ەلورداداعى ۇلتتىق اكادەميالىق كىتاپحانادا «Egemen Qazaqstan» گازەتىنىڭ «ساناتكەر ۇلت» جوباسى اياسىنداعى كەزەكتى دوڭگەلەك ۇستەل ءوتتى.

مەملەكەت باسشىسى قاسىم-جومارت توقاەۆتىڭ جاڭا قوعامدىق ەتيكا قالىپتاستىرۋ باستامالارىن ناسيحاتتاۋ ماقساتىندا ۇيىمداستىرىلعان باسقوسۋعا «جاڭا قوعامدىق سانا: ادەپ، ءتارتىپ، جاۋاپكەرشىلىك» تاقىرىبى ارقاۋ بولدى.

جيىنعا مودەراتورلىق ەتكەن پرەزيدەنت كەڭەسشىسى باۋىرجان ومارۇلى دوڭگەلەك ۇستەلدىڭ كىرىسپەسىندە جاڭا قوعامعا بەت بۇرعان سوڭ، جاڭا قۇندىلىقتاردىڭ ورنىعۋى – زاڭدى نارسە ەكەنىن جەتكىزدى.

«بۇگىن تىلىمىزگە تيەك بولىپ وتىرعان جاڭا ەتيكا ماسەلەسى دە – سونىڭ قۇرامداس بولىگى. وزدەرىڭىز بىلەسىزدەر، جاڭا تۇرپاتتى مەملەكەت، ساپالى ۇلت دەگەن ۇعىمدار ءبىزدىڭ ومىرىمىزگە دەندەپ ەنە باستادى. تۇركىستانداعى جيىندا مەملەكەت باسشىسى: «ەلىمىزدە جاڭا قوعامدىق ەتيكا قالىپتاسۋى كەرەك. وندا ەلدىڭ بىرلىگى مەن تۇراقتىلىعى، ازاماتتاردىڭ ءوزارا تىلەكتەستىگى، ادىلدىك، زاڭ مەن ءتارتىپ، سەنىم مەن جاۋاپكەرشىلىك سياقتى قۇندىلىقتار ۇستەمدىك قۇرۋى قاجەت»، دەپ ناقتى مىندەت قويدى. مۇنى باعدارلامالىق مىندەت دەۋگە بولادى»، دەپ اتاپ ءوتتى ب.ومارۇلى.

ءىس-شاراعا قاتىسقان بەلگىلى مەملەكەت جانە قوعام قايراتكەرلەرى، قۇرىلتاي دەپۋتاتتارى ءۇنزيلا شاپاق، جاناربەك ءاشىمجان، داۋلەت كارىبەك، جازۋشى-دراماتۋرگ، پۋبليتسيست جابال ەرعاليەۆ، قازاقستان حالىق كەڭەسىنىڭ مۇشەلەرى تابيعات زەينۇلقابدەن، تولەگەن كۇنادىلوۆ، ناتاليا دەمەنتەۆا، قازاقستان قوعامدىق دامۋ ينستيتۋتى ينستيتۋتسيونالدى تالداۋ جانە رەفورمالار ورتالىعىنىڭ ديرەكتورى ريززات تاسىم، پرەزيدەنت جانىنداعى ورتالىق كوممۋنيكاتسيالار قىزمەتىنىڭ باس ساراپشىسى جاندار اسان، ل.ن.گۋميلەۆ اتىنداعى ەۇۋ فيلوسوفيا كافەدراسىنىڭ پروفەسسورى راۋان كەمەرباي كەلەلى وي-تۇجىرىمدارىن ورتاعا سالدى.

اتاپ ايتقاندا، «زاڭ مەن ءتارتىپ» قاعيداتىنىڭ ورنىعۋى، جاڭا قوعامدىق سانا قالىپتاستىرۋ، جاستار تاربيەسى، «تازا قازاقستان» يدەياسىنىڭ ماڭىزى، تسيفرلىق قارىم-قاتىناس مادەنيەتى سەكىلدى وزەكتى تاقىرىپتار بويىنشا پىكىر الماسىپ، ۇتىمدى ۇسىنىستارىن ايتتى.

«دوڭگەلەك ۇستەل» تۋرالى تولىق اقپاراتتى «Egemen Qazaqstan» گازەتىنىڭ بۇگىنگى نومىرىنەن وقي الاسىزدار.

Abai.kz