استانادا 13 قاراشاعا جوسپارلانعان رەسەيلىك ەسترادا جۇلدىزى ۆلاديمير پرەسنياكوۆتىڭ كونتسەرتىنىڭ كەنەتتەن توقتاتىلۋى («تەحنيكالىق ءمان-جايلار» دەگەن سىلتاۋىمەن كەيىنگە شەگەرىلۋى) قازاقستاندىق قوعامدا قىزۋ تالقى تۋدىردى.

الماتىداعى كەشى ازىرگە جوسپاردا قالعانىمەن، بۇل جاعداي ەلىمىزدەگى مادەني كەڭىستىكتىڭ سيپاتى تۇبەگەيلى وزگەرىسكە ۇشىراعانىن تاعى ءبىر مارتە دالەلدەدى.

بۇگىندە بۇل ۇدەرىس جەكەلەگەن ءارتىستىڭ گاسترولىنەن الدەقايدا ماڭىزدى ماسەلەگە – «ۋكرايناداعى سوعىستى جاقتاعان نەمەسە ءۇنسىز ماقۇلداعان رەسەي ونەرپازدارى قازاقستاننان ناپاقا تاپپاۋى ءتيىس» دەگەن قاتاڭ قوعامدىق تالاپقا اينالىپ وتىر.

قازاقستاندىقتار بۇعان دەيىن كىمدەردىڭ كونتسەرتتەرىن بويكوت جاريالاپ، بولدىرماي تاستادى؟

قازاقستان قوعامى سوڭعى جىلدارى ءوزىنىڭ ازاماتتىق ۇستانىمىن اشىق كورسەتىپ، ەلگە كەلگىسى كەلگەن «كرەملشىل» پروپاگاندا وكىلدەرىنىڭ جولىن بىرنەشە رەت كەسكەن بولاتىن. بۇعان ناقتى مىسالدار جەتكىلىكتى:

2023 جىلى گريگوري لەپستىڭ قوناەۆ قالاسىندا ءوتۋى ءتيىس كونتسەرتى حالىقتىڭ جاپپاي نارازىلىعىنان كەيىن كەيىنگە قالدىرىلىپ، سوڭىندا تولىعىمەن توقتاتىلعانى ەسىمىزدە. سەبەبى لەپس پەن باسقا دا ارتىستەر ۋكرايناداعى سوعىستى اشىق قولداپ، ورىس اسكەرلەرىنە اقشالاي قولداۋكورسەتكەن جانە وزگەلەردى دە اقشا بولۋگە شاقىرعان بولاتىن.

كەرىسىنشە، سوعىسقا قارسى شىققان نەمەسە بەيتاراپ ۇستانىم ۇستانعان رەسەيلىكتەردىڭ (مىسالى، ماكسيم گالكين، زەمفيرا، «بي-2» توبى) كونتسەرتتەرىنە قازاقستاندىقتار قولداۋ كورسەتىپ جاتقانى بايقالادى. بۇل قوعامنىڭ اق پەن قارانى، اگرەسسور مەن بەيبىتشىلىكتى جاقتاۋشىنى ناقتى اجىراتا باستاعانىن كورسەتەدى.

پولينا گاگارينا مەن لاريسا دوليناعا دا بايكوت جاريالاعانبىز. رەسەيلىك Z-پاتريوتتار قاتارىنا كىرەتىن بۇل انشىلەردىڭ دە قازاقستانعا كەلۋ جوسپارلارى بولعان. قازاقستاننىڭ سەرگەك سانالى ازاماتتارى مەن الەۋمەتتىك جەلى قولدانۋشىلارىنىڭ قاتاڭ قارسىلىعىنا ۇشىراپ، بۇلاردىڭ كونتسەرتتەرىن ۇيىمداستىرۋشىلار جوسپارلى كونتسەرتتەردى توقتاتۋعا ءماجبۇر بولعان.

پرەسنياكوۆ كونتسەرتىنىڭ اينالاسىنداعى جاعداي مەن بۇرىنعى وقيعالار قازاقستان قوعامىندا ساياسي جانە ۇلتتىق سانانىڭ وسكەنىن ايقىن اڭعارتادى.

رەسەيلىك شوۋ-بيزنەس وكىلدەرى ءۇشىن قازاقستان مەن ورتالىق ازيا نارىعى سوڭعى جىلدارى نەگىزگى تابىس كوزدەرىنىڭ بىرىنە اينالدى. دەيتۇرا، ءبىزدىڭ قوعام دا وياندى. وزدەرىنىڭ اشىق نەمەسە جاسىرىن ميليتاريستىك كوزقاراستارى ءۇشىن ولار بۇل جاقتان قاراجات تابۋعا لايىق ەمەس دەگەن كوزقاراس قالىپتاستى.

ەندىگى ۋاقىتتا قازاقستاندىق كونتسەرت ۇيىمداستىرۋشىلار بيلەت ساتۋدان بۇرىن حالىقتىڭ رەاكتسياسى مەن ءارتىستىڭ ساياسي بەكگراۋندىن مىندەتتى تۇردە ەسكەرۋگە ءتيىس. قوعامنىڭ ءۇنى بيلەت كاسسالارىنان باسىم ءتۇسىپ جاتىر.

قورىتىندى ورنىنا: استانادا پرەسنياكوۆ كونتسەرتىنىڭ وتپەي قالۋى – جاي عانا تەحنيكالىق اقاۋ ەمەس. بۇل – ەلىمىزدىڭ مادەني مايدانىنداعى ماڭىزدى ءۇردىس. قازاقستان قوعامى ءوز ەلىنىڭ رۋحاني كەڭىستىگىن سوعىستى ناسيحاتتايتىن نەمەسە اگرەسسياعا ءۇنسىز كەلىسەتىن تۇلعالاردان قورعاۋعا قابىلەتتى ەكەنىن تاعى ءبىر مارتە دالەلدەدى.

Abai.kz