الماتىدا Skill All جوباسى اياسىندا 2 مىڭنان استام جاس تەگىن ءبىلىم الدى.

قاتىسۋشىلار IT, ماركەتينگ، ديزاين جانە ءىس-شارا ۇيىمداستىرۋ سالالارىندا سۇرانىسقا يە ماماندىقتاردى مەڭگەرىپ، العان ءبىلىمىن جۇمىسقا ورنالاسۋ مەن جەكە جوباسىن دامىتۋعا پايدالانىپ ءجۇر. بۇل تۋرالى الماتىنىڭ جاستار ساياساتى باسقارماسىنىڭ وكىلدەرى ايتتى.

2026 جىلى 2 قاراشاداعى مالىمەت بويىنشا كۋرستاردان 2 058 ادام وتكەن. جوبا اياسىندا 67 وفلاين كۋرس ۇيىمداستىرىلدى. سونىمەن قاتار JasAlmaty.kz پلاتفورماسىندا قازاق جانە ورىس تىلدەرىندە 30 ونلاين ءبىلىم بەرۋ باعدارلاماسى قولجەتىمدى.

جوبا تۇلەكتەرىنىڭ ءبىرى نۇريتتين ورىنبەكوۆ. ول ءىس-شارا ۇيىمداستىرۋ كۋرسىن اياقتاعاننان كەيىن Nauryz Fest فەستيۆالىن وتكىزدى. باستاپقىدا شاراعا 500-600 ادام كەلەدى دەپ جوسپارلاعانىمەن، شىن مانىندە مىڭ بيلەت ساتىلعان.

گۇزەليا تۇرعانوۆا وسىنداي كۋرستان كەيىن City Makers قالالىق فەستيۆالىندە اقىلى تاعىلىمدامادان ءوتىپ، ونەرپازدارمەن جۇمىس ىستەدى. كەيىن ءىس-شارا ۇيىمداستىرۋمەن اينالىساتىن كومپانياعا باسشىنىڭ كومەكشىسى بولىپ جۇمىسقا ورنالاستى.

تاعى ءبىر تۇلەك اسەت حيساروۆ برەند-مەنەدجمەنت كۋرسىن اياقتاپ، وسى باعىت بويىنشا جۇمىسقا ورنالاستى. ونىڭ ايتۋىنشا، كۋرستا العان ءبىلىمى برەندتى ىلگەرىلەتۋگە، كوممۋنيكاتسيا ورناتۋعا جانە جوبالاردى ۇيىمداستىرۋعا كومەكتەسەدى.

كاسىپكەر الىبەك ورازاليەۆ تارگەتتەلگەن جارناما كۋرسىن وزىنە تيەسىلى اۆتوكولىك قوزعالتقىشتارىنا قىزمەت كورسەتۋ بيزنەسىن دامىتۋ ءۇشىن پايدالاندى. وقۋ اياقتالعاننان كەيىن ساتىلىم كولەمى مەن جارنامانىڭ قامتۋ كورسەتكىشى ارتقانىن ايتتى.

Skill All جوباسى اياسىندا جاستار Python باعدارلامالاۋ ءتىلىن، QA-تەستىلەۋدى، گرافيكالىق ديزايندى، ماركەتينگتى، جوبالاردى باسقارۋدى جانە جاساندى ينتەللەكت قۇرالدارىن تەگىن مەڭگەرە الادى. سونداي-اق ساۋلەتتىك جوبالاۋ مەن BIM-مودەلدەۋ كۋرستارى دا بار.

وفلاين ساباقتار الماتىداعى جاستارعا ارنالعان كوميۋنيتي ورتالىقتاردا، جوعارى وقۋ ورىندارى مەن ءبىلىم بەرۋ ۇيىمدارىندا وتەدى. جوبا مەملەكەتتىك جاستار ساياساتى اياسىندا جۇزەگە اسىرىلىپ جاتىر. ونىڭ ىشىندە جۇمىس ىستەمەيتىن جانە وقىمايتىن NEET ساناتىنداعى جاستاردى دا وقىتۋعا باسىمدىق بەرىلگەن.

وقۋ باعدارلامالارىمەن JasAlmaty.kz سايتىندا تانىسۋعا بولادى.

Abai.kz