قۇرىلتايدا جەر قويناۋىن پايدالانۋشىلاردىڭ عىلىمي-زەرتتەۋ جانە تاجىريبەلىك-كونسترۋكتورلىق جۇمىستارعا مىندەتتى اۋدارىمدارىن پايدالانۋ ءتارتىبىن جەتىلدىرۋ ۇسىنىلدى. مۇنداي اۋدارىمداردىڭ مولشەرى وندىرىسكە كەتەتىن شىعىنداردىڭ 1%-ىن قۇرايدى.

تسيفرلاندىرۋ، يننوۆاتسيالار جانە عىلىم كوميتەتىنىڭ توراعاسى دارحان احمەديەۆ قۇرىلتايدا جوعارى اۋديتورلىق پالاتانىڭ عىلىمدى دامىتۋ سالاسىنداعى مەملەكەتتىك ءاۋديتتىڭ قورىتىندىلارى تۋرالى ەسەبىن قاراۋ بارىسىندا اتاپ وتكەندەي، بۇل قاراجات ەلىمىزدىڭ ونەركاسىبى مەن ەكونوميكاسىنا قاجەتتى زەرتتەۋلەر مەن تەحنولوگيالارعا باعىتتالۋعا ءتيىس. قارجى مينيسترلىگىنىڭ مالىمەتىنشە، بيىلعى جىلدىڭ توعىز ايىندا وسى باعىت بويىنشا 4,5 ملرد تەڭگە تۇسكەن.

كوميتەت بۇل قاراجاتتى بولەك ەسەپكە الىپ، جوبالاردى اشىق كونكۋرستىق ىرىكتەۋدى قاراستىرۋدى ۇسىنىپ وتىر. عىلىم جانە جوعارى ءبىلىم مينيسترلىگى قارجى مينيسترلىگىمەن بىرلەسىپ، ۋاقتىلى قارجىلاندىرۋ مەن مونيتورينگكە جاۋاپتى وپەراتور ۇيىمدى ايقىنداۋدى ۇسىندى. وپەراتوردى تاڭداۋ كەزىندە فۋنكتسيالاردىڭ قايتالانۋىن بولدىرماۋ ءۇشىن جۇمىس ىستەپ تۇرعان ۇيىمداردىڭ مۇمكىندىكتەرى مەن اكىمشىلەندىرۋ قۇنى ەسكەرىلگەنى ءجون.

سونداي-اق، تەحنولوگيالىق سۇرانىستى قالىپتاستىرۋدان باستاپ، ناتيجەلەردى راستاۋعا دەيىنگى بارلىق كەزەڭدەردە سالالىق مينيسترلىكتەردىڭ كەلىسىلگەن جۇمىسىن قامتاماسىز ەتۋ ۇسىنىلدى.

باسىم باعىتتار رەتىندە ءوندىرۋ مەن قايتا وڭدەۋ تيىمدىلىگىن ارتتىرۋ، رەسۋرس ۇنەمدەۋ، ونەركاسىپتىك قاۋىپسىزدىك، ەكولوگيا جانە وندىرىستىك پروتسەستەردى تسيفرلاندىرۋ بەلگىلەندى.

Abai.kz