الماتى قالاسىنىڭ المالى اۋداندىق سوتىندا سانجار بوقاەۆقا قاتىستى قىلمىستىق ءىس بويىنشا سوت وتىرىستارى جالعاسىپ جاتىر. كەزەكتى وتىرىستا سوت جاياۋ جۇرگىنشىلەر وتكەلدەرىن جوندەۋمەن اينالىسقان مەردىگەر ۇيىمنىڭ ديرەكتورىن، باۋم توعايىنداعى ينستسەنيروۆكاعا دايىندىققا قاتىستى كۋاگەردى، سونداي-اق الاياقتىق ەپيزودى بويىنشا كومپانيانىڭ بۇرىنعى مەنەدجەرىن تىڭدادى.

«IZI Company KZ» جشس ديرەكتورىنىڭ سوتتاعى جاۋابى الماتىداعى جاياۋ جۇرگىنشىلەر وتكەلدەرىن جوندەۋ جۇمىستارىنا قاتىستى جالعان بەينەماتەريالدىڭ جاريالانۋى قانداي سالدارعا اكەلىپ سوقانىن كورسەتتى. كۋاگەردىڭ ايتۋىنشا، 2025 جىلدىڭ شىلدەسىندە ونىڭ كومپانياسى 12 فيرما قاتىسقان اشىق كونكۋرستا جەڭىسكە جەتكەن. ناتيجەسىندە بوستاندىق اۋدانىنداعى 10 نىساندى كۇردەلى جوندەۋدەن وتكىزۋ ءۇشىن جالپى سوماسى شامامەن 953 ميلليون تەڭگەنى قۇرايتىن كەلىسىمشارتتار جاسالعان.

مەملەكەتتىك ساتىپ الۋ تۋرالى اقپارات اشىق بولعانىنا قاراماستان، بوقاەۆ ءوزىنىڭ ۆيدەوسىندا ءبىر ميلليارد تەڭگەگە جۋىق قاراجات نەبارى ەكى وتكەلدى جوندەۋگە بولىنگەنىن مالىمدەگەن. سوتتا جاۋاپ بەرگەن مەردىگەر كومپانيانىڭ باسشىسى بۇل جاريالانىمنىڭ كاسىپورىن جۇمىسىنا تيگىزگەن كەرى اسەرىن العا تارتتى.

«بوقاەۆتىڭ جالعان ۆيدەوسى كومپانيانىڭ جۇمىسىنا كەرى اسەر ەتىپ، قۇرىلىس توقتاپ، ءتۇرلى تەكسەرۋلەر باستالدى. شىن مانىندە بەس جەراستى جانە بەس جەرۇستى وتكەلى بولعانىنا قاراماستان، اتالعان ۆيدەودا بوقاەۆ قاراجات ءبىر عانا جەراستى وتكەلىنە بولىنگەنىن ايتتى»، – دەدى ول.

كۋاگەردىڭ سوزىنشە، جاريالانىمنان كەيىن تۋىنداعان قوعامدىق رەزونانس مەملەكەتتىك ساۋلەت-قۇرىلىس باقىلاۋى باسقارماسى مەن تەحنيكالىق قاداعالاۋ ورگاندارى تاراپىنان كوپتەگەن تەكسەرۋدىڭ جۇرگىزىلۋىنە سەبەپ بولعان. جۇمىستاردىڭ ءماجبۇرلى تۇردە توقتاتىلۋىنا بايلانىستى كومپانيانى ليتسەنزياسىنان ايىرۋ ماسەلەسى دە قاراستىرىلعان.

سونىڭ سالدارىنان جوندەۋ جۇمىستارىن اياقتاۋدىڭ باستاپقى مەرزىمى – 2025 جىلعى 31 جەلتوقسان كەيىنگە شەگەرىلىپ، نىسانداردى تاپسىرۋ ۋاقىتى 2026 جىلدىڭ ناۋرىزىنا اۋىستىرىلعان. جۇمىستاردىڭ كەشىگۋى تولەمدەردىڭ ۋاقىتىندا جۇرگىزىلمەۋىنە بايلانىستى تاپسىرىس بەرۋشىمەن ارادا سوت داۋلارىنىڭ تۋىنداۋىنا اكەلگەن.

جشس ديرەكتورى جوندەۋ قۇنىنىڭ جاسىرىن تۇردە قىمباتتاعانى تۋرالى قاۋەسەتتى دە جوققا شىعاردى. ونىڭ ايتۋىنشا، كەلىسىمشارتتاردىڭ باستاپقى سومالارى وزگەرگەن جوق، ولارعا قوسىمشا كەلىسىمدەر ارقىلى تۇزەتۋلەر دە ەنگىزىلمەگەن.

سونداي-اق، كۋاگەر جوندەۋ جۇمىستارىنىڭ تەحنيكالىق تۇرعىدان قاجەتتى بولعانىن ءتۇسىندىردى. ەسكى قاپتاما بولشەكتەلگەننەن كەيىن جۇمىسشىلار وتكەل كونسترۋكتسيالارىنداعى جاسىرىن اقاۋلار مەن ارماتۋرانىڭ توت باسقانىن انىقتاعان. بۇل كەمشىلىكتەر جاياۋ جۇرگىنشىلەردىڭ قاۋىپسىزدىگىنە تىكەلەي قاتەر توندىرگەن.

سوت وتىرىسىندا بوقاەۆتىڭ باۋم توعايىنداعى اعاشتاردى كەسۋگە دايىندىق بارىسىنا قاتىستى دا جاڭا دەرەكتەر ايتىلدى. ايدانعالي ەسىمدى كۋاگەردىڭ مالىمدەۋىنشە، ول 2025 جىلعى 24 قازاندا «ۋسپەح» لومباردىنان قۇنى 20 مىڭ تەڭگە بولاتىن بەنزينمين جۇمىس ىستەيتىن ارا ساتىپ الىنعان. ءدال وسى قۇرال كەيىن توعايداعى اعاشتاردى كەسۋ ءۇشىن پايدالانىلعان.

بۇدان بولەك، الاياقتىق ەپيزودى بويىنشا سوت وتىرىسىنا ءماجبۇرلى تۇردە جەتكىزىلگەن كالەندەروۆا ەسىمدى كۋاگەر دە جاۋاپ بەردى. ول 2018 جىلى جۇلدىز ارتىقباەۆانىڭ جەتەكشىلىگىمەن «We Can» جشس-دە مەنەدجەر بولىپ جۇمىس ىستەگەنىن ءتۇسىندىردى. ونىڭ مىندەتىنە «ەۋروپا–قىتاي» گازبەن جۇرەتىن تەحنيكا حالىقارالىق اۆتوشەرۋگە قاتىسۋشىلاردىڭ تۇرۋى مەن تاماقتانۋىن ۇيىمداستىرۋ كىرگەن.

Abai.kz