپ-تەكسەرۋ 2026 جىلعى 13 شىلدەدە اياقتالعان. ءىس پروكۋرورعا جولدانعانعا دەيىن قورعاۋ تاراپى ءىس ماتەريالدارىمەن تانىسۋعا ءبىر جارىم اي ۋاقىت جۇمساعان. وسى كەزەڭدە ادۆوكاتتار تەك ءوتىنىشحاتتاردىڭ وزىنەن التى توم ماتەريال دايىنداپ ۇلگەرگەن. ءىس سوتقا 11 قىركۇيەكتە تۇسكەن، ال العاشقى سوت وتىرىسى 16 قازاندا وتكەن. دەمەك، ادۆوكاتتاردىڭ سوت تالقىلاۋى باستالعانعا دەيىن دايىندالۋىنا تولىقتاي تاعى ءبىر اي ۋاقىت بولعان.

«وسىنداي ۇزاق ۋاقىت بولا تۇرا كاسىبي ءتورت ادۆوكاتتىڭ وسى كۇنگە دەيىن ءتيىستى دەڭگەيدە قورعاۋدى ۇيىمداستىرۋعا نەلىكتەن ۇلگەرمەدى دەگەن زاڭدى سۇراق تۋىندايدى»، – دەپ مالىمدەدى مەملەكەتتىك ايىپتاۋشى سوت وتىرىسىندا.

پروكۋرور مىناداي پارادوكس جاعدايعا ەرەكشە نازار اۋداردى. ونىڭ ايتۋىنشا، كاسىبي ءتورت قورعاۋشىنىڭ بولۋىنا قاراماستان، سوت وتىرىسى بارىسىندا ادۆوكات اسقاروۆتىڭ ۇرلىق ەپيزودى بويىنشا كىمنىڭ جابىرلەنۋشى دەپ تانىلعانى جونىندە قاراپايىم مالىمەتتەردەن دە حابارسىز ەكەنى انىقتالعان. ونىڭ ۇستىنە، وتكەن جۇمادا ادۆوكاتتاردىڭ ايىپتالۋشىنىڭ قاسىنا بارىپ، پروتسەسكە دايىندالۋعا مۇمكىندىگى بولعانىمەن، ولار بۇل قۇقىقتى پايدالانباعان.

«ادۆوكاتتاردىڭ ءار سوت وتىرىسىندا ايتىپ جۇرگەنىندەي، ولاردىڭ دايىن بولماۋىنا سوت كىنالى ەمەس»، – دەپ تۇيىندەدى پروكۋرور.

مەملەكەتتىك ايىپتاۋ تاراپى سۋدياعا قايتا-قايتا قارسىلىق ءبىلدىرۋ، ۇنەمى دايىن ەمەستىگىن العا تارتۋ جانە سوت وتىرىستارىن كەيىنگە قالدىرۋدى تالاپ ەتۋ قورعاۋ تاراپىنىڭ شىنايى ماقساتىنا كۇمان كەلتىرۋگە نەگىز بولاتىنىن رەسمي تۇردە مالىمدەدى. پروكۋروردىڭ ايتۋىنشا، ادۆوكاتتار وزدەرىنىڭ پروتسەستىك قۇقىقتارىن تاعىلعان ايىپتىڭ ءمانى بويىنشا قورعانۋ ءۇشىن ەمەس، دالەلدەمەلەردى ۋاقتىلى زەرتتەۋگە كەدەرگى كەلتىرۋ ماقساتىندا پايدالانىپ وتىر.

ناتيجەسىندە سۋدياعا كەزەكتى رەت بىلدىرىلگەن قارسىلىق قاناعاتتاندىرىلمادى.

ايتا كەتەيىك، بۇل اتالعان سوت پروتسەسىندەگى كەزەكتى ءۇزىلىس. بۇعان دەيىن دە بوقاەۆتىڭ ادۆوكاتتارى سۋدياعا بىرنەشە رەت قارسىلىق بىلدىرگەن ەدى. مەملەكەتتىك ايىپتاۋ تاراپى مۇنداي قارسىلىقتاردىڭ جۇيەلى سيپات العانىنا بۇرىن دا نازار اۋدارىپ، ولاردى قورعاۋ تاراپىنىڭ سوت پروتسەسىن سوزۋعا باعىتتالعان ارەكەتى رەتىندە باعالاعان.

Abai.kz