ۇلىتاۋ وبلىسىندا قۇرىلتاي دەپۋتاتى دارحان احمەديەۆتىڭ، قازاقستان حالىق كەڭەسىنىڭ مۇشەسى امانجول ءالتايدىڭ, ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ەلدار كۇزەنباەۆتىڭ ءوڭىر تۇرعىندارىمەن كەزدەسۋى ءوتتى.

كەزدەسۋ بارىسىندا مەملەكەت باسشىسىنىڭ 2026 جىلعى 28 قازانداعى «جاڭا تاريحي كەزەڭدەگى قازاقستاننىڭ وزەكتى مىندەتتەرى» اتتى قازاقستان حالقىنا جولداۋىندا بەلگىلەنگەن نەگىزگى باسىمدىقتار تالقىلاندى. قاتىسۋشىلار تسيفرلىق ترانسفورماتسيا، جاساندى ينتەللەكتىنى دامىتۋ، حالىقتىڭ ءال-اۋقاتىن ارتتىرۋ، جۇمىسپەن قامتۋدى قامتاماسىز ەتۋ، الەۋمەتتىك ينفراقۇرىلىمدى جاڭعىرتۋ جانە ادامي كاپيتالدى دامىتۋ ماسەلەلەرىنە باسا نازار اۋداردى.

سپيكەرلەر جولداۋ جۇكتەگەن مىندەتتەردى ءوڭىردىڭ ەكونوميكالىق جانە الەۋمەتتىك ەرەكشەلىكتەرىن ەسكەرە وتىرىپ ىسكە اسىرۋدىڭ ماڭىزدىلىعىنا توقتالدى.

– مەملەكەت باسشىسىنىڭ جولداۋى ەل دامۋىنىڭ ستراتەگيالىق باعدارلارىن ايقىنداپ، ەكونوميكانى نىعايتۋعا، حالىقتىڭ ءومىر ءسۇرۋ ساپاسىن ارتتىرۋعا جانە مەملەكەتتىك باسقارۋ جۇيەسىن جاڭعىرتۋعا باعىتتالعان. وسى باستامالاردىڭ وڭىرلىك دەڭگەيدە جۇيەلى ءارى ناتيجەلى جۇزەگە اسىرىلۋىن قامتاماسىز ەتۋ بارشامىزدىڭ ورتاق مىندەتىمىز، – دەدى قۇرىلتاي دەپۋتاتى دارحان احمەديەۆ.

ءوڭىردى دامىتۋعا باعىتتالعان ماڭىزدى باستامالاردىڭ ءبىرى – الەۋمەتتىك ينفراقۇرىلىمدى كەشەندى جاڭعىرتۋدى كوزدەيتىن «حالىقتىق قۇرىلىس» باعدارلاماسى. باعدارلاما اياسىندا وبلىستا جاڭا ءبىلىم بەرۋ، دەنساۋلىق ساقتاۋ، سپورت جانە مادەنيەت نىساندارىن سالۋ جوسپارلانىپ وتىر. بۇل الەۋمەتتىك قىزمەتتەردىڭ قولجەتىمدىلىگى مەن ساپاسىن ارتتىرىپ قانا قويماي، وڭىردە جاڭا جۇمىس ورىندارىن اشۋعا دا مۇمكىندىك بەرەدى.

كەزدەسۋ بارىسىندا تۇرعىندار الەۋمەتتىك قولداۋ شارالارى، مەديتسينا قىزمەتكەرلەرىنىڭ ەڭبەكاقىسى، پەداگوگتەردىڭ اكىمشىلىك جۇكتەمەسىن ازايتۋ، سونداي-اق ءوڭىردىڭ ەكولوگيالىق جانە تەحنولوگيالىق ماسەلەلەرىنە قاتىستى ساۋالدارىن ورتاعا سالدى. سۋ رەسۋرستارىن ءتيىمدى پايدالانۋ جانە تسيفرلىق ينفراقۇرىلىمدى دامىتۋ جولدارى دا تالقىلاندى.

قازىرگى ۋاقىتتا مەملەكەت باسشىسىنىڭ تاپسىرمالارى مەن ۇكىمەتتىڭ قولداۋى اياسىندا ۇلىتاۋ وبلىسىندا 30-عا جۋىق ءىرى الەۋمەتتىك جانە ينفراقۇرىلىمدىق نىساندى جاڭعىرتۋ جۇمىستارى جۇرگىزىلۋدە.

ءوڭىردىڭ كولىك-لوگيستيكالىق الەۋەتىن ارتتىرۋ باعىتىندا دا بىرقاتار جوبا جۇزەگە اسىرىلۋدا. اتاپ ايتقاندا، نەگىزگى تەمىرجول ۆوكزالدارىن جاڭعىرتۋ جۇمىستارى اياقتالىپ، جەزقازعاندى قىزىلوردا، ارقالىق جانە قاراعاندى قالالارىمەن بايلانىستىراتىن ستراتەگيالىق ماڭىزى بار اۆتوموبيل جولدارىن سالۋ جانە جوندەۋ جۇمىسى جالعاسىپ جاتىر. اتالعان جوبالار كولىك قاتىناسىن جاقسارتۋعا، جۇك جانە جولاۋشىلار تاسىمالىنىڭ تيىمدىلىگىن ارتتىرۋعا، سونداي-اق ءوڭىردىڭ ينۆەستيتسيالىق تارتىمدىلىعىن كۇشەيتۋگە باعىتتالعان.

بۇدان بولەك، وبلىستا دەنساۋلىق ساقتاۋ، ءبىلىم بەرۋ جانە سپورت ينفراقۇرىلىمىن دامىتۋ بويىنشا كەشەندى جۇمىستار قولعا الىنعان. بۇل جوبالار بيۋدجەت قاراجاتى ەسەبىنەن جانە «سامۇرىق-قازىنا» اق، «Qarmet» اق، «قازاقمىس» كورپوراتسياسى مەن «Zhyly Zhurek» قورىنىڭ قولداۋىمەن جۇزەگە اسىرىلۋدا. جوسپارلانعان جۇمىستار اياسىندا ءوڭىردىڭ قالالارى مەن اۋىلدارىندا اۋرۋحانالار، ەمحانالار، بالاباقشالار، ينكليۋزيۆتى جانە وڭالتۋ ورتالىقتارى، زاماناۋي سپورت كەشەندەرى مەن كونگرەسس-ورتالىعىنىڭ قۇرىلىسى جۇرگىزىلۋدە.

اتالعان باستامالاردى ىسكە اسىرۋ ءوڭىردىڭ الەۋمەتتىك ينفراقۇرىلىمىن جەتىلدىرۋگە، حالىقتىڭ ءومىر ءسۇرۋ ساپاسىن ارتتىرۋعا، جاڭا جۇمىس ورىندارىن اشۋعا جانە ۇلىتاۋ وبلىسىنىڭ الەۋمەتتىك-ەكونوميكالىق الەۋەتىن نىعايتۋعا مۇمكىندىك بەرەدى.

كەزدەسۋ سوڭىندا سپيكەرلەر تۇرعىنداردىڭ ساۋالدارىنا جاۋاپ بەرىپ، كوتەرىلگەن ماسەلەلەر بويىنشا جان-جاقتى تۇسىنىكتەمە بەردى.

Abai.kz