بۇگىن قۇرىلتاي دەپۋتاتى ديحان قامزابەكۇلى، قازاقستان حالىق كەڭەسىنىڭ مۇشەسى ابدۋللا يسماتۋللاەۆ، اۋىل شارۋاشىلىعى ۆيتسە-ءمينيسترى نازگۇل حاتەپوۆا جانە سۋ رەسۋرستارى جانە يرريگاتسيا ۆيتسە-ءمينيسترى تالعات مومىشەۆ  تۇركىستان قالاسىنىڭ تۇرعىندارىمەن بىرقاتار كەزدەسۋ وتكىزدى.

جۇمىس ساپارى اياسىندا رەسپۋبليكالىق توپ وكىلدەرى الەۋمەتتىك جانە قوعامدىق نىسانداردى ارالاپ، ازاماتتىق جانە عىلىمي قوعامداستىق وكىلدەرىمەن، ستۋدەنتتەرمەن، قالا تۇرعىندارىمەن جانە مەديتسينا سالاسىنىڭ قىزمەتكەرلەرىمەن كەزدەستى. جيىندا مەملەكەت باسشىسىنىڭ «جاڭا تاريحي كەزەڭدەگى قازاقستاننىڭ وزەكتى مىندەتتەرى» اتتى قازاقستان حالقىنا جولداۋىنىڭ باسىم باعىتتارى تالقىلاندى.

دوستىق ۇيىندە قالا تۇرعىندارىمەن وتكەن باسقوسۋدا جولداۋدا بەلگىلەنگەن ستراتەگيالىق مىندەتتەر، قوعامدىق كەلىسىم مەن جالپىۇلتتىق بىرلىكتى نىعايتۋ، جاستاردىڭ ازاماتتىق بەلسەندىلىگىن ارتتىرۋ جانە ۇلتتىق قۇندىلىقتاردى دارىپتەۋ ماسەلەلەرى قاراستىرىلدى.

قۇرىلتاي دەپۋتاتى ديحان قامزابەكۇلى باعدارلامالىق قۇجاتتىڭ نەگىزگى تۇجىرىمدارىنا كەڭىنەن توقتالدى.

– مەملەكەت باسشىسىنىڭ جولداۋىندا ايقىندالعان يدەولوگيالىق باعىتتاردىڭ ماڭىزى زور. ەلدىڭ دامۋى تەك ەكونوميكالىق وسىممەن نەمەسە ينفراقۇرىلىمدى جاڭعىرتۋمەن عانا ولشەنبەيدى. ەڭ الدىمەن، ول ازاماتتاردىڭ ساناسى مەن قوعامدىق قۇندىلىقتارعا بايلانىستى. بۇگىندە بىزگە ءبىلىمدى، ەڭبەكقور، وتانشىل ءارى يننوۆاتسيالىق تۇرعىدا ويلايتىن جاس ۇرپاق قاجەت. وسى تۇستا ادالدىق، ادىلدىك، زاڭعا قۇرمەت جانە قوعامدىق كەلىسىم قاعيداتتارىن نىعايتۋ – ستراتەگيالىق مىندەتتەردىڭ ءبىرى. اسىرەسە جاستاردىڭ ەلگە قىزمەت ەتۋگە، ۇلتتىق قۇندىلىقتاردى ساقتاۋعا جانە زاماناۋي تەحنولوگيالاردى مەڭگەرۋگە دەگەن ۇمتىلىسىن قالىپتاستىرۋ ايرىقشا ماڭىزدى، – دەدى ديحان قامزابەكۇلى.

دەپۋتاتتىڭ ايتۋىنشا، جولداۋدا كوتەرىلگەن باستامالار ءاربىر قازاقستاندىقتىڭ كۇندەلىكتى ومىرىنەن كورىنىس تابۋى ءتيىس. ويتكەنى شىنايى وتانشىلدىق سوزبەن ەمەس، ادال ەڭبەكپەن، ساپالى بىلىممەن، قوعامدىق ومىرگە بەلسەندى ارالاسۋمەن جانە ەل بولاشاعىنا بەيجاي قاراماۋمەن ولشەنەدى.

ديحان قامزابەكۇلى جاڭا تاريحي كەزەڭدەگى مەملەكەتتىڭ تابىستى دامۋى، ەڭ الدىمەن، ورتاق قۇندىلىقتارعا نەگىزدەلگەن سانالى قوعام مەن ازاماتتىق جاۋاپكەرشىلىكتەن باستالاتىنىن اتاپ ءوتتى.

وسىدان سوڭ جۇمىس توبىنىڭ مۇشەلەرى قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتىنە بارىپ، عىلىمي قوعامداستىق جانە پروفەسسور-وقىتۋشىلار قۇرامىمەن كەزدەستى. باس قوسۋدا ءبىلىم مەن عىلىمدى دامىتۋ، عىلىمي الەۋەتتى ارتتىرۋ، قوعامدىق كەلىسىمدى نىعايتۋ، اگرارلىق سەكتوردى جاڭعىرتۋ جانە سۋ رەسۋرستارىن ءتيىمدى پايدالانۋ ماسەلەلەرى تالقىلاندى.

ودان سوڭ دەلەگاتسيا مۇشەلەرى «ۇلى دالا ەلى» ورتالىعىندا حالىقارالىق تۋريزم جانە مەيماندوستىق ۋنيۆەرسيتەتىنىڭ ستۋدەنتتەرىمەن كەزدەستى. اشىق ديالوگ بارىسىندا سپيكەرلەر مەملەكەت باسشىسىنىڭ جولداۋىندا بەلگىلەنگەن باسىمدىقتاردى ءتۇسىندىرىپ، ەل دامۋىنداعى جاستاردىڭ رولىنە، ازاماتتىق جاۋاپكەرشىلىك پەن ۇلتتىق بىرلىكتىڭ ماڭىزىنا، سونداي-اق اۋىل شارۋاشىلىعى مەن سۋ رەسۋرستارىن ءتيىمدى باسقارۋ مىندەتتەرىنە توقتالدى. كەزدەسۋ سوڭىندا ستۋدەنتتەر وزدەرىن تولعاندىرعان سۇراقتارىن قويىپ، ۇسىنىس-پىكىرلەرىن ءبىلدىردى.

Abai.kz