الەۋمەتتىك جەلىدە زاڭدى ەلەمەيتىنىن اشىق كورسەتىپ، وزىنە ەشقانداي شارا قولدانىلمايتىنىن مالىمدەگەن جۇرگىزۋشىنىڭ ارەكەتى جاۋاپسىز قالمادى.

پوليتسيا قىزمەتكەرلەرى الەۋمەتتىك جەلىدە جول قوزعالىسى ەرەجەلەرىن ورەسكەل بۇزعان ۆيدەوسىن جاريالاعان ايەلدى انىقتاپ، جاۋاپقا تارتتى.

ۆيدەودا ايەلدىڭ قاۋىپسىزدىك بەلدىگىن تاقپاي كولىك باسقارعانى جانە بۇل تالاپتى ورىنداۋدان اشىق باس تارتقانىن بايقاۋعا بولادى.

تەكسەرۋ بارىسىندا وزگە دە زاڭ بۇزۋشىلىقتار انىقتالدى. ايەلدىڭ بۇعان دەيىن سوت شەشىمىمەن كولىك باسقارۋ قۇقىعىنان ايىرىلعانىنا قاراماستان، رولگە وتىرعانى بەلگىلى بولدى.

وسىعان بايلانىستى وعان قاتىستى بىرنەشە اكىمشىلىك قۇقىق بۇزۋشىلىق دەرەگى بويىنشا ءىس قوزعالدى. اتاپ ايتقاندا، كولىك باسقارۋ قۇقىعىنان ايىرىلعاننان كەيىن كولىك جۇرگىزۋ، قاۋىپسىزدىك بەلدىگىن پايدالانۋ تالابىن بۇزۋ، سوت شەشىمىن ورىنداماۋ جانە جالعان اقپارات تاراتۋ فاكتىلەرى بويىنشا ماتەريالدار راسىمدەلدى.

جيناقتالعان ماتەريالدار سوتقا جولداندى. اۆتوكولىك ارنايى ايىپپۇل تۇراعىنا قويىلدى.

سونىمەن قاتار كولىك باسقارۋ قۇقىعىنان ايىرىلعان ادامعا اۆتوكولىگىن بەرگەن كولىك يەسى دە جاۋاپكەرشىلىككە تارتىلدى.

پوليتسيانىڭ ۇستانىمى ايقىن: زاڭ الدىندا ءبارى تەڭ. ەشقانداي تانىستىق تا، بايلانىس تا، ورىنسىز مالىمدەمە دە زاڭ تالاپتارىن بۇزۋعا نەگىز بولا المايدى.

ءوزىن زاڭنان جوعارى ساناپ، بەلگىلەنگەن تالاپتاردى ەلەمەۋگە ەشكىمنىڭ قۇقىعى جوق. زاڭ بارىنە ورتاق، ال ونى بۇزعان ادام جاۋاپكەرشىلىكتەن جالتارا المايدى.

Abai.kz