الماتى قالاسىنىڭ المالى اۋداندىق سوتىندا سانجار بوقاەۆقا قاتىستى قىلمىستىق ءىستى قاراۋ جالعاسىپ جاتىر. سوتتا گرانيت تاقتالارىن ۇرلاۋ ارەكەتىنىڭ ينستسەنيروۆكاسى ەپيزودى بويىنشا ماڭىزدى ايعاقتار ايتىلدى.

سوتتا وقيعا كەزىندە «پاۆلودار وزەن پورتى» كومپانياسىنىڭ قۇرىلىس الاڭىندا جۇمىس ىستەگەن جانبولات جاناتاەۆ ءسوز سويلەدى. ول مەملەكەت مەنشىگىندەگى دەمونتاجدالعان تاقتالاردى زاڭسىز ساتقانىن مويىندادى. ونىڭ ايتۋىنشا، وزىنە اقىلبەك حامراكۋلوۆ (بوقاەۆتىڭ الگى جۇمىسشىسى) كەلىپ، تاقتالاردىڭ ءبىر مەترىن 4 مىڭ تەڭگەگە ساتىپ الۋدى ۇسىنعان.

جاناتاەۆ ساتىپ الۋشىنى كران-مانيپۋلياتور جۇرگىزۋشىسىمەن تانىستىرعان. مامىلە ەكى رەت جاسالدى. جاناتاەۆ اقشانى حامراكۋلوۆتىڭ وزىنەن قولما-قول العان: العاشىندا شامامەن 80 مىڭ تەڭگە، كەيىن 120 مىڭ تەڭگە. تاقتالاردى ەكىنشى رەت الىپ كەتۋ كەزىندە جوسپار كۇرت وزگەرگەن. مانيپۋلياتور جۇرگىزۋشىسى جاناتاەۆقا تەلەفون شالىپ، وقيعا ورنىنا سانجار بوقاەۆتىڭ ۆيدەووپەراتورمەن بىرگە كەلگەنىن حابارلاعان. وسىدان كەيىن حامراكۋلوۆ جاي عانا قاشىپ كەتكەن. كۋاگەر جاناتاەۆ ءوز كىناسىن مويىندادى. قۇرىلىس ماتەريالدارىن زاڭسىز ساتقانى ءۇشىن ول ۇرلىق بابىمەن سوتتالعان.

ۇرلانعان تاقتالاردى قابىر باسىنا قويىلاتىن ەسكەرتكىشتەر جاساۋ ءۇشىن الىپ بارا جاتقان دەگەن بوقاەۆتىڭ نۇسقاسىن سوتتا بەساعاش اۋىلىنداعى جەرلەۋ راسىمدەرىنە ارنالعان بۇيىمدار جاسايتىن تسەحتىڭ يەسى – كۋاگەر ۋساكوۆ تولىعىمەن جوققا شىعاردى. 16 قىركۇيەك كۇنى تاڭەرتەڭ ول شەبەرحاناسىنىڭ جانىنان تۇسىرىلگەن گرانيت تاقتالاردى بايقاعان. كۋاگەر حامراكۋلوۆتى تانىمايتىنىن، ەشكىمنەن قۇرىلىس ماتەريالدارىنا تاپسىرىس بەرمەگەنىن جانە ەشتەڭە ساتىپ الماعانىن مالىمدەدى. ونىڭ ۇستىنە، بوقاەۆ پەن ونىڭ جۇمىسشىسى اكەلگەن گرانيت ەسكەرتكىش جاساۋعا مۇلدەم جارامسىز بولىپ شىققان: تاقتالار سىنىپ قالعان. كاسىپكەر قاقپاسىنىڭ الدىنا تاس تۇسىرۋگە ارەكەت جاسالعانىن ينتەرنەتتەگى بەينەروليكتەن عانا بىلگەن.

كورىنەۋ جالعان اقپارات تاراتۋ بابى بويىنشا جابىرلەنۋشىلەردەن جاۋاپ الۋ كەزىندە ايىپتالۋشى تاراپىنان جاريالانىمدارداعى دەرەكتەردى بۇرمالاۋ فاكتىلەرى دە انىقتالدى. «مەدەۋ» مەملەكەتتىك وڭىرلىك تابيعي پاركىنىڭ ء(موتپ) وكىلى ءالىمجان كيرتاەۆ باۋم توعايىندا سيرەك كەزدەسەتىن 16 اعاشتىڭ زاڭسىز كەسىلگەنىن راستادى (كەلتىرىلگەن زالال 213 مىڭ تەڭگەنى قۇراعان). سونىمەن بىرگە ول بوقاەۆتىڭ توعاي اۋماعىندا مەيرامحانالار مەن دۇكەندەر سالۋ ءۇشىن كوممەرتسيالىق قۇرىلىس جۇرگىزىلىپ جاتىر دەگەن مالىمدەمەلەرىن ءۇزىلدى-كەسىلدى جوققا شىعاردى. بۇل اۋماق ەرەكشە قورعالاتىن تابيعي ايماق بولىپ سانالادى، ال مەردىگەر كومپانيا مۇندا تەك اباتتاندىرۋ جۇمىستارىن جۇرگىزگەن: جۇگىرۋ جولاقتارىن توسەپ، بالالارعا ارنالعان الاڭدار مەن جارىقتاندىرۋ جۇيەلەرىن ورناتقان.

جابىرلەنۋشى ءارى ەكولوگتان جاۋاپ الۋى كەزىندە قورعاۋ تاراپىنان ادەتتەن تىس سۇراق تا قويىلدى. بوقاەۆتىڭ ادۆوكاتى ماماننان توعايدىڭ اكۋستيكالىق ەرەكشەلىكتەرىن انىقتاعىسى كەلىپ، «ەگەر توعايدا تۇشكىرسە، ونىڭ داۋىسى قانشا مەتر جەردەن ەستىلەدى؟» دەپ سۇرادى.

كۋاگەرلەردىڭ ايتۋىنشا، بوقاەۆتىڭ جەرۇستى جانە جەراستى جاياۋ جۇرگىنشىلەر وتكەلدەرىن جوندەۋ تۋرالى تاراتقان اقپاراتى دا شىندىققا جاناسپايدى. بوستاندىق اۋدانى اكىمىنىڭ اپپاراتىنىڭ مامانى ءادىلجان ومىرزاقوۆ سوتقا بۇل نىسانداردى كۇردەلى جوندەۋگە شامامەن 86 ميلليون تەڭگە بولىنگەنىن ءتۇسىندىردى.

بوقاەۆ ءوز روليكتەرىندە وتكەلدەردەگى تاقتايشالاردىڭ «ءمىنسىز» ەكەنىن جانە ولاردى جوندەۋدىڭ قاجەتى جوق ەكەنىن ايتقان. اكىمدىك وكىلى كۇردەلى جوندەۋ جۇمىستارى تەك سىرتقى كورىنىستى جاقسارتۋمەن شەكتەلمەيتىنىن اتاپ ءوتتى. بۇل وتكەلدەر سوناۋ 1993 جىلى سالىنعان جانە سودان بەرى بىردە-ءبىر رەت جوندەلمەگەن. قۇرىلىمداردىڭ تەحنيكالىق جاعدايىنا بايلانىستى ولاردى تولىق اۋىستىرۋ قاجەت بولعان. ويتكەنى تاقتايشالاردىڭ سىرتقى كورىنىسى نىسان كونسترۋكتسيالارىنىڭ ناقتى توزۋ دەڭگەيىن كورسەتپەيدى.

اكىمدىك ءتىپتى بوقاەۆ جاريالاعان ۆيدەونىڭ استىنا بارلىق تەحنيكالىق سيپاتتامالارعا قاتىستى ەگجەي-تەگجەيلى تۇسىندىرمە پىكىر دە قالدىرعان. الايدا بلوگەر ونى ەلەمەگەن.

ارىپتەستەرىنىڭ ءسوزىن قوعامدىق كەڭىستىكتەردى دامىتۋ باسقارماسىنىڭ وكىلى رۋسلان ماحمەتوۆ تە راستادى. ول بوقاەۆتىڭ بىرقاتار نىسان بويىنشا كورىنەۋ جالعان اقپاراتتى زاڭسىز تاراتقانىن رەسمي تۇردە العا تارتتى. ولاردىڭ قاتارىندا جاياۋ جۇرگىنشىلەرگە ارنالعان وتكەلدەر، «اتاكەنت» اۋماعىن قايتا جاڭعىرتۋ، باۋم توعايىندا اعاشتاردى كەسۋ جانە گرانيت تاقتالاردى ۇرلاۋ وقيعالارى بار.

Abai.kz